എറണാകുളം ജനറൽ ആശുപത്രിയിലെ ആ തീവ്രപരിചരണ വിഭാഗം ഇപ്പോൾ കനത്ത നിശബ്ദതയിലാണ്. ദിവസങ്ങൾ നീണ്ട കാത്തിരിപ്പിനും പ്രാർത്ഥനകൾക്കും വിരാമമിട്ടുകൊണ്ട്, ഹൃദയം മാറ്റിവെക്കൽ ശസ്ത്രക്രിയയ്ക്ക് വിധേയയായ നേപ്പാൾ സ്വദേശിനി ദുർഗ കാമി (21) യാത്രയായിരിക്കുന്നു. കേരളം മുഴുവൻ അവളുടെ തിരിച്ചുവരവിനായി പ്രാർത്ഥനയോടെ കാത്തിരിക്കുമ്പോഴാണ് ആശുപത്രി സൂപ്രണ്ട് ഡോ. ഷാഹിർഷാ ഈ ദുഃഖവാർത്ത പങ്കുവെച്ചത്.

To advertise here,

ഏതാനും ദിവസങ്ങൾക്ക് മുമ്പ് ദുർഗയുടെ ആരോഗ്യനിലയിൽ വലിയ പുരോഗതി പ്രകടമായിരുന്നു. അവളുടെ പോരാട്ടവീര്യം ഡോക്ടർമാരിലും നഴ്സുമാരിലും വലിയ പ്രതീക്ഷയാണ് നൽകിയത്. ജീവൻരക്ഷാ മെഷീനുകളുടെ പിന്തുണ നീക്കം ചെയ്യുകയും അവൾ സാധാരണ നിലയിലേക്ക് എത്തുകയും ചെയ്തിരുന്നു. ഇതിന്റെ ഭാഗമായി ഫിസിയോതെറാപ്പിയും ആരംഭിച്ചിരുന്നു. ഹൃദയത്തിൽ മറ്റൊരു ജീവന്റെ തുടിപ്പുമായി ജീവിതത്തിലേക്ക് മടങ്ങിവരാൻ അവൾ അത്രമേൽ ആഗ്രഹിച്ചിരുന്നു.

അവളുടെ അവസാന ആഗ്രഹം ഡോക്ടർമാരുടെ പോലും കണ്ണ് നിറയിക്കുന്നതായിരുന്നു. ശസ്ത്രക്രിയയ്ക്ക് ശേഷം ജീവിതത്തിലേക്ക് പിച്ചവെച്ചു തുടങ്ങവെ, "നാളെ വരുമ്പോൾ എനിക്ക് വായിക്കാൻ പുസ്തകങ്ങൾ കൊണ്ടുവരണം" എന്ന് അവൾ ഡോ. ജോർജ് വാളൂരാനോട് ആവശ്യപ്പെട്ടിരുന്നു. ഐ.സി.യുവിന് പുറത്തുനിന്ന് അവളെ അവസാനമായി കണ്ട ആ നിമിഷങ്ങൾ ആശുപത്രി അധികൃതർക്ക് ഇന്നും നൊമ്പരമാണ്. വായനയുടെ ലോകത്തേക്ക് മടങ്ങാനിരുന്ന ആ പെൺകുട്ടിയെ പക്ഷേ മരണം കവർന്നെടുത്തു.

ഡാനൺ എന്ന അത്യപൂർവ്വ രോഗത്തെ തുടർന്ന് എറണാകുളം ജനറൽ ആശുപത്രിയിൽ ചികിത്സയിലായിരുന്ന ദുർഗയ്ക്ക്, ഒരു വിദേശ പൗരയായതിനാൽ അവയവദാന പട്ടികയിൽ ഉൾപ്പെടാൻ നിയമപരമായ കടമ്പകൾ ഉണ്ടായിരുന്നു. എന്നാൽ ഹൈക്കോടതിയുടെ ഇടപെടലിലൂടെ പ്രത്യേക അനുമതി വാങ്ങിയാണ് കേരള സർക്കാർ അവൾക്ക് വേണ്ടി ശസ്ത്രക്രിയയ്ക്കുള്ള സൗകര്യങ്ങൾ ഒരുക്കിയത്.

ദുർഗയുടെ ജീവൻ രക്ഷിക്കാൻ എറണാകുളം ജനറൽ ആശുപത്രിയിലെ മെഡിക്കൽ ടീം സാധ്യമായ എല്ലാ പരിശ്രമങ്ങളും നടത്തിയിരുന്നു. ദുർഗയുടെ വിയോഗത്തിൽ ആരോഗ്യ മന്ത്രി വീണാ ജോർജ് ആഴമായ ദുഃഖം രേഖപ്പെടുത്തുകയും അവളുടെ സഹോദരന്റെയും പ്രിയപ്പെട്ടവരുടെയും ദുഃഖത്തിൽ പങ്കുചേരുകയും ചെയ്തു. കഠിന പരിശ്രമങ്ങൾക്കും പ്രാർത്ഥനകൾക്കും അവളെ ജീവിതത്തിലേക്ക് തിരികെ കൊണ്ടുവരാനായില്ല എന്നത് കേരളത്തിന് ഒരു തീരാനൊമ്പരമായി അവശേഷിക്കുന്നു.