തിരുവനന്തപുരം: കോളേജ് ഹോസ്റ്റലിലേയും ക്യാമ്പസുകളിലേയും ലഹരിമാഫിയ-റാ​ഗിങ് സംഘങ്ങളെ അമർച്ച ചെയ്യണമെന്നാവശ്യപ്പെട്ട്  കെ.എസ്.യു തിരുവനന്തപുരം ജില്ലാ കമ്മറ്റി സംഘടിപ്പിച്ച സെക്രട്ടേറിയറ്റ് മാർച്ചിൽ സംഘർഷം. കെ.എസ്.യു സംസ്ഥാന പ്രസിഡന്റ് അലോഷ്യസ് സേവ്യറിന്റെ നേതൃത്വത്തിലായിരുന്നു സമരം. 

To advertise here,

അലോഷ്യസ് സംസാരിച്ചുകൊണ്ടിരിക്കവെ സെക്രട്ടേറിയറ്റിനു മുൻപിൽവെച്ച ബാരിക്കേഡ് പ്രവർത്തകർ ചാടിക്കടക്കാൻ ശ്രമിച്ചതോടെ പോലീസ് ജല പീരങ്കി പ്രയോ​ഗിക്കുകയായിരുന്നു. ബാരിക്കേഡ് മറിച്ചിടാൻ പ്രവർത്തകർ ശ്രമിച്ചതോടെ പോലീസ് വീണ്ടും പ്രവർത്തകർക്കുനേരെ ജലപീരങ്കി ഉപയോ​ഗിച്ചു. തുടർന്ന്, ജലപീരങ്കി വാഹനത്തിന് മുകളിൽ കയറാൻ ശ്രമിച്ച കെ.എസ്.യു ജില്ലാ പ്രസിഡന്റ് ​ഗോപു നെയ്യാറിനെ ബലംപ്രയോ​ഗിച്ച് പോലീസ് താഴെ ഇറക്കിയതോടെ പ്രതിഷേധം കനത്തു. 

ഇതോടെ പോലീസും പ്രവർത്തകരും തമ്മിൽ  വാക്കേറ്റവും ഉന്തും തള്ളുമുണ്ടായി. നാല് റൗണ്ട് ജലപീരങ്കി പ്രയോ​ഗിച്ചെങ്കിലും പ്രവർത്തകർ പിരിഞ്ഞുപോകാൻ തയ്യാറായില്ല. കുറച്ചു പ്രവർത്തകർ സെക്രട്ടേറിയറ്റിന്റെ മതിൽ ചാടിക്കടക്കാൻ ശ്രമിച്ചെങ്കിലും നേതാക്കളെത്തി ഇവരെ പിന്തിരിപ്പിക്കുകയായിരുന്നു.