ന്യൂഡൽഹി: സെൻസസുമായി ബന്ധപ്പെട്ട ചില ചോദ്യങ്ങളെച്ചൊല്ലി വിവാദം. പൗരത്വഭേദഗതി നിയമം പിൻവാതിലിലൂടെ നടപ്പാക്കാൻ സെൻസസ് കണക്കുകളെ ഉപയോഗിക്കാനിടയുണ്ടെന്നാണ് ആശങ്ക. ദേശീയ പൗരത്വരജിസ്റ്റർ നടപ്പാക്കാനായി 2020-ൽ തയ്യാറാക്കിയ ചോദ്യാവലിയിലെ ചില ചോദ്യങ്ങൾ ഇതിലുമുള്ളതാണ് കാരണം.

To advertise here,

2011-ലേതിനെക്കാൾ 14 ചോദ്യങ്ങളാണ് ഇത്തവണ കൂടുതലായി ഉൾപ്പെടുത്തിയിരിക്കുന്നത്. ഇതിൽ അച്ഛന്റെയും അമ്മയുടെയും വിശദാംശങ്ങൾ, മൊബൈൽ നമ്പർ, ആധാർ നമ്പർ, വോട്ടർ തിരിച്ചറിയൽ കാർഡ്, പാസ്പോർട്ട് നമ്പർ, ഡ്രൈവിങ് ലൈസൻസ് എന്നിവ 2020-ൽ ദേശീയ പൗരത്വരജിസ്റ്ററുമായി ബന്ധപ്പെട്ട ചോദ്യാവലിയിൽ ഉൾപ്പെട്ടവയാണ്.

14 ചോദ്യങ്ങൾ ഇവയാണ്: ജീവിത പങ്കാളിയുടെ പേര്, പ്രഖ്യാപിക്കപ്പെട്ട പൗരത്വം, അച്ഛന്റെ വിശദാംശങ്ങൾ, അമ്മയുടെ വിശദാംശങ്ങൾ, എസ്.സി./എസ്.ടി./ജാതി, സാക്ഷരത/ഡിജിറ്റൽ സാക്ഷരത, ഉയർന്ന വിദ്യാഭ്യാസ യോഗ്യത, കോവിഡ്-19 വാക്സിനേഷനെടുത്ത സ്ഥലം, മൊത്തം ബാങ്ക് അക്കൗണ്ടുകളുടെ എണ്ണം, മൊബൈൽ നമ്പർ (ലഭ്യമെങ്കിൽ), ആധാർ നമ്പർ (ലഭ്യമെങ്കിൽ), വോട്ടർ തിരിച്ചറിയൽ നമ്പർ (ലഭ്യമെങ്കിൽ), പാസ്പോർട്ട് നമ്പർ (ഇന്ത്യൻ പാസ്പോർട്ട് ഉടമകൾക്ക്), ഡ്രൈവിങ് ലൈസൻസ് (ലഭ്യമെങ്കിൽ).