ന്യൂഡല്ഹി: വെടിനിര്ത്തല് പ്രാബല്യത്തില് വന്നതിന് പിന്നാലെ അതിര്ത്തിയില് വീണ്ടും പാക് പ്രകോപനം. ജമ്മു കശ്മീരില് നിയന്ത്രണരേഖയില് വിവിധയിടങ്ങളില് പാകിസ്താന്റെ ഭാഗത്ത് നിന്ന് മോർട്ടാർ ഷെല്ലിങ്ങും ഡ്രോൺ ആക്രമണ ശ്രമങ്ങളും ഉണ്ടായെന്നാണ് റിപ്പോര്ട്ടുകള്. ഉധംപുരിൽ പാകിസ്താനി ഡ്രോണ് ആക്രമണ ശ്രമം വ്യോമസേന പരാജയപ്പെടുത്തിയതായി വാര്ത്താ ഏജന്സിയായ എഎന്ഐ റിപ്പോര്ട്ട് ചെയ്തു. അതേസമയം നിലവില് നിയന്ത്രണ രേഖയില് വെടിവെപ്പ് നടക്കുന്നില്ലെന്ന് പ്രതിരോധ വൃത്തങ്ങള് അറിയിച്ചു.
ഇതിനിടെ ശ്രീനഗറിലുടനീളം സ്ഫോടന ശബ്ദങ്ങളുണ്ടായെന്ന് ജമ്മു കശ്മീര് മുഖ്യമന്ത്രി ഒമര് അബ്ദുള്ള 'എക്സി'ല് കുറിച്ചു. വെടിനിര്ത്തലിന് എന്താണ് സംഭവിച്ചതെന്നും അദ്ദേഹം ചോദിച്ചു. ചര്ച്ചകളുടെ ഭാഗമായി പാകിസ്താനുമായി ശനിയാഴ്ച വൈകീട്ട് അഞ്ച് മുതല് വെടിനിര്ത്തല് നിലവില് വന്നിരുന്നു.
ഇതിന്റെ തുടര്ചര്ച്ചകള് രണ്ടു ദിവസത്തിന് ശേഷം നടക്കാനിരിക്കെയാണ് പാകിസ്താന്റെ ഭാഗത്ത് നിന്നുള്ള ലംഘനമുണ്ടായിരിക്കുന്നത്. രാജസ്ഥാനിലെ ബാര്മറിലും നിരവധി സ്ഫോടന ശബ്ദങ്ങള് കേട്ടതായി വിവരമുണ്ട്.
ഗുജറാത്തിലെ കച്ച് ജില്ലയില് നിരവധി ഡ്രോണുകള് കണ്ടെത്തിയതായി സംസ്ഥാന ആഭ്യന്തര മന്ത്രി ഹര്ഷ് സാങ്വി ട്വീറ്റ് ചെയ്തു.
Content Highlights: Pakistan violates ceasefire hours after peace deal announced
Published: 10 May 2025, 09:10 pm IST
മാതൃഭൂമി.കോം വാട്സാപ്പിലും
വാര്ത്തകളോടു പ്രതികരിക്കുന്നവര് അശ്ലീലവും അസഭ്യവും നിയമവിരുദ്ധവും അപകീര്ത്തികരവും സ്പര്ധ വളര്ത്തുന്നതുമായ പരാമര്ശങ്ങള് ഒഴിവാക്കുക. വ്യക്തിപരമായ അധിക്ഷേപങ്ങള് പാടില്ല. ഇത്തരം അഭിപ്രായങ്ങള് സൈബര് നിയമപ്രകാരം ശിക്ഷാര്ഹമാണ്. വായനക്കാരുടെ അഭിപ്രായങ്ങള് വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..



Most Commented