ബെംഗളൂരൂ: കർണാടകയിൽ കോൺഗ്രസ് നേതാക്കൾക്കെതിരായ സ്റ്റിങ് ഓപ്പറേഷനിൽ പങ്കുണ്ടെന്ന ആരോപണത്തെ തുടർന്ന് മുൻ പാർട്ടി ജനറൽ സെക്രട്ടറി കൃപ ആൽവയെ കെ.പി.സി.സി. ആറു വർഷത്തേക്ക് പാർട്ടിയിൽനിന്ന് പുറത്താക്കി. വിവാദങ്ങൾ പാർട്ടിക്ക് വലിയ നാണക്കേടുണ്ടാക്കിയ പശ്ചാത്തലത്തിലാണ് നടപടി. കൃപ ആൽവയുടെ പെരുമാറ്റം പാർട്ടി വിരുദ്ധ പ്രവർത്തനമാണെന്ന് ചൂണ്ടിക്കാട്ടി കെ.പി.സി.സി വൈസ് പ്രസിഡന്റ് എം. നാരായണസ്വാമിയാണ് പുറത്താക്കൽ ഉത്തരവ് പുറപ്പെടുവിച്ചത്.

To advertise here,

ആരോപണങ്ങളിൽ വിശദീകരണം തേടി കൃപ ആൽവയ്ക്ക് കാരണം കാണിക്കൽ നോട്ടീസ് നൽകിയിരുന്നെങ്കിലും അവർ മറുപടിയൊന്നും നൽകിയിരുന്നില്ല. അപകീർത്തികരമായ വീഡിയോയ്ക്ക് പിന്നിൽ കൃപ ആൽവയാണെന്ന് മുൻ മുഖ്യമന്ത്രി സിദ്ധരാമയ്യ ആരോപിച്ചിരുന്നു. മാധ്യമങ്ങൾ ഈ വീഡിയോ സംപ്രേക്ഷണം ചെയ്യുന്നതും പ്രസിദ്ധീകരിക്കുന്നതും വിലക്കിക്കൊണ്ട് സിദ്ധരാമയ്യ കോടതിയിൽ നിന്ന് സ്റ്റേ ഉത്തരവും സമ്പാദിച്ചിരുന്നു. സിദ്ധരാമയ്യയ്‌ക്കെതിരായ അപകീർത്തികരമായ ഉള്ളടക്കം അടങ്ങിയ സ്റ്റിങ് ഓപ്പറേഷനെക്കുറിച്ച് ബെംഗളൂരു പോലീസ് വിശദമായ അന്വേഷണം നടത്തിവരികയായിരുന്നു.

അപകീർത്തികരമായ വിഡിയോയിലുള്ള ലൈംഗിക പീഡന ആരോപണങ്ങൾ വ്യാജമാണെന്ന് അന്വേഷണത്തിന് ശേഷം ബെംഗളൂരു പോലീസ് വ്യക്തമാക്കി. വീഡിയോയിൽ ആരോപിക്കുന്ന തരത്തിലുള്ള സംഭവങ്ങൾ നടന്നതായി സ്ഥിരീകരിക്കുന്ന തെളിവുകളോ മൊഴികളോ ശേഖരിക്കാൻ കഴിഞ്ഞിട്ടില്ലെന്ന് പോലീസ് അറിയിച്ചു.