അതിദാരിദ്ര്യം അന്ത്യോദയ ഗുണഭോക്താക്കളെ കണ്ടെത്താനുള്ള മാനദണ്ഡമല്ലെന്ന് കേന്ദ്രം

ന്യൂഡൽഹി: അതിദാരിദ്ര്യം അന്ത്യോദയ ഗുണഭോക്താക്കളെ കണ്ടെത്താനുള്ള മാനദണ്ഡമല്ലെന്നും കേരളത്തെ സംസ്ഥാനസർക്കാർ അതിദാരിദ്ര്യമുക്തമായി പ്രഖ്യാപിച്ചതുകൊണ്ട് സംസ്ഥാനത്തിനുള്ള ഭക്ഷ്യധാന്യ വിതരണത്തിൽ മാറ്റമുണ്ടാകില്ലെന്നും കേന്ദ്രസർക്കാർ.

ലോക്‌സഭാ ചോദ്യോത്തരവേളയിൽ എൻ.കെ. പ്രേമചന്ദ്രനും എം.കെ. രാഘവനും ഉന്നയിച്ച ചോദ്യത്തിന് മറുപടിയായി കേന്ദ്ര ഭക്ഷ്യ-പൊതുവിതരണ മന്ത്രി പ്രഹ്ളാദ് ജോഷിയാണ് ഇക്കാര്യം വ്യക്തമാക്കിയത്.

കേരളത്തെ അതിദാരിദ്ര്യ മുക്ത സംസ്ഥാനമായി നവംബർ ഒന്നിന് സംസ്ഥാനസർക്കാർ പ്രഖ്യാപിച്ചു. എന്നാൽ, അന്ത്യോദയ- അന്നയോജന മാർഗരേഖപ്രകാരം അർഹരായ ഗുണഭോക്താക്കളെ കണ്ടെത്താൻ ഇതൊരു മാനദണ്ഡമല്ല. ഈ പ്രഖ്യാപനം കേരളത്തിന് ബാഹ്യ ധനകാര്യ ഏജൻസികളിൽനിന്നുള്ള സഹായധനം ലഭ്യമാക്കാൻ വഴിയൊരുക്കുമോ എന്ന ചോദ്യത്തിന് അക്കാര്യം മന്ത്രാലയത്തിന്റെ ശ്രദ്ധയിലില്ലെന്നായിരുന്നു കേന്ദ്രമന്ത്രിയുടെ മറുപടി.

നിതി ആയോഗ് 2023-ൽ പുറത്തുവിട്ട ബഹുമുഖ ദാരിദ്ര്യസൂചിക അനുസരിച്ച് 2015-’16-ൽ രാജ്യത്തെ ദരിദ്രരുടെ തോത് 24.85 ശതമാനമായിരുന്നത് 2019-’21-ൽ 14.96 ശതമാനമായി കുറഞ്ഞിരുന്നു. ഇതേ കാലയളവിൽ കേരളത്തിൽ ദരിദ്രരുടെ തോത് 0.70 ശതമാനത്തിൽനിന്ന് 0.55 ശതമാനമായി കുറഞ്ഞു. ബഹുമുഖ ദാരിദ്ര്യം സംബന്ധിച്ച രേഖയനുസരിച്ച് ദരിദ്രരുടെ തോത് 2013-’14 ൽ 29.14 ശതമാനമായിരുന്നത് 2022-’23-ൽ 11.28 ശതമാനമായി. സംസ്ഥാനങ്ങൾക്കും കേന്ദ്രഭരണപ്രദേശങ്ങൾക്കുമുള്ള ഭക്ഷ്യധാന്യവിതരണം അതത് സംസ്ഥാനങ്ങൾ കൈമാറുന്ന ഗുണഭോക്തൃ പട്ടികയനുസരിച്ചാണെന്നും കേന്ദ്രമന്ത്രി വ്യക്തമാക്കി.