ലഖ്‌നൗ: പട്‌നയിൽനിന്ന് ലഖ്‌നൗവിലേക്ക് പോയ ഇൻഡിഗോ വിമാനം മിന്നലേറ്റതിനെ അടിയന്തരമായി ലാൻഡ് ചെയ്തു. 17,000 അടി ഉയരത്തിൽ പറക്കുമ്പോൾ ഇടിമിന്നലേറ്റതിനെത്തുടർന്നാണ് അടിയന്തര ലാൻഡിങ് വേണ്ടിവന്നത്.

To advertise here,

വിമാനത്തിന്റെ മുൻഭാഗത്തിന് കേടുപാടുകൾ സംഭവിച്ചു. 104 യാത്രക്കാരും ആറു ജീവനക്കാരുമുൾപ്പെടെ വിമാനത്തിലുണ്ടായിരുന്ന 110 പേരും സുരക്ഷിതരാണെന്ന് അധികൃതർ അറിയിച്ചു.

6E925 വിമാനം ഉച്ചയ്ക്ക് 3.10-നാണ് പട്‌നയിൽനിന്ന് പുറപ്പെട്ടത്. ഇടിമിന്നലേറ്റതിനെത്തുടർന്ന് വൈകിട്ട് 4.05-ഓടെ ലഖ്നൗവിൽ അടിയന്തരമായി ലാൻഡ് ചെയ്യുകയായിരുന്നു. നിശ്ചിത സമയത്തിന് എട്ട് മിനിറ്റ് മുമ്പായിരുന്നു വിമാനം സുരക്ഷിതമായി ലാൻഡ് ചെയ്തത്.

ലഖ്‌നൗവിൽനിന്ന് അഹമ്മദാബാദിലേക്ക് ഇതേ വിമാനമായിരുന്നു സർവീസ് നടത്തേണ്ടിയിരുന്നത്. എന്നാൽ, അപകടത്തെത്തുടർന്ന് വിമാനം സർവീസിൽ നിന്ന് പിൻവലിച്ചു.

സംഭവത്തിൽ ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (ഡി.ജി.സി.എ) അന്വേഷണം ആരംഭിച്ചു. റെഗുലേറ്ററി ക്ലിയറൻസ് ലഭിച്ച ശേഷം മാത്രമേ ഇനി വിമാനത്തിന് സർവീസ് നടത്താൻ അനുമതി ലഭിക്കൂ.