ന്യൂഡൽഹി: ഗംഗാനദീജലം പങ്കിടുന്നതിന് ഇന്ത്യയും ബംഗ്ലാദേശും തമ്മിൽ 30 വർഷമായി നിലവിലുള്ള കരാർ പുതുക്കേണ്ടതില്ലെന്ന് കേന്ദ്രസർക്കാർ തീരുമാനിച്ചതായി റിപ്പോർട്ട്. അടുത്ത മാസം 12-ന് കരാർ കാലാവധി അവസാനിക്കാനിരിക്കേയാണിത്. എന്നാൽ, നിലവിൽ ലഭിക്കുന്ന വെള്ളം ബംഗ്ലാദേശിന് തുടർന്നും ലഭിച്ചേക്കും.

To advertise here,

1996 ഡിസംബർ 12-നാണ് ഗംഗാനദിയിലെ ജലവിഹിതം സംബന്ധിച്ച് ഇന്ത്യയും ബംഗ്ലാദേശും കരാറിൽ ഒപ്പുവെച്ചത്. വേനലിൽ ജലലഭ്യത കുറയുന്ന സമയത്ത് ഫറാക്ക ബാരേജിന് സമീപമുള്ള നദീജലം പങ്കിടുകയാണ് കരാറിന്റെ പ്രധാനലക്ഷ്യം. 30 വർഷത്തിനുശേഷം പരസ്പര സമ്മതത്തോടെ കരാർ പുതുക്കണമെന്നാണ് വ്യവസ്ഥ.

ഇന്ത്യയിലെ വികസന പ്രവർത്തനങ്ങൾക്ക് ആവശ്യമായ വെള്ളത്തിന്റെ ലഭ്യത ഉറപ്പുവരുത്തണമെന്ന ആവശ്യം മുൻനിർത്തിയാണ് കരാർ പുതുക്കാത്തതെന്നാണ് സൂചന. കൊൽക്കത്തയിലെ ശ്യാമപ്രസാദ് മുഖർജി തുറമുഖത്തിന്റെ പ്രവർത്തനം സുഗമമാക്കുക, എൻ.ടി.പി.സി.യുടെ താപവൈദ്യുതനിലയത്തിന് ആവശ്യമായ വെള്ളം ഉറപ്പാക്കുക, സുന്ദർബൻ മേഖലയിലെയും സമീപ പ്രദേശങ്ങളിലെയും ഉപ്പുവെള്ളത്തിന്റെ കടന്നുകയറ്റം തടയുക എന്നിവയാണ് ഇന്ത്യ ഉയർത്തുന്ന വികസനവിഷയങ്ങൾ.

കരാർപ്രകാരം മാർച്ച് 11 മുതൽ മേയ് 11 വരെ ജലക്ഷാമമുള്ള കാലയളവിൽ ഇരുരാജ്യത്തിനും മാറിമാറി പത്തുദിവസം വീതം 35,000 ക്യുസെക്സ് വെള്ളമാണ് അനുവദിക്കുന്നത്. എന്നാൽ, കൊൽക്കത്ത തുറമുഖത്തിന്റെ വികസനപ്രവർത്തനങ്ങൾ തടസ്സമില്ലാതെ മുന്നോട്ടുകൊണ്ടുപോകാൻ 40,000 ക്യൂസെക്സ് വെള്ളം ആവശ്യമാണെന്ന് സാങ്കേതികവിദഗ്ധർ ചൂണ്ടിക്കാട്ടുന്നു. ഇതുസംബന്ധിച്ച സാങ്കേതികവിവരങ്ങളും വിശദീകരണങ്ങളും കേന്ദ്രജലകമ്മിഷൻ കഴിഞ്ഞമാസം വിദേശകാര്യ മന്ത്രാലയത്തിന് കൈമാറിയിട്ടുണ്ട്.

ജലക്ഷാമമുള്ള കാലയളവിൽ കൊൽക്കത്ത തുറമുഖത്ത് അടിഞ്ഞുകൂടുന്ന മണ്ണും ചെളിയും നീക്കം ചെയ്യുന്നതിനും സുന്ദർബൻ മേഖലയിലേക്കും സമീപത്തെ കൃഷിയോഗ്യമായ പ്രദേശങ്ങളിലേക്കും ഉപ്പുവെള്ളം കയറുന്നത് തടയുന്നതിനും കുറഞ്ഞത് 5,000 ക്യൂസെക്സ് അധികജലം ആവശ്യമാണെന്ന് ഉദ്യോഗസ്ഥർ വ്യക്തമാക്കിയിട്ടുണ്ട്.