ന്യൂഡൽഹി: മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാർ രാജിവെക്കണമെന്ന് ആവശ്യപ്പെട്ട് സിജെപിയും വിദ്യാർഥി സംഘടനകളും ഡൽഹിയിൽ നടത്തുന്ന പ്രതിഷേധത്തിനിടെ വിദ്യാർഥികളെ തല്ലിച്ചതയ്ക്കുന്ന ആർഎസ്എസ്-ബിജെപി പ്രവർത്തകരുടെ വീഡിയോ പുറത്തുവിട്ട് കോൺഗ്രസ്. ഡൽഹി പോലീസിന്റെ കൺമുന്നിലാണ് ഇവർ വിദ്യാർഥികളെ ക്രൂരമായി മർദിച്ചത്. 'ആർഎസ്എസ്-ബിജെപി ഗുണ്ടകൾ സ്വൈര്യവിഹാരം നടത്തുകയാണെന്ന’ ആരോപണവുമായി യൂത്ത് കോൺഗ്രസും രംഗത്തെത്തി.

To advertise here,

'ഡൽഹി പോലീസിന്റെ കൺമുന്നിൽ വെച്ച് ആർഎസ്എസ്-ബിജെപി ഗുണ്ടകൾ പ്രതിഷേധക്കാരെ മർദിക്കുന്നു. മോദി-ഷാ കൂട്ടുകെട്ട് രാജ്യമാകെ ഗുണ്ടായിസത്തിന്റെ തേർവാഴ്ചയാണ് സ്ഥാപിച്ചിരിക്കുന്നത്. പോലീസ് നോക്കിനിൽക്കെ ഒരു പെൺകുട്ടിയെ നിലത്ത് വീഴ്ത്തുന്നതും അടിക്കുന്നതും ഈ വീഡിയോയിൽ കാണാം.' -മർദനദൃശ്യം പങ്കുവെച്ചുകൊണ്ട് എക്‌സിൽ കോൺഗ്രസ് കുറിച്ചു. മർദനത്തിനിരയായ പെൺകുട്ടി പൊട്ടിക്കരയുന്നതും വീഡിയോയിൽ കാണാം.

കാവിക്കൊടിയുമേന്തി വന്നാണ് ആർഎസ്എസ്-ബിജെപി പ്രവർത്തകർ വിദ്യാർഥികളെ മർദിച്ചത്. ഏതാനും ആൺകുട്ടികൾക്കും പെൺകുട്ടികൾക്കും മർദനമേറ്റത് ദൃശ്യങ്ങളിൽ കാണാം. അതേസമയം മർദനം അഴിച്ചുവിട്ടവരെ തടയാതെ പോലീസ് അവരോട് സംസാരിക്കുന്നതും ദൃശ്യങ്ങളിലുണ്ട്.

'സാധാരണക്കാരായ പ്രതിഷേധക്കാർ ഡൽഹിയിലെ തെരുവിൽ കാലുകുത്തുമ്പോൾ തന്നെ കസ്റ്റഡിയിലെടുക്കപ്പെടുമ്പോൾ ആർഎസ്എസ്-ബിജെപി ഗുണ്ടകൾ സ്വതന്ത്രമായി വിഹരിക്കുകയാണ്.' -മറ്റൊരു വീഡിയോ പങ്കുവെച്ചുകൊണ്ട് യൂത്ത് കോൺഗ്രസ് എക്‌സിൽ കുറിച്ചു. സമാനമായ ഒട്ടേറെ ദൃശ്യങ്ങൾ യൂത്ത് കോൺഗ്രസ് എക്‌സിൽ പങ്കുവെച്ചിട്ടുണ്ട്.