ന്യൂഡല്‍ഹി: കന്യാകുമാരി മുതല്‍ കശ്മീര്‍ വരെ രാഹുല്‍ ഗാന്ധി നടത്തിയ ഒന്നാം ഭാരത് ജോഡോ യാത്രയ്ക്ക് കോണ്‍ഗ്രസ് ചെലവഴിച്ചത് 71.8 കോടിരൂപ. 2022-23 സാമ്പത്തിക വര്‍ഷത്തില്‍ പാര്‍ട്ടി ചെലവഴിച്ച മൊത്തം തുകയുടെ 15 ശതമാനം ആണിത്. ഈ കാലയളവില്‍ വിവിധ പ്രീ പോള്‍ സര്‍വേകള്‍ക്കായി 40 കോടി രൂപയും കോണ്‍ഗ്രസ് ചെലവഴിച്ചു. കേന്ദ്ര തിരഞ്ഞെടുപ്പ് കമ്മിഷന് കൈമാറിയ ഓഡിറ്റ് റിപ്പോര്‍ട്ടില്‍ ആണ് ഈ കണക്കുകള്‍ വ്യക്തമാക്കിയിരിക്കുന്നത്.
സംഭാവനകള്‍ ഉള്‍പ്പടെ വിവിധ സ്രോതസ്സുകളില്‍നിന്ന് 2022-23 സാമ്പത്തികവര്‍ഷം കോണ്‍ഗ്രസിന് ലഭിച്ചത് 452 കോടി രൂപയാണ്. അതേസമയം 2021 -22 സാമ്പത്തികവര്‍ഷം 541 കോടി രൂപ ലഭിച്ചിരുന്നു. പാര്‍ട്ടിക്ക് ലഭിക്കുന്ന പണം കുറയുകയാണെങ്കിലും, ചെലവില്‍ വര്‍ധനവാണ് ഓഡിറ്റ് റിപ്പോര്‍ട്ടില്‍ ചൂണ്ടിക്കാട്ടിയിരിക്കുന്നത്. 2022-23 സാമ്പത്തിക വര്‍ഷത്തിലെ ചെലവ് 467 കോടി രൂപയാണ്. ഇതിന് തൊട്ട് മുന്‍പത്തെ വര്‍ഷം ചെലവ് 400 കോടി രൂപയായിരുന്നു.
തിരഞ്ഞെടുപ്പ് പ്രവര്‍ത്തനങ്ങള്‍ക്കുള്ള ചെലവ് കുറയ്ക്കുന്നു, സര്‍വേകള്‍ക്ക് പണം ചെലവഴിക്കുന്നു
2022-23 സാമ്പത്തിക വര്‍ഷം തിരഞ്ഞെടുപ്പ് പ്രവര്‍ത്തനങ്ങള്‍ക്ക് കോണ്‍ഗ്രസ് ചെലവഴിച്ചത് 192.5 കോടി രൂപയാണ്. 2021-22 സാമ്പത്തിക വര്‍ഷം പാര്‍ട്ടി തിരഞ്ഞെടുപ്പ് പ്രവര്‍ത്തനങ്ങള്‍ക്ക് ചെലവഴിച്ചത് 279.5 കോടി രൂപയും. എന്നാല്‍ ഈ കാലയളവില്‍ പ്രീ പോള്‍ സര്‍വേകള്‍ക്കായി പാര്‍ട്ടി വന്‍തോതില്‍ പണം ചെലവഴിക്കുന്നു എന്നാണ് കണക്കുകളില്‍നിന്ന് വ്യക്തമാക്കുന്നത്. 2021-22 സാമ്പത്തിക വര്‍ഷം പ്രീ പോള്‍ സര്‍വേകള്‍ക്കായി കോണ്‍ഗ്രസ് ചെലവഴിച്ചത് വെറും 23 ലക്ഷം രൂപ ആയിരുന്നു. എന്നാല്‍ ഈ കഴിഞ്ഞ സാമ്പത്തിക വര്‍ഷം ഇത് 40 കോടി ആയി ഉയര്‍ന്നു.
ഇലക്ടറല്‍ ബോണ്ടിലൂടെ കഴിഞ്ഞ സാമ്പത്തിക വര്‍ഷം കോണ്‍ഗ്രസിന് ലഭിച്ചത് 171 കോടി രൂപയാണ്. തൊട്ട് മുമ്പത്തെ വര്‍ഷം ലഭിച്ചത് 236 കോടി രൂപയും.
Content Highlights: congress spend 71 crore for rahul gandhi first bharat jodo yatra
Published: 01 Feb 2024, 10:05 am IST
Related Topics
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented