ന്യൂഡല്‍ഹി: ലോകവ്യാപകമായി മൈക്രോസോഫ്റ്റിന്റെ ക്ലൗഡ് സേവനങ്ങളിലുണ്ടായ തകരാറിനെ തുടര്‍ന്ന് തങ്ങളുടെ 192 വിമാനസർവീസുകൾ റദ്ദാക്കിയതായി ഇൻഡി​ഗോ. ഫ്ലൈറ്റ് റീബുക്കിങ്ങിനോ റീഫണ്ടിനോയുള്ള ഓപ്ഷൻ താത്ക്കാലികമായി ലഭ്യമല്ല. വിഷയം തങ്ങളുടെ നിയന്ത്രണത്തിന് അതീതമാണെന്നും എയർലൈൻസ് വ്യക്തമാക്കി. 

To advertise here,

റദ്ദാക്കിയ 192 വിമാനങ്ങളുടെ പട്ടിക ഇൻ​ഡി​ഗോ പുറത്തുവിട്ടു. കൊച്ചി, കോഴിക്കോട് അന്താരാഷട്ര വിമാനത്താവളങ്ങളിൽ നിന്നുള്ള സർവീസുകളും ഇതിൽ ഉൾപ്പെടും. കൂടാതെ, വിമാനത്താവളങ്ങളിൽ ചെക്ക് ഇൻ നടപടിക്ക് കാലതാമസമുണ്ടായേക്കാമെന്ന് എർലൈൻസ് അറിയിച്ചു. വിഷയം പരിഹരിക്കാൻ തങ്ങളുടെ ഡിജിറ്റൽ ടീം മൈക്രോസോഫ്റ്റുമായി ചേർന്ന് പ്രവർത്തിക്കുന്നുണ്ടെന്നും ഇൻഡി​ഗോ വ്യക്തമാക്കി. 

ഇൻഡി​ഗോ കൂടാതെ, ആകാശ, സ്പൈസ്ജെറ്റ്, എയര്‍ ഇന്ത്യ എക്‌സ്പ്രസ് തുടങ്ങിയ കമ്പനികളുടെ ചെക്ക്-ഇന്‍ ജോലികളും താറുമാറായി. ബുക്കിങ്, ചെക്ക്-ഇന്‍, റീഫണ്ട് സേവനങ്ങൾക്കാണ് തടസ്സങ്ങൾ നേരിടുന്നത്. യാത്രക്കാരുടെ സമ്മര്‍ദ്ദത്തെ തുടര്‍ന്ന് കമ്പനികൾ പിന്നീട് മാന്വല്‍ ചെക്കിന്‍ നടപടികളിലേക്ക് മാറി.