തമിഴ്‌നാട് മുൻമുഖ്യമന്ത്രിയും സൂപ്പർതാരവുമായിരുന്ന എം.ജി. രാമചന്ദ്രന്റെ ജീവിതം പറയുന്ന ചിത്രത്തിൽ ജയലളിതയുടെ വേഷം അവതരിപ്പിക്കാൻ നടി തൃഷയെ പരിഗണിക്കുന്നതായി റിപ്പോർട്ട്. നടൻ ജെ.എം. ബഷീർ എം.ജി.ആറായി വേഷമിടുന്ന 'പുരട്ചി തലൈവർ എം.ജി.ആർ' എന്ന ചിത്രത്തിൽ മുൻ തമിഴ്‌നാട് മുഖ്യമന്ത്രി കൂടിയായ ജയലളിതയുടെ വേഷത്തിലേക്കാണ് നടിയെ പരിഗണിക്കുന്നത്. സംവിധായകൻ ഉൾപ്പെടെ അണിയറ പ്രവർത്തകർ ആരെന്ന് പ്രഖ്യാപിച്ചിട്ടില്ലാത്ത ചിത്രത്തിന്റെ ഷൂട്ടിങ് ഉടൻ ആരംഭിക്കുമെന്ന് ജെ.എം. ബഷീറിനെ ഉദ്ധരിച്ച് തമിഴ് ദിനപത്രം ദിനമലർ റിപ്പോർട്ട് ചെയ്തു.

To advertise here,

ചിത്രത്തിൽ ജയലളിതയുടെ വേഷത്തിനായി തൃഷയുമായി ചർച്ചകൾ നടന്നുവരികയാണെന്ന് ബഷീർ പറഞ്ഞു. ജയലളിതയായി തൃഷയെത്തിയാൽ നന്നാവുമെന്ന് നടൻ അഭിപ്രായപ്പെട്ടു. തന്റെ മകളും തൃഷയും സുഹൃത്തുക്കളാണ്. ഇരുവരും ഒരു സിനിമയിൽ ഒന്നിച്ചു പ്രവർത്തിക്കുന്നുണ്ടെന്നും ബഷീർ കൂട്ടിച്ചേർത്തു.

ചെന്നൈ രാമപുരത്ത് ചിത്രത്തിന്റെ ഷൂട്ടിങ് ഉടൻ ആരംഭിക്കുമെന്ന് നടൻ അറിയിച്ചു. സംവിധായകനെയും സംഗീതസംവിധായകനെയും ഉടൻ പ്രഖ്യാപിക്കും. സി.എൻ. അണ്ണാദുരൈ, എം. കരുണാനിധി തുടങ്ങിയ രാഷ്ട്രീയനേതാക്കളുടെ കഥാപാത്രങ്ങളും ചിത്രത്തിൽ ഉണ്ടായിരിക്കുമെന്നും ബഷീർ കൂട്ടിച്ചേർത്തു.

എം.ജി.ആറിന്റെ സിനിമാജീവിതവും രാഷ്ട്രീയയാത്രയുമാണ് പ്രമേയം. അതേസമയം, ജയലളിതയായി അഭിനയിക്കാൻ തൃഷ സമ്മതിച്ചോ എന്നതിൽ ഔദ്യോഗിക സ്ഥിരീകരണമില്ല. 2017-ൽ ആരാധകരുടെ ചോദ്യത്തിന് മറുപടി നൽകവെ, ജീവചരിത്ര സിനിമയിൽ അഭിനയിക്കാൻ അവസരം ലഭിച്ചാൽ ജയലളിതയുടെ കഥാപാത്രം തിരഞ്ഞെടുക്കുമെന്ന് തൃഷ അഭിപ്രായപ്പെട്ടിരുന്നു.