നിതീഷ് തിവാരി സംവിധാനം ചെയ്യുന്ന 'രാമായണ'ത്തിൽ സായ് പല്ലവിയുടെ സീതാദേവിയായുള്ള ലുക്കിനെതിരെ ഉയർന്ന വിമർശനങ്ങൾക്കും ട്രോളുകൾക്കും മറുപടിയുമായി ചിത്രത്തിൽ നടി സുരഭി ദാസ്. അസമീസ് നടിയായ സുരഭി ചിത്രത്തിൽ ശത്രുഘ്നന്റെ പത്നിയായ ശ്രുതകീർത്തിയുടെ വേഷമാണ് കൈകാര്യം ചെയ്യുന്നത്.

To advertise here,

സിനിമയുടെ ട്രെയിലർ പുറത്തുവന്നതിന് പിന്നാലെ, സായ് പല്ലവിയുടെ സീത, ലാറ ദത്തയുടെ കൈകേയി തുടങ്ങിയ കഥാപാത്രങ്ങളുടെ വസ്ത്രധാരണം 'മോഡേൺ' ആണെന്നും ത്രേതായുഗത്തിലെ കഥയ്ക്ക് അനുയോജ്യമല്ലെന്നും ചൂണ്ടിക്കാട്ടി വിമർശനങ്ങൾ ഉയർന്നിരുന്നു.

ഒരു ഇംഗ്ലീഷ് മാധ്യമത്തിന് നൽകിയ അഭിമുഖത്തിലാണ് സുരഭി തന്റെ നിലപാട് വ്യക്തമാക്കിയത്. 'എല്ലാവരെയും ഒരുപോലെ സന്തോഷിപ്പിക്കാൻ കഴിയില്ല,' എന്ന് സുരഭി പറഞ്ഞു.

'ആളുകൾ എപ്പോഴും എന്തെങ്കിലും കുറവുകൾ കണ്ടുപിടിച്ചുകൊണ്ടിരിക്കും. ഞങ്ങൾ സീതയ്ക്ക് ബ്ലൗസ് ധരിപ്പിച്ചില്ലായിരുന്നുവെങ്കിലും ആളുകൾ വിമർശിക്കുമായിരുന്നു. ഇപ്പോൾ ബ്ലൗസ് ധരിപ്പിച്ചപ്പോഴും പ്രശ്‌നമാണ്. രാമായണം പോലൊരു വലിയ സിനിമ ചെയ്യുമ്പോൾ എല്ലാവരും നമ്മളോട് യോജിക്കണമെന്ന് പ്രതീക്ഷിക്കാനാവില്ല. എല്ലാം പൂർണമാണെന്ന് ഞാൻ പറയുന്നില്ല, എങ്കിലും ദയവായി ചിത്രം തീയേറ്ററുകളിൽ വരുന്നത് വരെ കാത്തിരിക്കൂ. അപ്പോഴേ അണിയറപ്രവർത്തകർ എന്താണ് ഒരുക്കിയിരിക്കുന്നതെന്ന് വ്യക്തമാകൂ,' സുരഭി വ്യക്തമാക്കി.

നേരത്തെ, ചിത്രത്തിന്റെ കോസ്റ്റ്യൂം ഡിസൈനർമാരായ റിംപിൾ, ഹർപ്രീത് നരൂള എന്നിവരും വിമർശനങ്ങൾക്കെതിരെ രംഗത്തുവന്നിരുന്നു. ചിത്രം കണ്ടതിനുശേഷം മാത്രം അഭിപ്രായം പറയണമെന്നായിരുന്നു അവരുടെയും അഭ്യർഥന.

രൺബീർ കപൂർ ശ്രീരാമനായി എത്തുന്ന ചിത്രത്തിൽ യഷ് രാവണനെ അവതരിപ്പിക്കുന്നു. 4000 കോടി രൂപയോളം ബജറ്റിൽ നിർമിക്കുന്ന ചിത്രത്തിന്റെ ആദ്യ ഭാഗം ദീപാവലി റിലീസായി തീയേറ്ററുകളിലെത്തും.