ജാൻവി കപൂർ, സിദ്ധാർത്ഥ് മൽഹോത്ര എന്നിവർ മുഖ്യവേഷങ്ങളിലെത്തുന്ന ചിത്രമാണ് പരം സുന്ദരി. ഉത്തരേന്ത്യക്കാരനായ യുവാവും മലയാളിയായ യുവതിയും തമ്മിലുള്ള പ്രണയവും ഇതിനിടയിൽ വരുന്ന സംഘർഷങ്ങളുമെല്ലാമാണ് ചിത്രം പറയുന്നതെന്നാണ് കഴിഞ്ഞദിവസം പുറത്തിറങ്ങിയ ടീസർ നൽകിയ സൂചന. ടീസറിലെ മോഹൻലാൽ റെഫറൻസ് ആരാധകർ ഏറ്റെടുത്തിരുന്നു. എന്നാൽ മറിച്ചുള്ള ചില സംഭവവികാസങ്ങളും ഇതിനൊപ്പം അരങ്ങേറുന്നുണ്ട്.
രസകരമായ ടീസർ ആണെങ്കിലും മലയാളി പെൺകുട്ടിയായുള്ള ജാൻവിയുടെ പ്രകടനം അത്രപോരാ എന്നാണ് വിമർശകർ പറയുന്നത്. അതിന് കാരണമായി അവർ ചൂണ്ടിക്കാട്ടുന്നതാകട്ടെ ജാൻവിയുടെ മലയാളം സംഭാഷണങ്ങളും. 'ട്രെയ്ലറിൽ ജാൻവി സ്വന്തം പേര് പറയുന്ന ഡയലോഗുകൾ വ്യക്തമല്ല', 'മറ്റുഭാഷകളെ ബോളിവുഡ് സിനിമകളിൽ അവതരിപ്പിക്കുന്ന സ്ഥിരം ശൈലി', 'ഒരു മലയാളിയായി നടിയെ സങ്കൽപ്പിക്കാൻ കഴിയുന്നില്ല' എന്നെല്ലാമാണ് കമന്റുകൾ.
ചെന്നൈ എക്സ്പ്രസിലെ മീനമ്മയ്ക്കും കേരള സ്റ്റോറിയിലെ ശാലിനി ഉണ്ണികൃഷ്ണനും ഒത്ത എതിരാളിയാകും ഈ സിനിമയിലെ ജാൻവിയുടെ സുന്ദരി എന്നാണ് മറ്റൊരു വിഭാഗം അഭിപ്രായപ്പെടുന്നത്.
മാഡോക് ഫിലിംസിന്റെ ബാനറിൽ ദിനേഷ് വിജനാണ് പരം സുന്ദരിയുടെ നിർമാണം. തുഷാർ ജലോട്ടയാണ് സംവിധാനം. രഞ്ജി പണിക്കർ, സിദ്ധാർത്ഥ ശങ്കർ, മൻജോത് സിംഗ്, സഞ്ജയ് കപൂർ, ഇനായത്ത് വർമ എന്നിവരാണ് പ്രധാനതാരങ്ങൾ. അർഷ് വോറ, തുഷാർ ജലോട്ട എന്നിവർ ചേർന്നാണ് തിരക്കഥ രചിച്ചിരിക്കുന്നത്. അമിതാഭ് ഭട്ടാചാര്യയുടെ വരികൾക്ക് സച്ചിൻ ജിഗർ ഈണമിട്ടിരിക്കുന്നു. സന്താന കൃഷ്ണൻ രവിചന്ദ്രനാണ് ഛായാഗ്രഹണം.
Content Highlights: "Param Sundari" Teaser Sparks Debate: Janhvi Kapoor's Malayalam Accent Under Scrutiny
Published: 13 Aug 2025, 09:45 pm IST
Related Topics
മാതൃഭൂമി.കോം വാട്സാപ്പിലും
വാര്ത്തകളോടു പ്രതികരിക്കുന്നവര് അശ്ലീലവും അസഭ്യവും നിയമവിരുദ്ധവും അപകീര്ത്തികരവും സ്പര്ധ വളര്ത്തുന്നതുമായ പരാമര്ശങ്ങള് ഒഴിവാക്കുക. വ്യക്തിപരമായ അധിക്ഷേപങ്ങള് പാടില്ല. ഇത്തരം അഭിപ്രായങ്ങള് സൈബര് നിയമപ്രകാരം ശിക്ഷാര്ഹമാണ്. വായനക്കാരുടെ അഭിപ്രായങ്ങള് വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..



Most Commented