കൊച്ചി: ഫ്‌ളാറ്റിൽ അതിക്രമിച്ചുകയറി ലൈംഗികാതിക്രമം നടത്തിയെന്ന നടിയുടെ പരാതിയിൽ 'മഞ്ഞുമ്മൽ ബോയ്സ്' സംവിധായകൻ ചിദംബരത്തിന് (ചിദംബരം എസ്. പൊതുവാൾ) മുൻകൂർ ജാമ്യം. എറണാകുളം ടൗൺ സൗത്ത് പോലീസ് രജിസ്റ്റർ ചെയ്ത ക്രിമിനൽ കേസിൽ എറണാകുളം സെഷൻസ് കോടതിയാണ് മുൻകൂർ ജാമ്യം അനുവദിച്ചത്. സെഷൻസ് ജഡ്ജി കെ.കെ. ബാലകൃഷ്ണൻ ആണ് ജാമ്യം അനുവദിച്ചത്.
ഇന്ത്യൻ പീനൽ കോഡിലെ 354, 354A(1)(i), 509 എന്നീ വകുപ്പുകൾ പ്രകാരം രജിസ്റ്റർ ചെയ്ത കേസിലാണ് ജാമ്യം. 2022 മേയ് മാസത്തിലാണ് കേസിനാസ്പദമായ സംഭവം.
മുൻകൂർ ജാമ്യാപേക്ഷയിൽ ചിദംബരം ആരോപണങ്ങൾ നിഷേധിച്ചു. സിനിമയുടെ നിർമാണ സമയത്തുണ്ടായ പൂർണ്ണമായും പ്രൊഫഷണൽ സ്വഭാവമുള്ള ഇടപെടലുകളാണ് നടിയുമായി ഉണ്ടായിരുന്നത്. നാലുവർഷം വൈകിയാണ് പരാതി. തന്റെ പ്രതിച്ഛായ തകർക്കാനുള്ള ശ്രമത്തിന്റെ ഭാഗമായാണ് ആരോപണങ്ങളെന്നും പ്രതിഭാഗം വാദിച്ചു.
സംഭവം റിപ്പോർട്ട് ചെയ്യുന്നതിലെ താമസം, അന്വേഷണ ഉദ്യോഗസ്ഥന്റെ റിപ്പോർട്ടിൽ പരാതിക്കാരി അന്വേഷണവുമായി സഹകരിക്കുന്നില്ലെന്നുള്ള പരാമർശം, ചിദംബരത്തിനേ കുറിച്ച് മാധ്യമങ്ങളിൽ അപകീർത്തികരമായ ഉള്ളടക്കം പ്രസിദ്ധീകരിക്കുന്നത് തടയുന്ന ബോംബെ ഹൈക്കോടതിയുടെ ഇടക്കാല ഉത്തരവ് എന്നിവ പരിഗണിച്ചാണ് കോടതി ജാമ്യമനുവദിച്ചത്. അഡ്വ. ചിത്ര രേന്തല ആണ് ചിദംബരത്തിന് വേണ്ടി ഹാജരായത്.
Content Highlights: Chidambaram granted anticipatory bail by Ernakulam Sessions Court. Allegations involve incidents from May 2022 regarding sexual assault. Defense claims allegations are an attempt to damage his professional reputation. Court considered the four-year delay in filing the complaint and lack of cooperation with investigators
Published: 09 Mar 2026, 11:30 am IST
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented