മികച്ച നടനുള്ള ദേശീയ പുരസ്കാരം നാലാം തവണയും ഏറ്റുവാങ്ങി മലയാളികളുടെ പ്രിയനടൻ മമ്മൂട്ടി. ചൊവ്വാഴ്ച ഗുജറാത്തിലെ ഏക്താ നഗറിൽ (കെവാഡിയ) നടന്ന 72-ാമത് ദേശീയ ചലച്ചിത്ര പുരസ്‌കാര ചടങ്ങിൽ രാഷ്ട്രപതി ദ്രൗപദി മുർമുവിൽനിന്നാണ് അദ്ദേഹം പുരസ്‌കാരം ഏറ്റുവാങ്ങിയത്. ചന്തു ചാമ്പ്യൻ എന്ന ചിത്രത്തിലെ പ്രകടനത്തിന് കാർത്തിക് ആര്യനൊപ്പം മമ്മൂട്ടി മികച്ച നടനുള്ള പുരസ്‌കാരം പങ്കിടുകയായിരുന്നു. ആദ്യ ദേശീയ പുരസ്‌കാരം നേടി മൂന്ന് പതിറ്റാണ്ടിലേറെ പിന്നിടുമ്പോഴാണ് മമ്മൂട്ടിയെ തേടി ഈ പുതിയ നേട്ടമെത്തിയത്.

To advertise here,

ദേശീയ തലത്തിൽ അംഗീകരിക്കപ്പെടുന്നത് ഏതൊരു കലാകാരനും പ്രചോദനമാണെന്നും തന്റെ നാലാമത്തെ ദേശീയ പുരസ്‌കാരം ലഭിച്ചതിൽ വലിയ ഭാഗ്യവാനാണെന്ന് കരുതുന്നുവെന്നും മമ്മൂട്ടി പ്രതികരിച്ചു. ഇത് തനിക്ക് പിന്നിൽ അണിനിരന്ന സംവിധായകർ, സാങ്കേതിക പ്രവർത്തകർ, സഹനടന്മാർ, നിർമ്മാതാക്കൾ, ആസ്വദിച്ച പ്രേക്ഷകർ എന്നിവരുൾപ്പെടുന്ന വലിയൊരു സംഘത്തോടൊപ്പമുള്ള നീണ്ട യാത്രയാണെന്ന് അദ്ദേഹം ഓർമ്മിച്ചു. ഇത്രയും കാലം ആളുകളെ രസിപ്പിക്കാൻ കഴിഞ്ഞതിൽ സന്തോഷമുണ്ടെന്നും, ഇനിയും അത് തുടരാൻ കഠിനാധ്വാനം ചെയ്യുമെന്ന് ഉറപ്പുനൽകുന്നുവെന്നും അദ്ദേഹം കൂട്ടിച്ചേർത്തു.

കഥാപാത്രങ്ങൾക്കായി തയ്യാറെടുക്കുന്ന രീതിയെക്കുറിച്ചും മമ്മൂട്ടി സംസാരിച്ചു. സെറ്റിലേക്ക് പോകുന്നതിന് മുൻപ് താൻ വലിയ രീതിയിലുള്ള തയ്യാറെടുപ്പുകൾ ഒന്നും നടത്താറില്ലെന്ന് അദ്ദേഹം വ്യക്തമാക്കി. തന്നെ പുരസ്കാരത്തിനർഹനാക്കിയ ഭ്രമയുഗം എന്ന ചിത്രത്തേക്കുറിച്ച് മമ്മൂട്ടി എടുത്തുപറഞ്ഞു. കഥാപാത്രത്തെക്കാൾ ഉപരി തിരക്കഥ നോക്കിയാണ് സിനിമ തിരഞ്ഞെടുക്കുന്നതെന്നും അഭിനയിക്കുന്നതിന് മുൻപ് വലിയ രീതിയിലുള്ള തയ്യാറെടുപ്പുകൾ നടത്താറില്ലെന്നും മമ്മൂട്ടി വ്യക്തമാക്കി. മേക്കപ്പ്മാനോടും കോസ്റ്റ്യൂമറോടുമൊപ്പം അരമണിക്കൂറോളം ഇരുന്നാണ് കൊടുമൺ പോറ്റി എന്ന കഥാപാത്രത്തിന്റെ രൂപത്തിലേക്ക് എത്തിയത്. അതിനായി സംവിധായകനും മേക്കപ്പ് ടീമിനും കോസ്റ്റ്യൂമർക്കും ക്യാമറാമാനും നന്ദി പറയുന്നതായും അദ്ദേഹം കൂട്ടിച്ചേർത്തു.

"ഞാൻ കഥാപാത്രത്തേക്കാൾ തിരക്കഥയാണ് തിരഞ്ഞെടുത്തത്. വലിയ തയ്യാറെടുപ്പുകൾ ഒന്നും എനിക്കില്ല. ചിത്രീകരണത്തിന്റെ ആദ്യ ദിവസം സെറ്റിൽ എത്തുമ്പോൾ എനിക്ക് എന്തോ ഒന്ന് ലഭിക്കുന്നു. അതൊരു മാന്ത്രികവിദ്യയാണോ എന്ന് എനിക്കറിയില്ല. ഞാൻ സ്വന്തമായി മാജിക്കൊന്നും ചെയ്യാറില്ല. എങ്കിലും എന്തോ ഒന്ന് എന്റെ വഴിയെ വരുന്നു, ഭാഗ്യവശാൽ ഞാൻ അത് നിലനിർത്തുന്നു, അങ്ങനെ അത് സംഭവിക്കുന്നു. ഭ്രമയുഗം ഒരു ബ്ലാക്ക് ആൻഡ് വൈറ്റ് സിനിമയാണ്. ഒരുപക്ഷേ അത്തരത്തിലുള്ള എന്റെ ആദ്യത്തെ ചിത്രം. വളരെക്കാലം മുമ്പ് ഞാൻ ഒരു ബ്ലാക്ക് ആൻഡ് വൈറ്റ് സിനിമയിൽ അതിഥി വേഷം ചെയ്തിട്ടുണ്ട്." മമ്മൂട്ടിയുടെ വാക്കുകൾ.

രാഹുൽ സദാശിവൻ സംവിധാനംചെയ്ത് 2024-ൽ പുറത്തിറങ്ങിയ ചിത്രമാണ് ഭ്രമയുഗം. അർജുൻ അശോകൻ, സിദ്ധാർത്ഥ് ഭരതൻ, അമൽഡ ലിസ് എന്നിവരും മമ്മൂട്ടിക്കൊപ്പം വേഷമിട്ടു. 17-ാം നൂറ്റാണ്ടിലെ കേരള പശ്ചാത്തലത്തിൽ ഒരുക്കിയ ഈ ചിത്രം ഫോക്ക് ഹോർർ, മിത്തോളജി, നാടോടിക്കഥകൾ സമന്വയിപ്പിച്ചാണ് ചിത്രം ഒരുക്കിയത്. ചിത്രത്തിന്റെ ഛായാഗ്രാഹകനായ ഷെഹ്നാദ് ജലാലിനും ഇത്തവണ ദേശീയ പുരസ്കാരമുണ്ട്.
Also Read: വിജയങ്ങളുടെ കൊടുമുടിയിൽ നിൽക്കുമ്പോഴും അതിൽ മയങ്ങാത്ത പ്രതിഭ, അദ്ഭുതമാണ് മമ്മൂട്ടി -പ്രേംകുമാർമമ്മൂട്ടിയുടെ നാലാം ദേശീയ പുരസ്കാര നേട്ടം

ആദ്യ ദേശീയ പുരസ്കാരം ലഭിച്ച് മൂന്ന് പതിറ്റാണ്ടുകൾക്ക് ശേഷമാണ് ഈ പുതിയ അംഗീകാരം തേടിയെത്തുന്നത്. 1990-ൽ 'മതിലുകൾ', 'ഒരു വടക്കൻ വീരഗാഥ' എന്നീ ചിത്രങ്ങളിലെ പ്രകടനങ്ങൾക്കാണ് അദ്ദേഹത്തിന് ആദ്യമായി ഈ പുരസ്കാരം ലഭിച്ചത്. നാല് വർഷത്തിന് ശേഷം 'പൊന്തൻ മാട', 'വിധേയൻ' എന്നീ ചിത്രങ്ങളിലൂടെ അദ്ദേഹം വീണ്ടും പുരസ്കാരം നേടി. തുടർന്ന് 'ഡോ. ബാബാസാഹെബ് അംബേദ്കർ' എന്ന ചിത്രത്തിൽ ഡോ. ബി.ആർ. അംബേദ്കറെ അവതരിപ്പിച്ചതിലൂടെ അദ്ദേഹത്തെ തേടി മൂന്നാംതവണയും മികച്ച നടനുള്ള പുരസ്കാരമെത്തി. 2025-ൽ ഭ്രമയുഗത്തിലെ അഭിനയത്തിന് മമ്മൂട്ടിക്ക് മികച്ച നടനുള്ള കേരള സംസ്ഥാന ചലച്ചിത്ര പുരസ്കാരവും ലഭിച്ചിരുന്നു.

72-ാമത് ദേശീയ ചലച്ചിത്ര പുരസ്കാരങ്ങൾ

2024-ലെ സിനിമകളെ മുൻനിർത്തി ഏർപ്പെടുത്തിയ 72-ാമത് ദേശീയ ചലച്ചിത്ര പുരസ്കാരങ്ങൾ 2026 ജൂലൈയിലാണ് പ്രഖ്യാപിച്ചത്. 'ആർട്ടിക്കിൾ 370' മികച്ച ഫീച്ചർ ചിത്രമായി തിരഞ്ഞെടുക്കപ്പെട്ടപ്പോൾ, അതേ ചിത്രത്തിലെ അഭിനയത്തിന് യാമി ഗൗതം മികച്ച നടിക്കുള്ള പുരസ്കാരം നേടി. 'അമരൻ' എന്ന ചിത്രത്തിലൂടെ രാജ്കുമാർ പെരിയസാമി മികച്ച സംവിധായകനുള്ള പുരസ്കാരം സ്വന്തമാക്കി. മികച്ച ജനപ്രിയ ചിത്രത്തിനുള്ള പുരസ്കാരം 'കൽക്കി 2898 എഡി' നേടി. സംവിധായകൻ ജയരാജ് ആയിരുന്നു ജൂറി ചെയർമാൻ.