
ബെംഗളൂരു: ചിക്കമഗളൂരുവിലെ ക്ഷേത്രത്തില് യന്ത്ര ആനയെ സമര്പ്പിച്ച് ബോളിവുഡ് നടി ശില്പാ ഷെട്ടി. രംഭാപുരി മഠത്തിലെ ജഗദ്ഗുരു രേണുകാചാര്യാ ക്ഷേത്രത്തിലാണ് ജീവന്തുടിക്കുന്ന യന്ത്രയാനയെ സമര്പ്പിച്ചത്. ആഘോഷങ്ങള്ക്ക് ആനയെ വാടകയ്ക്കെടുക്കേണ്ടെന്ന് തീരുമാനിച്ച ക്ഷേത്രമാണിത്. വീരഭദ്ര എന്നു പേരിട്ട യന്ത്ര ആനയ്ക്ക് മൂന്നുമീറ്റര് ഉയരവും 800 കിലോ തൂക്കവുമുണ്ട്.
പത്തുലക്ഷം രൂപ ചെലവില് റബ്ബര്, ഫൈബര്, സ്റ്റീല് തുടങ്ങിയവ ഉപയോഗിച്ചാണ് നിര്മിച്ചത്. ജീവനുള്ള ആനയെപ്പോലെ ഇത് കണ്ണുകള് അടയ്ക്കുകയും തുറക്കുകയും ചെയ്യും. വലിയ ചെവികള് ആട്ടും തലയും തുമ്പിക്കൈയും വാലും ഇളക്കും.
മൃഗസംരക്ഷണ രംഗത്ത് പ്രവര്ത്തിക്കുന്ന പെറ്റയും (പീപ്പിള് ഓഫ് എത്തിക്കല് ട്രീറ്റ്മെന്റ് ഓഫ് ആനിമല്സ്) ബെംഗളൂരുവിലെ സന്നദ്ധ സംഘടനയായ ക്യുപയുമാണ് (കമ്പാഷനേറ്റ് അണ്ലിമിറ്റഡ് പ്ലസ് ആക്ഷന്) യന്ത്രയാനയെ സമര്പ്പിക്കാന് വഴിയൊരുക്കിയത്.
ശ്രീമദ് രംഭാപുരി വീരരുദ്രമുനി ജഗദ്ഗുരുവിന്റെ ജന്മശതാബ്ദിയോടനുബന്ധിച്ചാണ് ആനയെ സമര്പ്പിച്ചത്. മംഗളവാദ്യാവതരണവുമുണ്ടായി. സമര്പ്പണച്ചടങ്ങില് വനംവകുപ്പു മന്ത്രി ഈശ്വര് ഖാന്ഡ്രെ, ഊര്ജവകുപ്പുമന്ത്രി കെ.ജെ. ജോര്ജ്, മഠാധിപതി രംഭാപുരി ജഗദ്ഗുരു എന്നിവര് സംബന്ധിച്ചു.
ഇതോടെ ദക്ഷിണേന്ത്യയിലെ പത്ത് ക്ഷേത്രങ്ങളില് യന്ത്ര ആനകളായെന്ന് 'പെറ്റ' അറിയിച്ചു. തൃശ്ശൂരിലെ ഇരിഞ്ഞാടപ്പള്ളി ശ്രീകൃഷ്ണക്ഷേത്രത്തില് നടി പാര്വതി തിരുവോത്ത് യന്ത്ര ആനയെ സംഭാവന നല്കിയിരുന്നു.
Content Highlights: actress shilpa shetty donates robot elephant to temple
Published: 17 Dec 2024, 09:04 am IST
Related Topics
മാതൃഭൂമി.കോം വാട്സാപ്പിലും
വാര്ത്തകളോടു പ്രതികരിക്കുന്നവര് അശ്ലീലവും അസഭ്യവും നിയമവിരുദ്ധവും അപകീര്ത്തികരവും സ്പര്ധ വളര്ത്തുന്നതുമായ പരാമര്ശങ്ങള് ഒഴിവാക്കുക. വ്യക്തിപരമായ അധിക്ഷേപങ്ങള് പാടില്ല. ഇത്തരം അഭിപ്രായങ്ങള് സൈബര് നിയമപ്രകാരം ശിക്ഷാര്ഹമാണ്. വായനക്കാരുടെ അഭിപ്രായങ്ങള് വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..


Most Commented