മലയാളത്തിൽ ആരംഭിച്ച് തമിഴും തെലുങ്കും കടന്ന് ബോളിവുഡിലെത്തിയ നടിയാണ് അസിൻ. 2016-ൽ മൈക്രോ മാക്സ് മൊബൈൽ ഫോൺ കമ്പനി സഹ സ്ഥാപകൻ രാഹുലിനെ വിവാഹം ചെയ്തശേഷം അസിൻ സിനിമയിൽ അഭിനയിച്ചിട്ടില്ല. കഴിഞ്ഞദിവസം അസിൻ പൊടുന്നനേ വാർത്തകളിൽ നിറഞ്ഞു. രാഹുലുമായി നടി വേർപിരിയുന്നു എന്ന വാർത്തകളായിരുന്നു അതിന് കാരണം. 

To advertise here,

അസിന്റെ ഔദ്യോ​ഗിക ഇൻസ്റ്റാ​ഗ്രാം അക്കൗണ്ടിൽ നിന്ന് രാഹുലിനൊപ്പം നിൽക്കുന്ന ചിത്രങ്ങൾ കൂട്ടത്തോടെ അപ്രത്യക്ഷമായതാണ് വേർപിരിയൽ അഭ്യൂഹം ശക്തമാവാൻ കാരണം. ഇരുവരുടേയും വിവാഹചിത്രങ്ങളും ഇതിൽ ഉൾപ്പെടുന്നു എന്നതും ഈ പ്രചാരണത്തിന് ശക്തിയേകി. ബോളിവുഡ് നടൻ റിഷി കപൂർ അന്തരിച്ച വേളയിൽ പോസ്റ്റ് ചെയ്ത ഒരു ചിത്രം മാത്രമാണ് അസിനും രാഹുലും ഒരുമിച്ചുനിൽക്കുന്നതായി ഇൻസ്റ്റാ​ഗ്രാമിലുള്ളത്. വാർത്ത പരന്നതോടെ വിശദീകരണവുമായി അസിൻ തന്നെ രം​ഗത്തെത്തിയിരിക്കുകയാണ്.

താൻ കുടുംബവുമൊത്ത് ഒരു അവധിക്കാലയാത്രയിലാണെന്നാണ് അസിൻ ഇൻസ്റ്റാ​ഗ്രാം സ്റ്റോറിയിൽ എഴുതിയത്. പ്രചരിക്കുന്ന വാർത്തകളെല്ലാം അടിസ്ഥാന​രഹിതമാണ്. ഈ വാർത്ത നശിപ്പിച്ചുകളഞ്ഞ അഞ്ച് മിനിറ്റ് ഒഴിച്ചുനിർത്തിയാൽ അവധിയാഘോഷം ​ഗംഭീരമായിരുന്നെന്നും അസിൻ കൂട്ടിച്ചേർത്തു.

2001-ൽ സത്യൻ അന്തിക്കാട് സംവിധാനം ചെയ്ത നരേന്ദ്രൻ മകൻ ജയകാന്തൻ വക എന്ന ചിത്രത്തിലൂടെയാണ് അസിൻ സിനിമാരം​ഗത്തെത്തിയത്. എം.കുമരൻ സൺ ഓഫ് മഹലാക്ഷ്മിയിലൂടെ തമിഴ് സിനിമയിലും അസിൻ ചുവടുറപ്പിച്ചു. കമൽ ഹാസൻ, വിജയ്, അജിത്, സൂര്യ, പ്രഭാസ്, രവിതേജ, നാ​ഗാർജുന, പവൻ കല്യാൺ, ആമിർ ഖാൻ, അക്ഷയ് കുമാർ തുടങ്ങി തമിഴിലേയും തെലുങ്കിലേയും ഹിന്ദിയിലേയും സൂപ്പർതാരങ്ങൾക്കൊപ്പം അസിൻ വേഷമിട്ടു. അരിൻ ആണ് അസിന്റേയും രാഹുലിന്റേയും മകൾ.