അമ്മയുടെ മടങ്ങിവരവും മകളുടെ അരങ്ങേറ്റവും; 'മാലിക്കി'ലെ ജമീലയുടെ രണ്ടു മുഖങ്ങള്‍

Jalaja and daughter Devi

'ഒരു വട്ടം കൂടിയെന്‍ ഓര്‍മകള്‍ മേയുന്ന തിരുമുറ്റത്ത്....'

സിനിമ വല്ലാതെ മാറി. ഞാന്‍ പഴയ ആളല്ലേ... പുതിയ കുട്ടികള്‍ക്കൊപ്പം ഓടിയെത്താന്‍ സാധിക്കുമോ എന്നൊക്കെ ഞാന്‍ വിചാരിച്ചു. പക്ഷേ, സെറ്റിലെത്തിയപ്പോള്‍ എന്റെ ആശങ്കകള്‍ അകന്നു. ഫഹദിന്റെ കഥാപാത്രത്തിന്റെ അമ്മ വേഷമാണ്. ഏറെ വെല്ലുവിളി നിറഞ്ഞ കഥാപാത്രമായിരുന്നു ജമീല ടീച്ചര്‍. എനിക്ക് പരിചിതമല്ലാത്ത സാമൂഹ്യപശ്ചാത്തലവും ഭാഷയും. പക്ഷേ മഹേഷും മറ്റുള്ളവരും നല്‍കിയ പിന്തുണകൊണ്ട് നന്നായി ചെയ്യാന്‍ സാധിച്ചുവെന്ന് തോന്നുന്നു. 

കാത്തിരുന്നത് ശക്തമായ വേഷം

നാട്ടിലെത്തിയതിന് ശേഷം എനിക്ക് സിനിമയില്‍നിന്ന് നേരത്തേയും അവസരങ്ങള്‍ വന്നിരുന്നു. പക്ഷേ, ഒന്നും ചെയ്യാന്‍ തോന്നിയില്ല. തിരിച്ചുവരികയാണെങ്കില്‍ ശക്തമായ ഒരു വേഷം ചെയ്യണം അല്ലെങ്കില്‍ വേണ്ട എന്നാണ് ഞാന്‍ കരുതിയത്. മാലിക്കിന്റെ കഥ കേട്ടപ്പോള്‍ ഇതാണ് പറ്റിയ സമയമെന്ന് തോന്നി. മഹേഷിനായിരുന്നു എന്നെ തിരികെ കൊണ്ടുവരാനുള്ള നിയോഗം.

'യവനിക'യിലെ രോഹിണി

ഞാന്‍ ചെയ്ത കഥാപാത്രങ്ങളെ പ്രത്യേകിച്ചും, 'യവനിക'യിലെ രോഹിണിയെ ഇപ്പോഴും പ്രേക്ഷകര്‍ ഓര്‍ത്തിരിക്കുന്നത് എന്നെ സംബന്ധിച്ച് ഏറ്റവും വലിയ ഭാഗ്യമായി കരുതുന്നു. 'മാലിക്കി'ല്‍ അഭിനയിക്കാന്‍ ചെന്നപ്പോള്‍, നിമിഷ സജയന്‍ എന്നോട് ആദ്യം പറഞ്ഞത് രോഹിണിയെക്കുറിച്ചാണ്. എന്റെ പല സിനിമകളും പുറത്തിറങ്ങിയ കാലത്ത് ഈ കുട്ടികളൊന്നും ജനിച്ചിട്ടു കൂടിയില്ല. പക്ഷേ, അവര്‍ അത് കാണുകയും ആസ്വദിക്കുകയും ചെയ്യുന്നു എന്നറിയുമ്പോള്‍ വലിയ അഭിമാനമാണ് തോന്നുന്നത്.

ഞാന്‍ ഫ്‌ലാറ്റിലാണ് താമസിക്കുന്നത്. വൈകുന്നേരങ്ങളില്‍ അവിടെ താമസിക്കുന്ന സുഹൃത്തുക്കള്‍പ്പൊപ്പം നടക്കാനും സംസാരിക്കാനുമൊക്കെ പോകും. ആ ചര്‍ച്ചകളിലും 'യവനിക'യും 'ഉള്‍ക്കടലു'മൊക്കെ എങ്ങനെയോ കടന്നുവരും. എന്നെ സംബന്ധിച്ച് വളരെ സന്തോഷം നല്‍കുന്ന കാര്യങ്ങളാണവ.

Content Highlights: Actor Jalaja Interview about Malik Movie daughter devi debut, Mahesh Narayanan, Fahadh Faasil, Malik Review