നടപ്പ് സാമ്പത്തിക വർഷം എയർ ഇന്ത്യ റെക്കോഡ് നഷ്ടം രേഖപ്പെടുത്തിയേക്കും. അഹമ്മദാബാദ് വിമാന അപകടവും ഭൗമരാഷ്ട്രീയ സംഘർഷങ്ങളും പാകിസ്താൻ വ്യോമപാത അടച്ചതുമാണ് തിരിച്ചടിയായത്. ടാറ്റ ഗ്രൂപ്പിന്റെയും സിങ്കപ്പൂർ എയർലൈൻസിന്റെയും സംയുക്ത സംരംഭമായ എയർ ഇന്ത്യക്ക് ഈ വർഷം 15,000 കോടി രൂപയുടെ അറ്റനഷ്ടമാണ് പ്രതീക്ഷിക്കുന്നത്. നിലവിലെ പ്രതിസന്ധിക്കിടെ മാനേജുമെന്റ് സമർപ്പിച്ച അഞ്ചുവർഷം നീളുന്ന പുനരുദ്ധാരണ പദ്ധതി എയർ ഇന്ത്യ ബോർഡ് നിരസിച്ചിരുന്നു. പുതിയ സിഇഒയെ കണ്ടെത്താനുള്ള ശ്രമത്തിലാണ് ടാറ്റ ഗ്രൂപ്പ്.

To advertise here,

അഹമ്മദാബാദ് വിമാനാപകടം

എയർ ഇന്ത്യയുടെ സാമ്പത്തിക തകർച്ചയ്ക്ക് പ്രധാന കാരണമായത് കഴിഞ്ഞ ജൂണിലുണ്ടായ ഡ്രീലൈനർ വിമാനാപകടമാണ്. 240-ലധികം പേർക്ക് ജീവൻ നഷ്ടമായി. കമ്പനി പ്രവർത്തന ലാഭത്തിലേക്കെത്തുന്നതിനിടെയായിരുന്നു അപകടം. ഇതോടെ കനത്ത പ്രതിസന്ധി നേരിടേണ്ടിവരികയും ചെയ്തു.

ഇന്ത്യയുമായുള്ള സൈനിക ഏറ്റുമുട്ടലിനെത്തുടർന്ന് പാകിസ്ഥാൻ ആകാശ പാത അടച്ചതോടെ യൂറോപ്പിലേക്കും യുഎസിലേക്കും ദീർഘദൂര പാതകളിലൂടെ സഞ്ചരിക്കേണ്ടി വന്നത് ഇന്ധനച്ചെലവും മറ്റും വർധിപ്പിച്ചു. ഇന്ത്യൻ വ്യോമയാന മേഖലയിലെ കമ്പനികളുടെ ആധിപത്യവും വ്യാപകമായ ഫ്‌ളൈറ്റ് റദ്ദാക്കലുകളും വിമാനക്കമ്പനികൾക്ക് തിരിച്ചടിയായി.

ഭാവി പദ്ധതികൾ

  • നിലവിലെ സിഇഒ ക്യാമ്പ്‌ബെൽ വിൽസണ് പകരം പുതിയൊരാളെ കണ്ടെത്താനുള്ള ശ്രമം ടാറ്റ ഗ്രൂപ്പ് ആരംഭിച്ചിട്ടുണ്ട്. വിമാനാപകടത്തിന്റെ അന്വേഷണ റിപ്പോർട്ട് പുറത്തുവരുന്നതോടെ ഇതിൽ തീരുമാനമുണ്ടാകും.
  • മൂന്നാം വർഷത്തിൽ ലാഭം പ്രതീക്ഷിക്കുന്ന മാനേജ്മെന്റിന്റെ അഞ്ചുവർഷ പദ്ധതി ബോർഡ് നിരസിച്ചു. കൂടുതൽ വേഗത്തിലുള്ള തിരിച്ചുവരവാണ് ബോർഡ് ആവശ്യപ്പെടുന്നത്.
  • 2024-ൽ വിസ്താരയെ എയർ ഇന്ത്യയുമായി ലയിപ്പിച്ചതിനെത്തുടർന്ന് സിങ്കപ്പൂർ എയർലൈൻസിന് 25.1 ശതമാനം ഓഹരി പങ്കാളിത്തമുണ്ട്. എയർ ഇന്ത്യയുടെ മോശം പ്രകടനം സിങ്കപ്പൂർ എയർലൈൻസിന്റെ വരുമാനത്തെയും ബാധിച്ചു.

വിപണി സാഹചര്യം

ഡിസംബർ മാസത്തിലെ വ്യാപകമായ വിമാന തടസ്സങ്ങളെത്തുടർന്ന് ഇൻഡിഗോയ്ക്ക് ഡിജിസിഎ 22.2 കോടി രൂപ പിഴ ചുമത്തിയിരുന്നു. വിമാനങ്ങൾ റദ്ദാക്കാതിരിക്കാൻ ആവശ്യമായ പൈലറ്റുമാരുണ്ടെന്ന് ഉറപ്പാക്കാൻ ഡിജിസിഎ ആവശ്യപ്പെടുകയും ചെയ്തിരുന്നു. ഈ സംഭവവികാസങ്ങൾ വ്യോമയാന മേഖലയിലാകെ അനിശ്ചിതത്വത്തിലാക്കി. എയർ ഇന്ത്യയുടെ കാര്യത്തിൽ വിമാനാപകടത്തിന് ശേഷമുള്ള വിശ്വാസ്യത വീണ്ടെടുക്കുന്നതിനൊപ്പം സാമ്പത്തിക അച്ചടക്കം പാലിക്കുക എന്നതും വെല്ലുവിളിയായി.