പ്രഥമ അഷിത സ്മാരക സാഹിത്യ പുരസ്‌കാരങ്ങള്‍ വിതരണം ചെയ്തു

കോഴിക്കോട്: സത്യസന്ധയായ എഴുത്തുകാരിയായിരുന്നു അഷിതയെന്ന് പ്രശസ്ത സാഹിത്യകാരന്‍ ശിഹാബുദ്ദീന്‍ പൊയ്ത്തുംകടവ് പറഞ്ഞു. കോഴിക്കോട് അളകാപുരി ഓഡിറ്റോറിയത്തില്‍ നടന്ന ചടങ്ങില്‍ അഷിത സ്മാരക പ്രഭാഷണം നടത്തുകയായിരുന്നു അദ്ദേഹം.
അനുഭവങ്ങള്‍ കലര്‍പ്പില്ലാതെ ചേര്‍ത്തു വെച്ചുകൊണ്ട് സത്യസന്ധമായ ഭാഷയിലാണ് അഷിത എഴുതിയത്. ആത്മീയതയില്‍ നിന്ന് രൂപപ്പെട്ട രചനകളാണ് അവരുടേത്. യഥാര്‍ഥ ആത്മീയത എന്നത് മതാധിഷ്ഠിതമല്ല. അത് മനുഷ്യനെ സ്നേഹിക്കാന്‍ പ്രേരിപ്പിക്കുന്ന ഒന്നാണ്. അത്തരമൊരു വികാരം വായനക്കാരിലേക്ക് പകരാന്‍ കഴിയുന്നു എന്നതുകൊണ്ട് അഷിതയുടെ കഥകള്‍ എക്കാലവും വേറിട്ടു നില്‍ക്കും-അദ്ദേഹം പറഞ്ഞു. സന്തോഷ് ഏച്ചിക്കാനത്തിന്റെയും സ്മിത ദാസിന്റെയും രചനകള്‍ ആ ഗണത്തിലേക്ക് ചേര്‍ത്തുവെക്കാവുന്നതാണെന്ന് അദ്ദേഹം കൂട്ടിച്ചേര്‍ത്തു.

Smitha Das receiving the Young author's award from writer Shihabuddin Poythumkadavu

ജൂറി ചെയര്‍മാന്‍ ഡോ. എം.ടി. ശശി അധ്യക്ഷത വഹിച്ചു. അവാര്‍ഡ് നേടിയ സ്മിത ദാസിന്റെ പുസ്തകം 'ശംഖുപുഷ്പങ്ങള്‍' എഴുത്തുകാരനും ചലച്ചിത്ര പ്രവര്‍ത്തകനുമായ എം. കുഞ്ഞാപ്പ പരിചയപ്പെടുത്തി. പാലക്കാട് പട്ടാമ്പി തിരുമിറ്റക്കോട് സ്വദേശിയാണ് സ്മിതദാസ്. ജൂറി എക്‌സി. അംഗം പി.കെ. റാണി സ്വാഗതവും ബാലസാഹിത്യകാരന്‍ ഉണ്ണി അമ്മയമ്പലം നന്ദിയും പറഞ്ഞു. ഇന്ത്യന്‍ റൈറ്റേഴ്സ് ഫോറം ആണ് ചടങ്ങ് സംഘടിപ്പിച്ചത്.