ബോളിവുഡിലെ ബാലതാരമായി സിനിമയിലെത്തിയ നീതു കപൂറിന് ചെറുപ്രായത്തിൽ തന്നെ വലിയ സമ്പത്തും ആഡംബര ജീവിതവുമുണ്ടായിരുന്നു. വെറും 15 വയസ്സുള്ളപ്പോൾ സ്വന്തമായി ആദ്യത്തെ മെഴ്സിഡസ് കാർ വാങ്ങിയെന്നും 21-ാം വയസ്സിൽ ഋഷി കപൂറിനെ വിവാഹം കഴിക്കുമ്പോഴേക്കും നാലോ അഞ്ചോ റിയൽ എസ്റ്റേറ്റ് സ്വത്തുക്കളിൽ നിക്ഷേപം നടത്തിയിരുന്നുവെന്നും താരം വെളിപ്പെടുത്തി. അടുത്തിടെ നൽകിയ അഭിമുഖത്തിലാണ് തന്റെ ആദ്യകാല സിനിമാജീവിതത്തെക്കുറിച്ചും അന്നത്തെ സാമ്പത്തിക നേട്ടങ്ങളെക്കുറിച്ചും നീതു മനസ്സുതുറന്നത്.

To advertise here,

എട്ടാം ക്ലാസിൽ പഠിക്കുമ്പോൾ നായികാ വേഷങ്ങളിലേക്ക്

ഒരു അഭിമുഖത്തിലാണ് നീതു തന്റെ സിനിമാജീവിതത്തിലെ ആദ്യകാല അനുഭവങ്ങൾ പങ്കുവച്ചത്. എട്ടാം ക്ലാസിൽ പഠിക്കുമ്പോഴാണ് നായികാ വേഷങ്ങൾ ചെയ്യാനുള്ള അവസരങ്ങൾ ലഭിച്ചുതുടങ്ങിയത്. അതോടെ പഠനം തുടരാൻ കഴിഞ്ഞില്ലെന്നും താരം പറഞ്ഞു.15-ാം വയസ്സിൽ തന്നെ ആദ്യത്തെ മെഴ്സിഡസ് സ്വന്തമാക്കി. വിവാഹിതയായപ്പോൾ നാലോ അഞ്ചോ റിയൽ എസ്റ്റേറ്റ് സ്വത്തുക്കളിലും നിക്ഷേപമുണ്ടായിരുന്നു. ഇത്ര ചെറുപ്രായത്തിൽ തന്നെ സ്വന്തമായി ഇത്രയധികം സമ്പാദിക്കാൻ കഴിഞ്ഞതിൽ തനിക്കുതന്നെ അത്ഭുതം തോന്നുന്നുവെന്നായിരുന്നു നീതുവിന്റെ പ്രതികരണം.

വൈജയന്തിമാലയുടെ നൃത്തപരിശീലനം 

ദോ കന്യ,ഖർ ഖർ കി കഹാനി തുടങ്ങിയ ചിത്രങ്ങളിലൂടെ ബാലതാരമായാണ് നീതു സിനിമയിലെത്തിയത്. അഭിനയിക്കാൻ പ്രത്യേക പരിശീലനം ലഭിച്ചിരുന്നില്ലെങ്കിലും ക്യാമറയെ ഭയമില്ലാതിരുന്നത് സിനിമയിൽ മുന്നേറാൻ സഹായിച്ചുവെന്ന് താരം പറഞ്ഞു.പ്രശസ്ത നടിയും നർത്തകിയുമായ വൈജയന്തിമാലയുടെ കീഴിൽ നേടിയ നൃത്തപരിശീലനവും അഭിനയരംഗത്ത് തനിക്ക് ഗുണം ചെയ്തതായി നീതു ഓർത്തെടുത്തു. അഭിനയപഠനശാലയിൽ പോയിട്ടില്ലെങ്കിലും ക്യാമറയ്ക്ക് മുന്നിൽ നിൽക്കുന്നതിൽ ഒരിക്കലും മടിയോ ഭയമോ തോന്നിയിരുന്നില്ലെന്നും അവർ പറഞ്ഞു.

21-ാം വയസ്സിൽ സിനിമയോട് വിടപറഞ്ഞു

ഏറെ തിരക്കുള്ള സിനിമാജീവിതമായിരുന്നു നീതുവിന്റേത്. ഒരു ദിവസം തന്നെ മൂന്ന് ഷിഫ്റ്റുകളിൽ വരെ ജോലി ചെയ്യേണ്ടിവന്നിരുന്ന കാലത്തെക്കുറിച്ചും താരം അഭിമുഖത്തിൽ പറഞ്ഞു. രാവിലെ ഏഴ് മണിക്ക് എഴുന്നേറ്റ് തുടർച്ചയായി ഷൂട്ടിങ്ങിന് പോകുമായിരുന്നു. ചെറുപ്പമായിരുന്നതിനാൽ അതെല്ലാം ചെയ്യാൻ കഴിഞ്ഞിരുന്നെങ്കിലും പിന്നീട് വലിയ ക്ഷീണം അനുഭവപ്പെട്ടുതുടങ്ങി.ജോലിത്തിരക്ക് കാരണം സുഹൃത്തുക്കളെ ഉണ്ടാക്കാനോ വ്യക്തിജീവിതത്തിന് സമയം കണ്ടെത്താനോ കഴിഞ്ഞിരുന്നില്ല. ഈ സാഹചര്യത്തിലാണ് വിവാഹശേഷം സിനിമയിൽനിന്ന് മാറിനിൽക്കാൻ തീരുമാനിച്ചത്. അപ്പോഴേക്കും ആവശ്യത്തിലധികം ജോലി ചെയ്തുകഴിഞ്ഞിരുന്നുവെന്നും വിശ്രമം വേണമെന്ന് തോന്നിയെന്നും നീതു വ്യക്തമാക്കി.ഋഷി കപൂറുമായുള്ള വിവാഹശേഷം മക്കളായ റിദ്ധിമയെയും രൺബീറിനെയും വളർത്തുന്നതിലായിരുന്നു നീതു ശ്രദ്ധ കേന്ദ്രീകരിച്ചത്. വീട്ടിലിരുന്ന് കുട്ടികളെ വളർത്തുന്നതിൽ സന്തോഷം കണ്ടെത്തിയെന്നും താരം പറഞ്ഞു.

വർഷങ്ങൾക്കുശേഷം സിനിമയിലേക്ക് തിരിച്ചുവരവ്

വിവാഹശേഷം പതിറ്റാണ്ടുകളോളം സിനിമയിൽനിന്ന് വിട്ടുനിന്ന നീതു കപൂർ 2022ൽ ജുഗ്ജുഗ് ജീയോ എന്ന കുടുംബചിത്രത്തിലൂടെയാണ് അഭിനയരംഗത്തേക്ക് തിരിച്ചെത്തിയത്. മകൾ റിദ്ധിമ കപൂർ സാഹ്നിക്കൊപ്പം ദാദി കി ഷാദി എന്ന ചിത്രത്തിലും താരം അടുത്തിടെ അഭിനയിച്ചു. ജീവിതത്തിന്റെ പല ഘട്ടങ്ങളിലും സിനിമയിൽനിന്ന് വിട്ടുനിന്നെങ്കിലും അഭിനയത്തോടുള്ള ബന്ധം വീണ്ടും പുതുക്കുകയാണ് നീതു കപൂർ.