അശ്ലീല വീഡിയോകൾ കാണുന്ന ശീലം ഉപേക്ഷിച്ചതിനെക്കുറിച്ചും വിവാഹമോചനത്തിന് ശേഷമുള്ള ജീവിതത്തെക്കുറിച്ചും മനസ്സുതുറന്ന് ഹോളിവുഡ് നടനും ഹാസ്യതാരവുമായ ക്രിസ് റോക്ക്. വിവാഹബന്ധം തകരാൻ തന്റെ ചില ശീലങ്ങളും പെരുമാറ്റങ്ങളും കാരണമായെന്ന് സമ്മതിച്ച താരം, മാനസികാരോഗ്യ ചികിത്സയ്ക്കിടെ അനുഭവിച്ച വൈകാരിക നിമിഷങ്ങളെക്കുറിച്ചും വെളിപ്പെടുത്തി. വിൽ സ്മിത്ത് ഓസ്‌കർ വേദിയിൽ മുഖത്തടിച്ച സംഭവത്തെക്കുറിച്ചും ഇനി സംസാരിക്കാൻ ആഗ്രഹിക്കുന്നില്ലെന്ന് താരം വ്യക്തമാക്കി. ജി.ക്യു മാസികയുടെ 2026-ലെ 'മെൻ ഓഫ് ദ ഇയർ' അഭിമുഖത്തിലാണ് 61-കാരനായ ക്രിസ് റോക്ക് ജീവിതത്തിലെ നിർണായക അനുഭവങ്ങൾ പങ്കുവെച്ചത്.

To advertise here,

ആറ് വർഷമായി അശ്ലീല വീഡിയോകൾ കാണാറില്ല

മുൻഭാര്യ മലാക് കോംപ്ടൺ റോക്കുമായുള്ള 19 വർഷത്തെ ദാമ്പത്യജീവിതം അവസാനിച്ചതിനെക്കുറിച്ച് സംസാരിക്കവെയാണ് തന്റെ പഴയ ശീലങ്ങളെക്കുറിച്ച് ക്രിസ് തുറന്നുപറഞ്ഞത്. 'ഞാനൊരു മികച്ച ഭർത്താവായിരുന്നില്ല. ഒരുപാട് അശ്ലീല വീഡിയോകൾ കാണുമായിരുന്നു. ഇപ്പോൾ അങ്ങനെയല്ല. കഴിഞ്ഞ ആറ് വർഷമായി അത്തരം വീഡിയോകൾ കാണാറില്ല' എന്നായിരുന്നു താരത്തിന്റെ വെളിപ്പെടുത്തൽ. ഭാര്യയോടുള്ള വിശ്വാസം തകർക്കുന്ന രീതിയിൽ താൻ മറ്റൊരു ബന്ധത്തിൽ ഏർപ്പെട്ടിരുന്നതായും താരം നേരത്തെ സമ്മതിച്ചിരുന്നു. കഴിഞ്ഞകാലത്തെ തീരുമാനങ്ങളെക്കുറിച്ച് ഇപ്പോൾ ചിന്തിക്കുമ്പോൾ അഭിമാനിക്കാൻ ഒന്നുമില്ലെന്നും എന്നാൽ ജീവിതത്തിൽ കടന്നുപോകേണ്ടിവന്ന അനുഭവങ്ങളായിരുന്നു അതെന്നും ക്രിസ് പറഞ്ഞു.

സ്വന്തം പ്രവൃത്തികളെ സൂപ്പർഹീറോ സിനിമകളിലെ കഥാപാത്രങ്ങളുമായി താരതമ്യം ചെയ്തായിരുന്നു താരത്തിന്റെ വിശദീകരണം. അമാനുഷിക ശക്തികൾ ലഭിക്കുന്ന കഥാപാത്രങ്ങൾ ആദ്യം അവ ദുരുപയോഗം ചെയ്യുകയും പിന്നീട് തങ്ങളുടെ പരിമിതികൾ തിരിച്ചറിയുകയും ചെയ്യുന്നതുപോലെയായിരുന്നു തന്റെ അനുഭവമെന്നും അദ്ദേഹം പറഞ്ഞു. താൻ ദൈവമല്ലെന്നും അത്തരമൊരു ശക്തിയുള്ള ആളുമല്ലെന്നും തിരിച്ചറിഞ്ഞതോടെ ജീവിതം പലതും പഠിപ്പിച്ചുവെന്നും ക്രിസ് കൂട്ടിച്ചേർത്തു. വിവാഹമോചനത്തിന് ശേഷം സാമ്പത്തികമായും വ്യക്തിപരമായും വെല്ലുവിളികൾ നേരിടേണ്ടിവന്നു. വിവാഹമോചനത്തിലൂടെ മുമ്പുണ്ടായിരുന്ന സമ്പാദ്യത്തിൽ വലിയൊരു ഭാഗം നഷ്ടമായി. പിന്നീട് സാമ്പത്തികനില മെച്ചപ്പെടുത്താൻ തുടർച്ചയായി സ്റ്റാൻഡ് അപ് പരിപാടികൾ നടത്തേണ്ടിവന്നു. ഇതിനിടെ കോവിഡും മറ്റു പ്രതിസന്ധികളും ജീവിതത്തെ ബാധിച്ചുവെന്നും ക്രിസ് വെളിപ്പെടുത്തി.

തെറാപ്പിക്കിടെ പൊട്ടിക്കരഞ്ഞു

വ്യക്തിജീവിതം പ്രതീക്ഷിച്ച രീതിയിലല്ല മുന്നോട്ടുപോയതെന്ന് തിരിച്ചറിഞ്ഞതോടെ മാനസികാരോഗ്യ ചികിത്സ തേടി. തെറാപ്പിക്കിടെ നിയന്ത്രിക്കാനാകാത്തവിധം കരഞ്ഞ അനുഭവവും താരം പങ്കുവെച്ചു. 'എന്റെ വ്യക്തിജീവിതം ഞാൻ ആഗ്രഹിച്ച രീതിയിലായിരുന്നില്ല. അത്രയേ എനിക്ക് പറയാനുള്ളൂ. അതുകൊണ്ട് ഞാൻ തെറാപ്പിക്ക് പോയി. അവിടെ ചെന്നപ്പോൾ പൊട്ടിക്കരഞ്ഞു. എന്താണ് എന്റെ ജീവിതത്തിൽ സംഭവിക്കുന്നത് എന്നുപോലും മനസ്സിലാകാത്ത അവസ്ഥയായിരുന്നു.' ക്രിസ് പറഞ്ഞു. തെറാപ്പിക്ക് പോകുന്നതിനെക്കുറിച്ച് പലരും അഭിമാനത്തോടെ സംസാരിക്കാറുണ്ടെങ്കിലും തനിക്ക് അത് വളരെ വൈകാരികമായ അനുഭവമായിരുന്നുവെന്നും താരം കൂട്ടിച്ചേർത്തു.

ഓസ്‌കർ വേദിയിലെ വിവാദം മറക്കാൻ ആഗ്രഹിക്കുന്നു

2022-ലെ ഓസ്‌കർ പുരസ്‌കാരദാനച്ചടങ്ങിനിടെ നടൻ വിൽ സ്മിത്ത് ക്രിസ് റോക്കിന്റെ മുഖത്തടിച്ച സംഭവം ലോകമെമ്പാടും വലിയ ചർച്ചയായിരുന്നു. ഭാര്യ ജേഡ പിങ്കറ്റ് സ്മിത്തിന്റെ മുടിയെക്കുറിച്ച് ക്രിസ് നടത്തിയ തമാശയാണ് വിൽ സ്മിത്തിനെ പ്രകോപിപ്പിച്ചത്. ഈ സംഭവത്തെക്കുറിച്ചുള്ള ചോദ്യങ്ങൾ ഇപ്പോഴും നേരിടേണ്ടിവരുന്നതിൽ താരം അതൃപ്തി പ്രകടിപ്പിച്ചു. 'അതെ, ഒരു സംഭവം ഉണ്ടായി. അത് ഒട്ടും നല്ല കാര്യമായിരുന്നില്ല. ഇനി അതിൽനിന്ന് മുന്നോട്ടുപോകാനാണ് ഞാൻ ആഗ്രഹിക്കുന്നത്. ആ സംഭവത്തിന് മുമ്പും എനിക്ക് മികച്ചൊരു കരിയറുണ്ടായിരുന്നു. ജീവിതകാലം മുഴുവൻ ആ സംഭവം എന്നെ പിന്തുടരുമെന്ന് അറിയാം. പക്ഷേ, എനിക്ക് ഒരുപാട് തമാശകളും സിനിമാ തിരക്കഥകളും ടെലിവിഷൻ പരിപാടികളും ചെയ്യാനുണ്ട്. ഒരു പുസ്തകം എഴുതുന്നുമുണ്ട്. എന്റെ കലാസൃഷ്ടികളിലാണ് ആളുകൾ ശ്രദ്ധിക്കേണ്ടത്, ആ ഒരു രാത്രിയിലല്ല.' എന്നായിരുന്നു ക്രിസിന്റെ പ്രതികരണം.

സിനിമയിലും എഴുത്തിലും ശ്രദ്ധ കേന്ദ്രീകരിക്കാൻ തീരുമാനം

സംവിധാനരംഗത്തും എഴുത്തിലും കൂടുതൽ സജീവമാകാനാണ് ക്രിസ് റോക്കിന്റെ തീരുമാനം. പുതിയ ചിത്രമായ മിസ്റ്റി ഗ്രീൻ നവംബർ ഒൻപതിന് നെറ്റ്ഫ്‌ലിക്‌സിലൂടെ പ്രേക്ഷകരിലേക്കെത്തും. നേരത്തെ ചിത്രം തിയേറ്ററുകളിലും എത്തിയിരുന്നു. സ്റ്റാൻഡ് അപ് പരിപാടികളിലേക്ക് തിരിച്ചെത്തുമോ എന്ന ചോദ്യത്തിനും താരം വ്യക്തമായ മറുപടി നൽകിയില്ല. നിലവിൽ ആറ്, ഏഴ് പ്രത്യേക ഹാസ്യപരിപാടികൾ ചെയ്തുകഴിഞ്ഞു. വീണ്ടും വേദിയിലെത്തുകയാണെങ്കിൽ അത് മികച്ച രീതിയിൽ ചെയ്യണമെന്നാണ് ആഗ്രഹമെന്നും പറഞ്ഞു. എഴുത്തിനാണ് ഇപ്പോൾ കൂടുതൽ സമയം ചെലവഴിക്കാൻ ആഗ്രഹിക്കുന്നത്. എല്ലാ ദിവസവും ഉണർന്ന് എഴുതുക, മനസ്സിലുള്ള ആശയങ്ങളെല്ലാം സൃഷ്ടികളാക്കി മാറ്റുക എന്നതാണ് തന്റെ ലക്ഷ്യമെന്നും ക്രിസ് റോക്ക് അഭിമുഖത്തിൽ പറഞ്ഞു.