ഉറക്കത്തിൽ കൂർക്കംവലിമൂലം ബുദ്ധിമുട്ട് അനുഭവിക്കുന്നവർ നിരവധിയാണ്. കൂർക്കംവലിക്കാരുടെ പ്രശ്നങ്ങൾക്ക് പരിഹാരമൊരുക്കുകയാണ് പുതുച്ചേരിയിലെ ഇന്ദിരാ​ഗാന്ധി ​ഗവൺമെന്റ് ജനറൽ ഹോസ്പിറ്റൽ&പോസ്റ്റ് ​ഗ്രാജ്വേറ്റ് ഇൻസ്റ്റിറ്റ്യൂട്ട്. കൂർക്കംവലിയുടെ പിന്നിലെ കാരണംകണ്ടെത്താൻ ഇവിടെ സ്നോറിങ് ലബോറട്ടറി ഒരുക്കിയിരിക്കുകയാണ്.

To advertise here,

ഇ,.എൻ.ടി. ഡിപ്പാർട്മെന്റിനു കീഴിലാണ് സ്നോറിങ് ലബോറട്ടറി ഒരുക്കിയിരിക്കുന്നത്. കൂർക്കംവലിയുടെ കാരണമെന്താണെന്നും എന്തൊക്കെയാണ് അതിലേക്ക് നയിക്കുന്ന ഘടകങ്ങളെന്നുമൊക്കെയാണ് ലബോറട്ടിയിൽ പരിശോധിക്കുന്നത്. 

ലബോറട്ടറിയിൽ എട്ടുമണിക്കൂറോളം രോ​ഗികളെ ഉറക്കിക്കിടത്തും. ശേഷം 24 വിവിധ ടെസ്റ്റുകൾ നടത്തും. ഒടുവിലാണ് കൂർക്കംവലിയുടെ കാരണവും അതിനുള്ള പരിഹാരവും ഡോക്ടർമാർ നിർദേശിക്കുക. 

ഉറക്കത്തിനിടയിലെ കൂർക്കംവലിയും മറ്റു തകരാറുകളും കൃത്യമായി സ്ഥിരീകരിച്ച് ചികിത്സ നടത്താനാണ് പ്രസ്തുത ലബോറട്ടറി രൂപവത്കരിച്ചതെന്ന് ഡോ.സ്റ്റാലിൻ ന്യൂസ്18-നോട് പറഞ്ഞു. കൂർക്കംവലി ശരീരത്തിലെ ഓക്സിജന്റെ അളവ് അസന്തുലിതമാക്കുകയും ഇത് ശ്വാസകോശം, ഹൃദയം എന്നിവയെ ബാധിക്കുന്ന രോ​ഗങ്ങളിലേക്ക് നയിക്കുകയും ചെയ്യും. അതിനാൽ കൂർക്കംവലിയുള്ളവർക്ക് ലബോറട്ടറിയിൽ സൗജന്യമായി പരിശോധിച്ച് രോ​ഗനിർണയം നടത്താമെന്നും അദ്ദേഹം പറഞ്ഞു. 

കൂർക്കംവലിയുടെ കാരണങ്ങൾ

ശ്വാസോച്ഛ്വാസത്തിനിടെ വായുകടന്നുപോകുന്ന വഴിയിലെവിടെയെങ്കിലും തടസ്സമുണ്ടാകുന്നതാണ് കൂർക്കംവലി. ജലദോഷം, മൂക്കടപ്പ് തുടങ്ങിയവ ഉണ്ടാകുമ്പോൾ ശ്വാസവായുവിന് നേരെ ശ്വാസകോശത്തിലേക്ക് കടന്നെത്താൻ കഴിയാത്തവിധം കൂർക്കം വലി ഉണ്ടാകാം. കുട്ടികളിലാണ് ഇത് കൂടുതൽ പ്രകടമാവുക. ശ്വാസ​ഗതിയിൽ കുറുനാക്ക് തടസ്സമായി വരുന്നതും തൊണ്ടയിലെ പേശികൾ അയഞ്ഞ് ദുർബലമാകുന്നതുമൊക്കെ കൂർക്കംവലിക്ക് കാരണമാകും. കൂടാതെ മൂക്കിന്റെ പാലത്തിനുണ്ടാകുന്ന തകരാറുകൾ, ടോൺസിലൈറ്റിസ് തുടങ്ങിയവയും കൂർക്കംവലിക്ക് കാരണമാകാം. 

കൂർക്കംവലിക്ക് പരിഹാരം

  • ജീവിതക്രമത്തിൽ ചിലമാറ്റങ്ങൾ വരുത്തുന്നതിലൂടെ കൂർക്കംവലിക്ക് ഒരുപരിധിവരെ പരിഹാരം കണ്ടെത്താം. മലർന്നുകിടന്നുറങ്ങാതെ ചരിഞ്ഞുകിടക്കാൻ ശീലിക്കുകയാണ് അതിൽ പ്രധാനം. മലർന്നു കിടന്നുറങ്ങുമ്പോൾ കഴുത്തിലെ പേശികൾ അയഞ്ഞുതളർന്ന് ശ്വാസനാളം ചുരുങ്ങി കൂർക്കംവലിയുണ്ടാകാം. ചരിഞ്ഞുകിടക്കുമ്പോൾ ഈ പ്രശ്നം പരിഹരിക്കാനാവും. 
  • തടികുറയ്ക്കലും പ്രധാനമാണ്. കൂർക്കംവലിയുടെയും മറ്റ് ഉറക്കപ്രശ്നങ്ങളുടെയും മുഖ്യകാരണങ്ങളിലൊന്ന് പൊണ്ണത്തടിയാണ്. തടികുറയ്ക്കുന്നതുകൊണ്ടുതന്നെ വലിയൊരളവുവരെ പ്രശ്നം പരിഹരിക്കാനാവും. 
  • മലർന്നുകിടന്നുറങ്ങുമ്പോൾ തലയണ ഒഴിവാക്കുകയും ചരിഞ്ഞു കിടന്നുറങ്ങുമ്പോൾ കനംകുറഞ്ഞ തലയണ ഉപയോ​ഗിക്കുകയും ചെയ്യുന്നത് ​ഗുണംചെയ്യും. 
  • ഉറങ്ങുന്നതിന് രണ്ടുമണിക്കൂർ മുമ്പെങ്കിലും അത്താഴം കഴിക്കാൻ ശ്രദ്ധിക്കണം. നിറഞ്ഞ വയറോട് ഉറങ്ങാൻ പോകുന്നത് കൂർക്കംവലി കൂട്ടും. 
  • ജലദോഷവും മൂക്കടപ്പും വിട്ടുമാറാതെ കൊണ്ടുനടക്കുന്നവരിൽ കൂർക്കംവലി വിട്ടുമാറില്ല. അതിനാൽ ആവിപിടിച്ചുംമറ്റും ഇവയ്ക്ക് പരിഹാരം കണ്ടെത്താം. 
  • ഒപ്പം വ്യായാമവും പ്രധാനമാണ്. കഴുത്തിലെ പേശികൾക്ക് ആയാസംലഭിക്കുന്ന വിധത്തിൽ പതിവായി വ്യായാമംചെയ്യുകവഴി കഴുത്തിലെ പേശികൾക്ക് ബലംകിട്ടും. ഇതും കൂർക്കംവലി തടയും.
  • ജീവിതശൈലിയിലെ മാറ്റങ്ങൾ വരുത്തിയിട്ടും കൂർക്കംവലിക്ക് പരിഹാരം കാണാനാവുന്നില്ലെങ്കിൽ വി​ദ​ഗ്ധ ചികിത്സ തേടേണ്ടതാണ്.