ജെ.എന്‍.1 ഇന്ത്യയില്‍ മുമ്പുമുണ്ട്, കേരളത്തില്‍ കണ്ടെത്തി എന്നുമാത്രം, ആശങ്കവേണ്ട- ആരോഗ്യമന്ത്രി

തിരുവനന്തപുരം: കേരളത്തില്‍ ജെ.എന്‍.-1 ഉപവകഭേദം കണ്ടെത്തിയതുസംബന്ധിച്ച് ആശങ്കപ്പെടേണ്ടതില്ലെന്ന് ആരോഗ്യമന്ത്രി വീണാജോര്‍ജ്. മാസങ്ങള്‍ക്കുമുമ്പ് സിംഗപ്പൂര്‍ എയര്‍പോര്‍ട്ടില്‍ ഇറങ്ങിയ ഇന്ത്യക്കാരെ ജീനോമിക് സീക്വന്‍സിങിന് വിധേയരാക്കിയപ്പോള്‍ ഈ ഉപവകഭേദം കണ്ടെത്തിയിട്ടുള്ളതാണെന്നും മന്ത്രി പറഞ്ഞു.

ഇന്ത്യയുടെ മറ്റ് ഭാഗങ്ങളില്‍ ഈ വകഭേദം നേരത്തേയുണ്ട്. കേരളത്തിന്റെ ആരോഗ്യസംവിധാനങ്ങള്‍ മികച്ചതായതുകൊണ്ട് നമ്മള്‍ ജനിതകശ്രേണീകരണത്തിലൂടെ അത് ഇവിടെ കണ്ടെത്തി എന്നുമാത്രമേയുള്ളൂ. വളരെ സൂക്ഷ്മമായി നിലവിലെ സാഹചര്യം നിരീക്ഷിക്കുന്നുണ്ടെന്നും അനുബന്ധരോഗങ്ങളുള്ളവര്‍ ശ്രദ്ധ പുലര്‍ത്തണമെന്നും മന്ത്രി പറഞ്ഞു.

ഡിസംബര്‍ എട്ടിന് തിരുവനന്തപുരത്തെ കരകുളത്തുനിന്ന് ശേഖരിച്ച കോവിഡ് പോസിറ്റീവ് സാംപിളിലാണ് പുതിയ ഉപവകഭേദം കണ്ടെത്തിയത്. പ്രതിരോധശേഷി കുറയ്ക്കുന്ന, വേഗത്തില്‍ വ്യാപനശേഷിയുള്ള വൈറസാണ് ജെ.എന്‍. 1 കോവിഡ് ഉപവകഭേദം. ഇത് ചൈനയില്‍ സ്ഥിരീകരിച്ചതായി വെള്ളിയാഴ്ച വാര്‍ത്താ ഏജന്‍സി റിപ്പോര്‍ട്ട് ചെയ്തിരുന്നു. വിദേശരാജ്യങ്ങളിലും ജെ.എന്‍. 1 വകഭേദം റിപ്പോര്‍ട്ട് ചെയ്യുന്നുണ്ട്.