സ്ത്രീകളെ ഏറ്റവും കൂടുതൽ ബാധിക്കുന്ന കാൻസറാണ് സ്തനാർബുദം. സ്വയം പരിശോധന, മാമോഗ്രാഫി, വിദഗ്ധ പരിശോധന എന്നിവയിലൂടെ സ്തനാർബുദം  നേരത്തേ കണ്ടെത്താനാകും. ഇപ്പോഴിതാ സ്തനാർബുദം സ്ഥിരീകരിച്ചതിനെക്കുറിച്ച് വെളിപ്പെടുത്തിയിരിക്കുകയാണ് അമേരിക്കൻ നടിയും പ്രശസ്ത യൂട്യൂബറുമായ ​ഗ്രേസ് ഹെൽബി​ഗ്. 

To advertise here,

ദി ​ഗ്രേസ് ഹെൽബി​ഗ് ഷോ എന്ന കോമഡി ടോക് ഷോയിലൂടെ പ്രശസ്തയായ താരമാണ് ​ഗ്രേസ്. തിങ്കളാഴ്ച്ചയാണ് ഇൻസ്റ്റ​ഗ്രാം വീഡിയോയിലൂടെ അവർ സ്തനാർബുദം സ്ഥിരീകരിച്ച വിവരം പുറത്തുവിട്ടത്. ഒരുമാസം മുമ്പാണ് തനിക്ക് സ്തനാർബുദമാണ് എന്ന് സ്ഥിരീകരിച്ചതെന്നും അതു തന്നെ ഞെട്ടിച്ചുവെന്നും ​ഗ്രേസ് പറയുന്നു. ശരീരത്തിൽ കാണപ്പെടുന്ന മുഴകൾ പരിശോധിക്കാൻ വിട്ടുപോകരുതെന്നും ​ഗ്രേസ് പറയുന്നുണ്ട്. 

സ്തനാർബുദം ചികിത്സിച്ച് ഭേദമാക്കാവുന്നതാണ് എന്ന് കാൻസറിനെക്കുറിച്ച് അറിവുള്ള ഓരോ ഡോക്ടർമാരും ആരോ​ഗ്യപ്രവർത്തകരും പറഞ്ഞിട്ടുണ്ടെന്നും ​ഗ്രേസ് പറയുന്നു. ഇടത്തേ സ്തനത്തിൽ മുഴ കണ്ടതോടെയാണ് ​ഗ്രേസിന് അസ്വാഭാവികത തോന്നിയത്. തുടക്കത്തിൽ മസിൽ ടിഷ്യൂ ആണെന്ന തോന്നൽ ഉണ്ടായെങ്കിലും ഡോക്ടറെ കാണാൻ തന്നെ തീരുമാനിക്കുകയായിരുന്നു. തുടർന്ന് ​ഗൈനക്കോളജിസ്റ്റിനോട് വിവരം പറഞ്ഞപ്പോഴാണ് അവരും അതൊരു അസ്വാഭാവിക മുഴയാണ് എന്ന് പറഞ്ഞത്. ശേഷം മാമോ​ഗ്രാമും അൾട്രാസൗണ്ട് സ്കാനും ബയോപ്സിയും ചെയ്തതിനൊടുവിൽ സ്തനാർബുദം സ്ഥിരീകരിക്കുകയായിരുന്നു എന്നും ​ഗ്രേസ് പറഞ്ഞു.  സ്തനാർബു​ദത്തിനുള്ള ചികിത്സ ആരംഭിച്ചതിനെക്കുറിച്ചും തനിക്ക് സ്വയം കരുതൽ നൽകാൻ തുടങ്ങിയതിനെക്കുറിച്ചും ​ഗ്രേസ് പറഞ്ഞു. 

സ്വയം പരിശോധന എപ്പോൾ?  

കൃത്യമായ മാസമുറ ഉള്ള സ്ത്രീകൾ, മാസമുറ കഴിഞ്ഞാൽ ഉടനെയും അതില്ലാത്തവർ ഒരുമാസത്തോളം വരുന്ന കൃത്യമായ ഇടവേളയിലും സ്വയം പരിശോധന നടത്തണം.

എങ്ങനെ പരിശോധിക്കണം? 

കണ്ണാടിയുടെ മുന്നിൽ നിന്ന് മാറിടങ്ങൾ നിരീക്ഷിക്കുക, വലിപ്പത്തിലുള്ള വ്യത്യാസം, മുലക്കണ്ണുകളിൽ വരുന്ന വ്യത്യാസം, പ്രകടമായ മുഴകൾ, കക്ഷ ഭാഗത്തെ മുഴകൾ, മാറിടത്തിലെ നിറവ്യത്യാസം എന്നിവ കാൻസർ കൊണ്ട് ഉള്ളതല്ലെന്ന് തീർച്ചപ്പെടുത്തേണ്ടതുണ്ട്.

കക്ഷ ഭാഗങ്ങളും കൈയുടെ പ്രതലം ഉപയോഗിച്ച് രണ്ടു മാറിടങ്ങളും പരിശോധിക്കണം. മുഴകൾ വളരെ ചെറിയ ദിശയിൽ തന്നെ ഇങ്ങനെ കണ്ടുപിടിക്കാൻ കഴിയും. മുലക്കണ്ണുകൾ അമർത്തി പരിശോധിച്ചാ  സ്രവം ഉണ്ടെങ്കിൽ അതും കണ്ടുപിടിക്കാം.

ആരംഭദശയിൽ തന്നെ സ്വയം പരിശോധനയിലൂടെ കണ്ടുപിടിക്കാം എന്നതാണ് സ്തനാർബുദത്തിനെ മറ്റു കാൻസറിൽ നിന്നും വ്യത്യസ്തമാക്കുന്നത്. ആരംഭദശയിലേ കണ്ടു പിടിച്ചാൽ 100 ശതമാനവും ചികിത്സിച്ചു ഭേദമാക്കാം. സ്റ്റേജ് ഒന്നിലും രണ്ടിലും കണ്ടുപിടിക്കപ്പെടുന്ന കാൻസർ മരണ കാരണമാകുന്നില്ല. എന്നാൽ 4, 5 സ്റ്റേജിൽ കണ്ടുപിടിക്കപ്പെടുന്ന സ്താനർബുദം, അഞ്ച് മുതൽ 10 വർഷം കഴിയുമ്പോൾ മരണ കാരണമായേക്കാം. ഇത്തരക്കാരിൽ  ഓപ്പറേഷനോടൊപ്പം കീമോതെറാപ്പിയും റേഡിയേഷൻ ചികിത്സയും തുടർ ചികിത്സയും കൃത്യമായ ഇടവേളകളിലെ മറ്റു ചികിത്സയും വേണ്ടി വന്നേക്കാം.

തുടക്കത്തിൽ തിരിച്ചറിഞ്ഞാലുള്ള പ്രയോജനങ്ങൾ 

  • സ്തനം മുഴുവനായി നീക്കുന്ന ശസ്ത്രക്രിയ വേണ്ടിവരില്ല. അങ്ങനെ അംഗവൈകല്യത്തെ ചെറുക്കാൻ കഴിയും.
  • റേഡിയേഷൻ ചികിത്സയും കീമോതെറാപ്പിയും ഒഴിവാക്കപ്പെടാനും ചിലപ്പോൾ ഇതിൽ ഒന്നു മാത്രമായി ചുരുക്കാനും കഴിയും.
  • കീമോയുടെയും റേഡിയേഷന്റെയും ഡോസിൽ കുറവ് വരുത്താൻ സാധിക്കും.

മാറിടങ്ങളിലും കക്ഷ ഭാഗത്തും കാണുന്ന മേൽപ്പറഞ്ഞ വ്യത്യാസങ്ങൾ എല്ലാം തന്നെ കാൻസർ ആകണമെന്നില്ല. 80 ശതമാനം വരുന്ന മാറിടങ്ങളിലെ മുഴകളും കാൻസർ അല്ലാത്ത മറ്റു അസുഖങ്ങളാണ്. അതുകൊണ്ടു തന്നെ സർജനെ കാണിച്ച് കാൻസർ അല്ല എന്ന് ഉറപ്പുവരുത്തേണ്ടതുണ്ട്.

വേദനരഹിതമായ വ്യത്യാസങ്ങളും മുഴകളും ആണ് സാധാരണ കാൻസറിന്റെ ലക്ഷണം. വേദനയും ബുദ്ധിമുട്ടുകളും ഇല്ലെന്ന കാരണത്താൽ ചികിത്സാ വിധേയമാക്കാതിരിക്കുന്ന പ്രവണത ധാരാളമായി കണ്ടുവരുന്നു. അങ്ങനെ കാൻസറിന്റെ സ്റ്റേജ് മുന്നോട്ടു പോകുമ്പോൾ ചികിത്സ സങ്കീർണമാകുന്നു. ഇതിൽ ഒരു മാറ്റം വരുത്താൻ ബോധവത്ക്കരണ പ്രചാരണങ്ങൾ വഴി സാധിക്കും. 

രോഗനിർണയം സങ്കീർണമല്ല

  • ക്ലിനിക്കൽ എക്‌സാമിനേഷൻ അഥവാ ഡോക്ടറുടെ കൈ കൊണ്ടുള്ള പരിശോധന.
  • റേഡിയോളജിക്കൽ എക്സാമിനേഷൻ അഥവാ മാമോഗ്രാം, അൾട്രാസൗണ്ട് സ്റ്റഡി, എം.ആർ.ഐ. സ്റ്റഡി അല്ലെങ്കിൽ സി.ടി. ബ്രെസ്റ്റ്. ഇതിൽ ഏതു വേണമെന്ന് രോഗിയുടെ പ്രായവും മറ്റു കാര്യങ്ങളും പരിഗണിച്ച് ഡോക്ടർ തീരുമാനിക്കുന്നു.
  • മുഴയില്‍ നിന്നുള്ള ഭാഗം എടുത്തുള്ള പരിശോധന(Tissue diagnosis). ഇതിന് ഫൈൻ നീഡിൽ ആസ്പിരേഷൻ സൈറ്റോളജി(FNAC) കോർ ബയോപ്‌സി, ഇൻസിഷൻ ബയോപ്‌സി, എക്‌സിഷൻ ബയോപ്‌സി എന്നീ പരിശോധനകളുണ്ട്. 

ചികിത്സ  

  • കാൻസർ ഉള്ള ഭാഗം സ്റ്റേജ് അനുസരിച്ച് ഓപ്പറേഷന് വിധേയമാക്കുക
  • ഓപ്പറേഷന് ശേഷം റേഡിയേഷൻ
  • പിന്നെ ആവശ്യാനുസരണം കീമോതെറാപ്പിയും നൽകുക.
  • സ്തനാർബുദത്തിന്റെ ചികിത്സ ഒരു ടീംവർക്ക് ആണ്. ജനറൽ സർജൻ, ഓങ്കോളജിസ്റ്റ്, പാത്തോളജിസ്റ്റ്, റേഡിയോളജിസ്റ്റ്, സൈക്യാട്രിസ്റ്റ് എന്നിവർ ഉൾപ്പെടുന്ന ടീം വർക്കിലൂടെയാണ് ഒരു കാൻസർ രോഗിയെ ചികിത്സിക്കേണ്ടത്. മൂന്നാഴ്ചയിലധികം നീണ്ടുനിൽക്കുന്ന വിഷാദവും മാനസിക സംഘർഷങ്ങളും അനുഭവപ്പെടുന്നവർക്ക് സൈക്യാട്രിസ്റ്റിന്റെ സേവനം ഉറപ്പുവരുത്തേണ്ടതാണ്.

സ്തനാർബുദം സംബന്ധിച്ച വിവരങ്ങൾക്ക് കടപ്പാട് : ഡോ. എസ് പ്രമീളാ ദേവി