തമിഴ്‌നാട് മുഖ്യമന്ത്രിയും സൂപ്പർതാരവുമായ വിജയ് തന്റെ ഫിറ്റ്‌നസും ഊർജ്ജസ്വലതയും എപ്പോഴും കാത്തുസൂക്ഷിക്കുന്നതിൽ വലിയശ്രദ്ധ പുലർത്തുന്ന വ്യക്തിയാണ്. കടുത്ത വ്യായാമങ്ങൾക്കോ ഫാഡ് ഡയറ്റുകൾക്കോ (fad diets) പകരം വീട്ടിലുണ്ടാക്കുന്ന ലളിതമായ ഭക്ഷണങ്ങളാണ് അദ്ദേഹം പിൻതുടരുന്നത്. അദ്ദേഹം തന്റെ ദിനചര്യയിൽ പ്രോട്ടീന്റെയും പോഷകങ്ങളുടെയും പ്രധാന സ്രോതസ്സായി കടൽമത്സ്യങ്ങൾ കൂടുതലായി ഉൾപ്പെടുത്തിയിട്ടുണ്ട്.

To advertise here,

52-കാരനായ വിജയ്‌യുടെ ദൈനംദിന ഉച്ചഭക്ഷണത്തിൽ പ്രധാനമായും ചോറിനും പച്ചക്കറികൾക്കുമൊപ്പം വേവിച്ച കോഴിയിറച്ചിയോ മീനോ ആണ് ഉൾപ്പെടുത്താറുള്ളത്. എണ്ണയിൽ പൊരിച്ച വിഭവങ്ങൾക്ക് പകരം പ്രോട്ടീൻ സമ്പുഷ്ടമായ മീൻ വിഭവങ്ങൾ ഭക്ഷണത്തിൽ ഉൾപ്പെടുത്തുന്നത് ശരീരഭാരം കൂടാതെ പേശികളുടെ കരുത്ത് നിലനിർത്താൻ സഹായിക്കുന്നു. ദിവസേനയുള്ള പോഷൻ കൺട്രോൾ (portion control) ഭക്ഷണരീതി അദ്ദേഹത്തിന് ആവശ്യമായ ഊർജ്ജവും ഉന്മേഷവും പ്രദാനം ചെയ്യാൻ സഹായിക്കുന്നു. അദ്ദേഹത്തിന്റെ ഡയറ്റിൽ ഒഴിച്ചുകൂടാൻ കഴിയാത്ത മത്സ്യമാണ് സാൽമൺ. വിജയ്‌യുടെ ആരാധകരിലും ഈ വിവരം കൗതുകമുണർത്തിയിരിക്കുകയാണ്. എന്തുകൊണ്ടാണ് സാൽമൺ ഇത്രയും അദ്ദേഹത്തിന് സ്‌പെഷ്യലായിരിക്കുന്നതെന്ന്.

ഒമേഗ-3 ഫാറ്റി ആസിഡുകളുടെ ഏറ്റവും സമ്പന്നമായ പ്രകൃതിദത്ത സ്രോതസ്സുകളിൽ ഒന്നാണ് സാൽമൺ. ഈ ആരോഗ്യകരമായ കൊഴുപ്പുകൾ ഹൃദയാരോഗ്യത്തെ ശക്തിപ്പെടുത്തുകയും, വീക്കം കുറയ്ക്കാൻ സഹായിക്കുകയും ചെയ്യും. ഒപ്പം ഹൃദയ സംബന്ധമായ അസുഖങ്ങൾ വരാനുള്ള സാധ്യത കുറയ്ക്കുന്നതിനും സഹായിക്കും. എല്ലുകളുടെ ബലത്തിനും നാഡീവ്യൂഹത്തിന്റെ പ്രവർത്തനത്തിനും പ്രതിരോധശേഷി വർദ്ധിപ്പിക്കുന്നതിനും ആവശ്യമായ വിറ്റാമിനുകളാൽ സമ്പന്നമാണ് ഈ മത്സ്യം. സാൽമൺ വേഗത്തിൽ ദഹിക്കുകയും വയറിന് അസ്വസ്ഥത ഉണ്ടാക്കാതിരിക്കുകയും ചെയ്യുന്ന ഭക്ഷണമാണ്.

ഉയർന്ന നിലവാരമുള്ള പ്രോട്ടീന്റെ മികച്ച ഉറവിടം കൂടിയാണ് ഈ മത്സ്യം, പേശികളുടെ അളവ് നിലനിർത്തുന്നതിനും, വ്യായാമത്തിനുശേഷമുള്ള റിക്കവറിയ്ക്കും മൊത്തത്തിലുള്ള ശക്തി വർധിപ്പിക്കുന്നതിനും ഇത് ഗുണം ചെയ്യും.

സാൽമൺ മത്സ്യത്തിൽ സ്വാഭാവികമായും വിറ്റാമിൻ ഡി അടങ്ങിയിട്ടുണ്ട്, പലർക്കും ആവശ്യത്തിന് ലഭിക്കാത്ത ഒരു പോഷകമാണിത്. കൂടാതെ ഇത് ഗണ്യമായ അളവിൽ വിറ്റാമിൻ ബി 12 -ഉം നൽകുന്നു, ഇത് നാഡികളുടെ പ്രവർത്തനം, ഊർജ്ജ ഉത്പാദനം, ചുവന്ന രക്താണുക്കളുടെ രൂപീകരണം എന്നിവയെ ഗുണം ചെയ്യും.