സംസ്ഥാനത്ത് മഴക്കെടുതിയും വെളളപ്പൊക്കവും രൂക്ഷമാവുകയാണ്. വരും ദിവസങ്ങളിൽ മഴക്കെടുതി മൂലമുണ്ടാകുന്ന ദുരിതങ്ങൾ ജനങ്ങളെ വലയ്ക്കുമെന്ന് തീർച്ചയാണ്. ജനങ്ങളെ മാറ്റി പാർപ്പിക്കേണ്ടി വരും. ദുരിതാശ്വാസ ക്യാമ്പുകൾ ആരംഭിക്കാനും ജനങ്ങളെ ദുരിതാശ്വാസ ക്യാമ്പുകളിലേക്ക് മാറ്റാനും അവർക്ക് ഭക്ഷണവും വസ്ത്രവും എത്തിക്കാനും ഓടിയെത്തുന്ന ഒട്ടേറെ സന്നദ്ധപ്രവർത്തകരെ നമുക്ക് അവിടെ കാണുവാൻ കഴിയും. മഴക്കെടുതിക്ക് ശേഷവും ദുരിതബാധിതർക്ക് സഹായം ആവശ്യമുണ്ട്. അവരെ പിന്നീട് പുനഃരധിവസിപ്പിക്കേണ്ടതുണ്ട്. കൂടാതെ അവർക്ക് മാനസിക പിന്തുണയും വൈദ്യസഹായങ്ങളും നൽകണം. ഇങ്ങനെയുളള ഗൗരവമായ വിഷയങ്ങൾ കൈകാര്യം ചെയ്യുവാൻ സന്നദ്ധസേവകർക്ക് കഴിയില്ല, അല്ലെങ്കിൽ അവർ പോര. അതിന് പ്രൊഫഷണലായ സമീപനവും പ്ലാനിങ്ങും വേണം. ഇക്കാര്യങ്ങൾക്ക് സോഷ്യൽ വർക്കർമാരെ ആവശ്യമായി വരും. ഇവിടെയാണ് സോഷ്യൽ വർക്കിന്റെ പ്രസക്തി. അതായത് വെറും സന്നദ്ധ പ്രവർത്തനമല്ല സോഷ്യൽ വർക്ക്.

To advertise here,

സോഷ്യൽ വർക്കിൽ എല്ലാം ഉണ്ട്

സോഷ്യൽ വർക്ക് ഒരു പ്രൊഫഷണൽ പ്രോഗ്രാമാണ്. സാമൂഹിക പ്രവർത്തനം എന്നത് ഒരു തൊഴിലാക്കി മാറ്റാൻ കഴിയുന്നതും എന്നാൽ മികച്ച തൊഴിൽ സാധ്യതകളുളളതുമായ പഠന മേഖലകളിലൊന്നാണ്. സോഷ്യോളജി, ഡിസാസ്റ്റർ മാനേജ്‌മെന്റ്, സൈക്കോളജി, ഇക്കണോമിക്‌സ് പൊളിറ്റിക്‌സ്, മെഡിക്കൽ സയൻസ് മാനേജ്‌മെന്റ് എന്നിങ്ങനെ വിവിധ സയൻസ്-മാനവിക മാനേജ്‌മെന്റ് വിഷയങ്ങൾ ചേർന്ന പഠന മേഖലയാണ് സോഷ്യൽ വർക്ക്. അതുകൊണ്ട് തന്നെ വരും കാലങ്ങളിൽ സോഷ്യൽ വർക്ക് പഠിച്ചിറങ്ങുന്ന വിദ്യാർത്ഥികളെ കാത്ത് അനന്തമായ തൊഴിൽ സാധ്യതകളാണുളളത്.

സാമൂഹിക പ്രവർത്തനമൊക്കെ എന്താ ഇത്ര പഠിക്കാൻ എന്നാണ് പലരുടെയും സംശയം. പലരും വിചാരിച്ചിരിക്കുന്നത് ചാരിറ്റി പ്രവർത്തനങ്ങളോ ദാനം നൽകലോ ആണ് സോഷ്യൽ വർക്ക് എന്നാണ്. സർക്കാർ സ്ഥാപനങ്ങളും ദേശീയ-അന്തർദേശീയ സംഘടനകളും നടത്തുന്ന സാമൂഹികമായ പ്രവർത്തനങ്ങൾ, പുനരധിവാസ പരിശീലന വികസന പ്രവർത്തനങ്ങൾ, വിവിധ പ്രോജക്ടുകൾ എന്നിവ നടപ്പിലാക്കുന്നതിനും ആസൂത്രണം ചെയ്യുന്നതിനും നേതൃത്വം നൽകുന്നവരാണ് സോഷ്യൽ വർക്ക് ഒരു വിഷയമായി പഠിച്ച പ്രൊഫഷണലുകൾ. ഇത്തരം മേഖലകളിൽ പ്രവർത്തിക്കുവാൻ വേണ്ട പ്രൊഫഷണൽ നൈപുണ്യ പരിശീലനവും മാനേജ്‌മെന്റ് വൈദഗ്ധ്യവും നേടുകയാണ് കോഴ്‌സിന്റെ ലക്ഷ്യം. പ്രൊഫഷണലായുളള സോഷ്യൽ വർക്കർമാരെ സൃഷ്ടിക്കുന്ന പഠന പ്രോഗ്രാമുകൾ ബിരുദതലത്തിൽ ബി. എസ്. ഡബ്ല്യു. എന്നും ബിരുദാനന്തര ബിരുദ തലത്തിൽ എംഎസ്ഡബ്ല്യു. എന്നും അറിയപ്പെടുന്നു. പ്ലസ് ടു ജയിച്ചവർക്ക് ബിഎസ്ഡബ്ല്യുവിനും അംഗീകൃത സർവ്വകലാശാലയിൽ നിന്നും ഏതെങ്കിലും വിഷയത്തിൽ ബിരുദം നേടിയർവക്ക് എംഎസ്ഡബ്ല്യുവിനും ചേരാം.

സോഷ്യൽ വർക്ക് ഒരു പ്രൊഫഷനാണ്, ഉടൻ ജോലി ഉറപ്പ്

സമൂഹത്തോട് പ്രതിബദ്ധതയുളളവർക്കും ടീമായി ജോലി ചെയ്യുവാൻ താല്പര്യമുള്ളവർക്കും ചേർന്ന തൊഴിൽ മേഖലയാണ് സോഷ്യൽ വർക്ക്. വ്യക്തികളുടെ സാമൂഹികവും മാനസികവും ശാരീരികവുമായ പ്രശ്‌നങ്ങളും ന്യൂനതകളും പരിഹരിക്കുന്നതിന്റെ ഭാഗമായി സോഷ്യൽ വർക്കർ ജനങ്ങളുമായി ഇടപെടുന്നു. പുനരധിവാസം, വൈകാരിക പ്രശ്‌നങ്ങളുളളവർക്ക് കൗൺസലിങ്, ഡി-അഡിക്ഷൻ പ്രവർത്തനങ്ങൾ, ക്രിമിനലുകളുടെ കുറ്റവാസനകളെ ഇല്ലാതാക്കൽ, ദാരിദ്ര നിർമ്മാർജ്ജനം, തൊഴിലില്ലായ്മ ഇല്ലാതാക്കൽ, എന്നിവയെല്ലാം ഒരു സോഷ്യൽ വർക്കറുടെ ജോലികളാണ്. ചുരുക്കത്തിൽ, വ്യക്തി സാമൂഹിക തലങ്ങൾ, സാമൂഹ്യ ഇടപെടൽ, പ്രതിരോധം, പ്രശ്‌ന പരിഹാരം, വികസനം എന്നിങ്ങനെ മനുഷ്യന്റെ അടിസ്ഥാനപരമായ ആവശ്യങ്ങളോടെല്ലാം സോഷ്യൽ വർക്ക് ബന്ധപ്പെട്ടിരിക്കുന്നു.

സ്‌പെഷ്യലൈസേഷനുകൾ അനവധി

മെഡിക്കൽ ആൻഡ് സൈക്യാട്രി, ഫാമിലി ആൻഡ് ചൈൽഡ് ഡെവലപ്‌മെന്റ്, റിസോഴ്‌സ് മാനേജ്‌മെന്റ്, കോർപറേറ്റ് സോഷ്യൽ റെസ്‌പോൺസിബിലിറ്റി (സിഎസ്ആർ), ക്രിമിനോളജി, ഡിസാസ്റ്റർ മാനേജ്‌മെന്റ്, കമ്മ്യൂണിറ്റി ഡെവലപ്‌മെന്റ്, സോഷ്യൽ ഒൻട്രപ്രണർഷിപ്പ് എന്നിവയാണ് സോഷ്യൽ വർക്കിലെ പ്രധാന സ്‌പെഷ്യലൈസേഷനുകൾ. പിജി തലത്തിലാണ് സ്‌പെഷ്യലൈസേഷനുകൾ നിലവിലുള്ളത്. എന്നാൽ ശ്രീശങ്കരാചാര്യ സംസ്‌കൃത സർവ്വകലാശാല ആരഭിച്ചിരിക്കുന്ന നാല് വർഷ ബിഎസ്ഡബ്ല്യു പ്രോഗ്രാമിൽ നാല് സ്‌പെഷ്യലൈസേഷനുകൾ ഉൾപ്പെടുത്തിയിട്ടുണ്ട്. ഫാമിലി സോഷ്യൽ വർക്ക്, ഹെൽത്ത് സോഷ്യൽ വർക്ക്, ഡെവലപ്‌മെന്റ് സോഷ്യൽ വർക്ക്, ലേബർ വെൽഫെയർ & ഇൻഡസ്ട്രിയൽ സോഷ്യൽ വർക്ക് എന്നിവയാണവ.

തൊഴിൽ സാധ്യതകൾ

സന്നദ്ധ സർക്കാർ ഏജൻസികളിലും പൊതുമേഖല സ്ഥാപനങ്ങളിലും കോർപറേറ്റ് കമ്പനികളിലും സ്‌കൂൾ കോളേജുകൾ ഉൾപ്പെടെയുളള വിദ്യാഭ്യാസ സ്ഥാപനങ്ങളിലുമെല്ലാം സോഷ്യൽ വർക്കിൽ ബിരുദ ബിരുദാനന്തര ബിരുദം നേടിയവരെ ആവശ്യമാണ്. സോഷ്യൽ വർക്കിൽ യോഗ്യത നേടിയവർക്ക് സർക്കാരിതര ക്ഷേമസംഘടനകളിലും കോർപറേറ്റ് സ്ഥാപനങ്ങളിലും വെൽഫെയർ ഓഫീസർ അല്ലെങ്കിൽ സമാന തസ്തകകളിൽ നിയമനം ലഭിക്കും. ക്രിമിനോളജിസ്റ്റ്, സൈക്യാട്രിക് സോഷ്യൽ വർക്കർ, ഫാമിലി വെൽഫെയർ ഓഫീസർ, ചൈൽഡ് വെൽഫെയർ ഓഫീസർ എന്നീ ജോലികളും സോഷ്യൽ വർക്ക് ഐശ്ചികമായി പഠിച്ചിറങ്ങുന്നവരെ കാത്തിരിക്കുന്നുണ്ട്. കേന്ദ്ര സംസ്ഥാന സർക്കാരുകളുടെ വനിത ശിശു വികസന, സാമൂഹ്യനീതി വകുപ്പുകൾ, കുടുംബശ്രീ, മൾട്ടിസ്‌പെഷ്യാലിറ്റി ഹോസ്പിറ്റലുകൾ, എൻആർഎച്ച് എം, ഡി-അഡിക്ഷൻ കേന്ദ്രങ്ങൾ, കുടുംബ കോടതികൾ, വൃദ്ധസദനങ്ങൾ, സ്‌പെഷ്യൽ സ്‌കൂളുകൾ, ഭിന്നശേഷി പുനരധിവാസ കേന്ദ്രങ്ങൾ, അനാഥാലയങ്ങൾ, ക്രൈസിസ് മാനേജ്‌മെന്റ് യൂണിറ്റുകൾ, ഡിസാസ്റ്റർ മാനേജ്‌മെന്റ്, ഗ്രാമീണ വിദ്യാഭ്യാസ വികസന ഏജൻസികൾ, ആരോഗ്യ സേവന സംഘടനകൾ തുടങ്ങിയ സ്ഥാപനങ്ങളിലും സോഷ്യൽ വർക്ക് പ്രൊഫഷണലുകൾക്ക് തൊഴിൽ സാധ്യത ഏറെയാണ്.

വിദേശത്ത് അവസരങ്ങൾ അനേകം

യൂണൈറ്റഡ് നേഷൻസിന് (യുഎൻ) കീഴിലുളള വിവിധ സംഘടനകളിൽ സോഷ്യൽ വർക്ക് പ്രൊഫഷണലുകൾക്ക് അനേകം തൊഴിലവസരങ്ങളുണ്ട്. വളരെയധികം വിദേശ കുടിയേറ്റ സാധ്യതയുളള പഠന മേഖലയാണ് സോഷ്യൽ വർക്ക്. വിദേശ രാജ്യങ്ങളിൽ സോഷ്യൽ വർക്കറായി ജോലി ചെയ്യുവാൻ ലൈസൻസ് ആവശ്യമാണ്. ഈ രാജ്യങ്ങളിലെ നിയമനടപടികൾ പ്രകാരം ഓരോ വർഷവും ലൈസൻസ് എടുക്കുകയും പുതുക്കുകയും ചെയ്യാം. ബിഎസ്ഡബ്ല്യുവിന് ശേഷമാണ് എംഎസ്ഡബ്ല്യു എടുക്കുന്നതെങ്കിൽ ഇന്റേൺഷിപ്പ് കാലയളവിലെ പരിചയം കണക്കിലെടുത്ത് ജോലി പരിചയം ഇല്ലാതെ തന്നെ പല വിദേശ രാജ്യങ്ങളും (ഐഇഎൽടിഎസ് യോഗ്യതയുണ്ടെങ്കിൽ) തൊഴിൽ വിസ നൽകുന്നുണ്ട്.

സംസ്‌കൃത സർവ്വകലാശാലയിൽ ബിഎസ്ഡബ്ല്യുവിന് അപേക്ഷിക്കാം

ശ്രീശങ്കരാചാര്യ സംസ്‌കൃത സർവ്വകലാശാലയുടെ കാലടി മുഖ്യകാമ്പസിലും തിരൂർ, പയ്യന്നൂർ പ്രാദേശിക കാമ്പസുകളിലും നാല് വർഷ ബിഎസ്ഡബ്ല്യു പ്രോഗ്രാമിലേയ്ക്ക് ഇപ്പോൾ അപേക്ഷിക്കാം. പ്ലസ് ടു/വൊക്കേഷണൽ ഹയർ സെക്കണ്ടറി അഥവാ തത്തുല്ല്യ അംഗീകൃത യോഗ്യതയുള്ളവർക്ക് (രണ്ട് വർഷം) അപേക്ഷിക്കാം. നാല് വർഷ ബിരുദ പ്രോഗ്രാമുകൾക്ക് ലാറ്ററൽ എൻട്രി അനുവദനീയമാണ്. മറ്റൊരു യുജി പ്രോഗ്രാം വിജയകരമായി പൂർത്തിയാക്കിയിട്ടുളളവർക്കും സർവകലാശാല നിശ്ചയിച്ചിട്ടുള്ള മാനദണ്ഡങ്ങളുടെ അടിസ്ഥാനത്തിൽ ഈ നാല് വർഷ ബിരുദ പ്രോഗ്രാമിലേയ്ക്ക് സർവകലാശാലയുടെ അംഗീകാരത്തോടെ അപേക്ഷിക്കാവുന്നതാണ്. അപേക്ഷ ഫീസ് ജനറൽ / എസ്ഇബിസി വിദ്യാർത്ഥികൾക്ക് ഓരോ പ്രോഗ്രാമിനും 60 രൂപയും എസ്‌സി / എസ്ടി വിദ്യാർഥികൾക്ക് ഓരോ പ്രോഗ്രാമിനും 30 രൂപയുമാണ്. ബിഎസ്ഡബ്ല്യു പ്രവേശനത്തിനുളള ഉയർന്ന പ്രായപരിധി ജനറൽ / എസ്ഇബിസി വിദ്യാർഥികൾക്ക് 2026 ജനുവരി ഒന്നിന് 23 വയസും എസ്‌സി / എസ്ടി വിദ്യാർഥികൾക്ക് 25 വയസുമാണ്.

ഓൺലൈൻ അപേക്ഷകൾ ജൂൺ 15 വരെ

സർവ്വകലാശാല വെബ്‌സൈറ്റ് (https://ug.ssus.ac.in/) വഴി അപേക്ഷകൾ ഓൺലൈനായി സമർപ്പിക്കേണ്ട അവസാന തീയതി ജൂൺ 15. പ്രൊസ്‌പെക്ടസ് സർവ്വകലാശാലയുടെ വെബ്‌സൈറ്റിൽ പ്രസിദ്ധീകരിച്ചിട്ടുണ്ട്. വിശദ വിവരങ്ങൾക്കും പ്രോസ്പക്ടസിനും ഓൺലൈനായി അപേക്ഷിക്കുവാനും www.ssus.ac.in സന്ദർശിക്കുക. ഓൺലൈൻ ആപ്ലിക്കേഷൻ നൽകാനുള്ള ലിങ്ക്: https://ug.ssus.ac.in/