കേരള ടീച്ചര്‍ എലിജിബിലിറ്റി ടെസ്റ്റ് (കെ-ടെറ്റ്) എഴുതുന്നതില്‍നിന്ന് ആരെയൊക്കെയാണ് ഒഴിവാക്കിയത്?-ജയ, പത്തനംതിട്ട

To advertise here,

നാലുവിഭാഗങ്ങളിലാണ് കേരള ടീച്ചര്‍ എലിജിബിലിറ്റി ടെസ്റ്റ് (കെ-ടെറ്റ്) നടത്തുന്നത്. ലോവര്‍പ്രൈമറി സ്‌കൂള്‍, അപ്പര്‍പ്രൈമറി സ്‌കൂള്‍, ഹൈസ്‌കൂള്‍ എന്നിവിടങ്ങളില്‍ അധ്യാപകരാകാന്‍ ആഗ്രഹിക്കുന്നവര്‍ യഥാക്രമം I, ll, III എന്നീ കാറ്റഗറികളില്‍ പരീക്ഷയെഴുതണം. കാറ്റഗറി IV, ഭാഷാധ്യാപകര്‍, സ്‌പെഷ്യലിസ്റ്റ് അധ്യാപകര്‍ എന്നിവരാകാന്‍ ആഗ്രഹിക്കുന്നവര്‍ക്കാണ്.

അപേക്ഷിക്കാന്‍ കാറ്റഗറിയനുസരിച്ച് ഹയര്‍ സെക്കന്‍ഡറി/ബിരുദ യോഗ്യതയ്‌ക്കൊപ്പം എജ്യുക്കേഷനുമായി ബന്ധപ്പെട്ട ഒരു ഡിപ്ലോമ/ഡിഗ്രി വേണം. മാര്‍ക്കുവ്യവസ്ഥയും ഉണ്ടാകും. പക്ഷേ, ചില യോഗ്യത/ബിരുദം നേടിയവരെ കെ-ടെറ്റ് യോഗ്യതനേടുന്നതില്‍നിന്ന് ഒഴിവാക്കിയിട്ടുണ്ട്.

പ്രൈമറിഘട്ടത്തിനുള്ള സെന്‍ട്രല്‍ ടീച്ചര്‍ എലിജിബിലിറ്റി ടെസ്റ്റ് (സി.ടി.ഇ.ടി.) യോഗ്യതയുള്ളവരെ, കെ-ടെറ്റ് കാറ്റഗറി I യോഗ്യതനേടുന്നതില്‍നിന്ന് എലമെന്ററിഘട്ട സി.ടി.ഇ.ടി. യോഗ്യതയുള്ളവരെ കെ-ടെറ്റ് കാറ്റഗറി II യോഗ്യത നേടുന്നതില്‍നിന്ന് ഒഴിവാക്കിയിട്ടുണ്ട്.

ഗവേഷണ ഫെലോഷിപ്പിനും കോളേജ്/സര്‍വകലാശാല അധ്യാപകനിയമനത്തിനുമായുള്ള നാഷണല്‍ എലിജിബിലിറ്റി ടെസ്റ്റ് (നെറ്റ്), ഹയര്‍ സെക്കന്‍ഡറി അധ്യാപക നിയമനത്തിനായുള്ള സ്റ്റേറ്റ് എലിജിബിലിറ്റി ടെസ്റ്റ് (സെറ്റ്), മാസ്റ്റര്‍ ഓഫ് ഫിലോസഫി (എം.ഫില്‍.), ഡോക്ടര്‍ ഓഫ് ഫിലോസഫി (പിഎച്ച്.ഡി.), മാസ്റ്റര്‍ ഓഫ് എജ്യുക്കേഷന്‍ (എം.എഡ്.) ബിരുദം തുടങ്ങിയ യോഗ്യതയുള്ളവരെ കെ-ടെറ്റ് I മുതല്‍ IV വരെ കാറ്റഗറികളില്‍ യോഗ്യത നേടുന്നതില്‍നിന്ന് ഒഴിവാക്കിയിട്ടുണ്ട്.

കെ-ടെറ്റ് കാറ്റഗറി III ജയിച്ചവരെ കാറ്റഗറി II യോഗ്യത നേടുന്നതില്‍നിന്ന് ഒഴിവാക്കിയിട്ടുണ്ട്. കാറ്റഗറി l, Il എന്നിവയിലൊന്നില്‍ കെ-ടെറ്റ് യോഗ്യതയുള്ളവരെ ലോവര്‍ പ്രൈമറി/അപ്പര്‍ പ്രൈമറി അധ്യാപക നിയമനത്തിന് പരിഗണിക്കാം. ഇവരെയൊക്കെയാണ് നിലവില്‍ കെ-ടെറ്റ് യോഗ്യത നേടുന്നതില്‍നിന്ന് ഒഴിവാക്കിയത്.