മുസാഫർ നഗർ: യുട്യൂബറും ഹരിയാൻവി ഗായകനുമായ അങ്കിത് ബല്യാൻ അഞ്ജാതരുടെ വെടിയേറ്റ് കൊല്ലപ്പെട്ടു. ഉത്തർപ്രദേശിലെ ഷാംലി ജില്ലയിലെ കോട്വാളി സ്‌റ്റേഷൻ പരിധിയിലെ ജിമ്മിനു പുറത്തുവെച്ചാണ് സംഭവം. രണ്ട് ബൈക്കുകളിലായെത്തിയ അജ്ഞാതരായ അക്രമികൾ, ജിം കഴിഞ്ഞു പുറത്തുവന്ന അങ്കിത്തിനുനേരെ വെടിയുതിർക്കുകയായിരുന്നു. അങ്കിത് സംഭവസ്ഥലത്തുവെച്ചുതന്നെ മരിച്ചു. മൃതദേഹം പോസ്റ്റ്‌മോർട്ടത്തിനായി മാറ്റി.

To advertise here,

അക്രമികൾ 18 റൗണ്ട് വെടിയുതിർത്തതായി പോലീസ് അറിയിച്ചു. തലയ്ക്കും വയറിനുമാണ് വെടിയേറ്റത്. സംഭവത്തിൽ അന്വേഷണം ആരംഭിച്ച പോലീസ് സിസിടിവി. ദൃശ്യങ്ങൾ കേന്ദ്രീകരിച്ചുള്ള പരിശോധനയിലാണെന്ന് ഷാംലി എസ്.പി. എം.പി. സിങ് അറിയിച്ചു. ജിമ്മിൽനിന്നിറങ്ങി തന്റെ സ്‌കോർപിയോ എസ് യു വി വാഹനത്തിലേക്ക് നടന്നുനീങ്ങുമ്പോഴായിരുന്നു സംഭവം. നാലംഗ സംഘമാണ് ആക്രമണം നടത്തിയതെന്നാണ് വിവരം.

അടുത്തിടെ നടക്കാനിരിക്കുന്ന പഞ്ചായത്ത് തിരഞ്ഞെടുപ്പിൽ മത്സരിക്കാൻ അങ്കിത് ബല്യാൻ പദ്ധതിയിട്ടിരുന്നതായി അഭ്യൂഹങ്ങളുണ്ട്. ഇത് കൊലപാതകത്തിന് കാരണമായോ എന്നതിൽ പോലീസോ ബന്ധുക്കളോ ഔദ്യോഗിക സ്ഥിരീകരണം നൽകിയിട്ടില്ല. അതേസമയം കൊലപാതകത്തിന്റെ ഉത്തരവാദിത്വം ഗോഗി ഗ്യാങ് എന്ന കുറ്റവാളി സംഘം ഏറ്റെടുത്തിട്ടുണ്ട്. ഗ്യാങ്ങുമായി ബന്ധമുള്ള ഭോലു ഷാപൂരിയ എന്നയാളുടെ ഇൻസ്റ്റഗ്രാം അക്കൗണ്ടിലൂടെയാണ് കൊലപാതകത്തിന്റെ ഉത്തരവാദിത്വം ഏറ്റെടുത്തുകൊണ്ടുള്ള പോസ്റ്റ് പ്രത്യക്ഷപ്പെട്ടത്. തങ്ങളുടെ ശത്രുക്കളുമായി അങ്കിത് ബന്ധം പുലർത്തിയിരുന്നതായും തങ്ങളുടെ ഗ്യാങ്ങുമായി ബന്ധപ്പെട്ട ഒരു സംഭവത്തെക്കുറിച്ച് അദ്ദേഹം പാട്ടുപാടിയിരുന്നതായും ആരോപിച്ചാണ് ഈ ആക്രമണം നടത്തിയതെന്നും ഗ്യാങ് വ്യക്തമാക്കുന്നു.

കൊലപാതകം ജാട്ട് സമുദായത്തിനുനേരെ നടന്ന ആക്രമണമാണെന്ന് സമാജ്‌വാദി പാർട്ടി അധ്യക്ഷനും മുൻ യു.പി. മുഖ്യമന്ത്രിയുമായ അഖിലേഷ് യാദവ് പറഞ്ഞു. പിന്നിലെ രാഷ്ട്രീയ ശത്രുതയക്കുറിച്ച് പ്രത്യേക അന്വേഷണം വേണം. അക്രമികളെ ഉടനടി അറസ്റ്റുചെയ്യണമെന്നും അദ്ദേഹം ആവശ്യപ്പെട്ടു. യുട്യൂബിൽ 3.66 ലക്ഷത്തിലധികം സബ്സ്‌ക്രൈബേഴ്‌സുള്ള കലാകാരനായിരുന്നു അങ്കിത്. സഹപ്രവർത്തകർക്കൊപ്പം ഗായകനായും പെർഫോമറായും അദ്ദേഹം വീഡിയോകളിൽ പ്രത്യക്ഷപ്പെട്ടിരുന്നു. തോക്കുകളും മറ്റു ആയുധങ്ങളും എസ്.യു.വി.കളും ഉപയോഗിച്ചുള്ളതാണ് അദ്ദേഹത്തിന്റേതായുള്ള പല വീഡിയോകളും.