കല്പറ്റ : ഫെയ്സ്ബുക്കിൽ വ്യാജ പ്രൊഫൈൽ നിർമിച്ച് സൗഹൃദം സ്ഥാപിച്ച് പണംതട്ടിയ കേസിൽ ഒരാൾ അറസ്റ്റിൽ. കോഴിക്കോട് മേപ്പയൂർ ആവള, മണമ്മൽ വീട്ടിൽ ലത്തീഫ് (45) ആണ് അറസ്റ്റിലായത്. ഫെയ്സ്ബുക്കിൽ വ്യാജമായി സ്ത്രീയുടെ പേരിൽ പ്രൊഫൈലുണ്ടാക്കി ചികിത്സാസഹായമെന്ന പേരിൽ വയനാട് സ്വദേശിയിൽനിന്ന് 15 ലക്ഷത്തിലധികം രൂപ തട്ടിയെടുത്ത കേസിലാണ് അറസ്റ്റ്.
2025 നവംബർ 12-നായിരുന്നു തട്ടിപ്പിന്റെ തുടക്കം. 'സഫ്ന' എന്ന പേരിലുള്ള ഫെയ്സ്ബുക്ക് പേജിൽ ഒരു കുട്ടിയുടെ ചികിത്സാസഹായം അഭ്യർഥിച്ചുകൊണ്ടുള്ള പോസ്റ്റ് കണ്ട പിണങ്ങോട് സ്വദേശി ആദ്യം 1,000 രൂപ ഗൂഗിൾപേ വഴി നൽകിയിരുന്നു. വിദേശത്ത് സിവിൽ എൻജിനിയറാണെന്ന് സ്വയം പരിചയപ്പെടുത്തിയ 'സഫ്ന', നാട്ടിലുള്ള സുഹൃത്തായ ലത്തീഫിന്റെ അക്കൗണ്ടിലേക്കാണ് പണം അയക്കാൻ നിർദേശിച്ചത്. തുടർന്ന് സഫ്ന എന്ന വ്യാജപേരിലും ലത്തീഫ് എന്ന സ്വന്തം പേരിലും വ്യത്യസ്ത നമ്പറുകളിൽ നിന്നും പ്രതി പരാതിക്കാരനുമായി നിരന്തരം ചാറ്റ് ചെയ്ത് അടുപ്പം സ്ഥാപിച്ചു.
സഫ്ന എന്ന സ്ത്രീ യഥാർഥത്തിൽ ഉണ്ടെന്നു വിശ്വസിപ്പിച്ച പ്രതി, ഇരുവരുടെയും ചികിത്സാ ആവശ്യങ്ങൾക്കെന്ന പേരിൽ തിരികേ നൽകാമെന്ന് വാഗ്ദാനംചെയ്ത് പല ഘട്ടങ്ങളിലായി ഗൂഗിൾപേ വഴിയും ബാങ്ക് അക്കൗണ്ട് വഴിയും 15,07,850 രൂപ കൈക്കലാക്കുകയായിരുന്നു. വീണ്ടും 50,000 രൂപ കൂടി ആവശ്യപ്പെട്ടതോടെ സംശയം തോന്നിയ പരാതിക്കാരൻ പണം തിരികേ ചോദിച്ചു. ഇതോടെ പ്രതി ഭീഷണിപ്പെടുത്തുകയായിരുന്നു.
2026 സെപ്റ്റംബർ 19-ന് ലഭിച്ച പരാതി പ്രകാരം കല്പറ്റ പോലീസ് കേസെടുത്ത് അന്വേഷണം ആരംഭിച്ചു. അന്വേഷണത്തിൽ 'സഫ്ന' എന്ന വ്യാജ പ്രൊഫൈലും ലത്തീഫിന്റെ അക്കൗണ്ടും ഒരേ മൊബൈൽ ഫോണിൽനിന്നാണ് പ്രവർത്തിച്ചിരുന്നതെന്നും സിം കാർഡുകൾ ലത്തീഫിന്റെ പേരിലുള്ളതാണെന്നും പോലീസ് കണ്ടെത്തി. നവംബർ 14-ന് ആവളയിൽവെച്ച് ഇയാളെ കസ്റ്റഡിയിലെടുത്തത്.
അറസ്റ്റു രേഖപ്പെടുത്തി കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. ഇയാൾ മുൻപും സമാനമായ തട്ടിപ്പ് കേസുകളിൽ ഉൾപ്പെട്ടിട്ടുണ്ട്. 2023-ൽ തൃശ്ശൂർ റൂറൽ സൈബർ ക്രൈംപോലീസ് സ്റ്റേഷൻ പരിധിയിൽ 'നദീറഷാൻ' എന്ന വ്യാജ ഫെയ്സ്ബുക്ക് പ്രൊഫൈൽ വഴി കാൻസർ ചികിത്സയ്ക്കെന്ന പേരിൽ 21.72 ലക്ഷം രൂപ തട്ടിയെടുത്ത കേസിൽ ഇയാൾ പിടിയിലായിരുന്നു. കേസിൽ ജാമ്യത്തിലിറങ്ങി വീണ്ടും തട്ടിപ്പ് നടത്തുകയായിരുന്നു.
കൂടാതെ മേപ്പയൂർ പോലീസ് സ്റ്റേഷനിലും ഇയാളുടെ പേരിൽ മറ്റു കേസുകൾ നിലവിലുണ്ട്. കല്പറ്റ ഇൻസ്പെക്ടർ എസ്.എച്ച്.ഒ. എ.യു. ജയപ്രകാശിന്റെ നേതൃത്വത്തിൽ എസ്.ഐ. വി.എം. രമേശ്, സിവിൽ പോലീസ് ഓഫീസർമാരായ ടി.എച്ച്. നാസർ, കെ. അഫ്സ് എന്നിവരടങ്ങുന്ന സംഘമാണ് പ്രതിയെ പിടികൂടിയത്.
Content Highlights: Latheef (45) arrested by Kalpetta police for a ₹15+ lakh cyber fraud., Used a fake Facebook profile named 'Safna' claiming a medical emergency for a child., Previously arrested in 2023 by Thrissur rural cyber crime police for a similar ₹21.72 lakh scam., Police investigation revealed both the fake profile and real account operated from the same mobile phone.
Published: 17 Nov 2026, 08:24 am IST
Related Topics
മാതൃഭൂമി.കോം വാട്സാപ്പിലും
വാര്ത്തകളോടു പ്രതികരിക്കുന്നവര് അശ്ലീലവും അസഭ്യവും നിയമവിരുദ്ധവും അപകീര്ത്തികരവും സ്പര്ധ വളര്ത്തുന്നതുമായ പരാമര്ശങ്ങള് ഒഴിവാക്കുക. വ്യക്തിപരമായ അധിക്ഷേപങ്ങള് പാടില്ല. ഇത്തരം അഭിപ്രായങ്ങള് സൈബര് നിയമപ്രകാരം ശിക്ഷാര്ഹമാണ്. വായനക്കാരുടെ അഭിപ്രായങ്ങള് വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..



Most Commented