തിരുവനന്തപുരം: പൊതുവിദ്യാലയങ്ങളില്‍ വിദ്യാര്‍ഥികളുടെ എണ്ണം കുറഞ്ഞതോടെ, ഈ അധ്യയനവര്‍ഷം ഇല്ലാതാവുന്നത് നാലായിരത്തിലേറെ അധ്യാപക തസ്തികകള്‍. അധ്യയനവര്‍ഷാരംഭത്തിലെ ആറാം പ്രവൃത്തിദിനത്തില്‍ കുട്ടികളുടെ കണക്കെടുത്തപ്പോള്‍ ഇത്തവണ മുന്‍വര്‍ഷത്തെക്കാള്‍ ഒന്നേകാല്‍ ലക്ഷത്തിലേറെ കുട്ടികളുടെ കുറവാണ് രേഖപ്പെടുത്തിയത്. തസ്തിക നിര്‍ണയ റിപ്പോര്‍ട്ട് ഇതുവരെ ഔദ്യോഗികമായി പുറത്തുവിട്ടിട്ടില്ല.
വിദ്യാഭ്യാസവകുപ്പ് തയ്യാറാക്കിയ കണക്കനുസരിച്ച് ഈ വര്‍ഷം ഒന്നുമുതല്‍ 10 വരെയുള്ള ക്ലാസുകളില്‍ 3400 ഡിവിഷനുകള്‍ ഇല്ലാതാവും. സര്‍ക്കാര്‍ പ്രൈമറി സ്‌കൂളുകളില്‍മാത്രം 715 തസ്തികകള്‍ നഷ്ടപ്പെടും.
ഹൈസ്‌കൂളില്‍ ഇംഗ്ലീഷ് അധ്യാപകരെ പ്രത്യേകം നിയമിക്കാന്‍ ഹൈക്കോടതി ഉത്തരവിട്ടതനുസരിച്ചുള്ള ഡിവിഷന്‍ നിര്‍ണയം പുരോഗമിക്കുകയാണ്. അതിനാല്‍ അന്തിമ റിപ്പോര്‍ട്ടിന്റെ ഭാഗമായി കുട്ടികളുടെ എണ്ണത്തിലും അധ്യാപക തസ്തികകളിലും ഏറ്റക്കുറച്ചിലുകള്‍ വന്നേക്കുമെന്ന് വിദ്യാഭ്യാസവകുപ്പ് അധികൃതര്‍ പറഞ്ഞു.
ഒന്നാംക്ലാസില്‍ ചേര്‍ന്ന കുട്ടികളുടെ എണ്ണത്തില്‍ മുന്‍വര്‍ഷത്തെക്കാള്‍ 7163 പേരുടെ കുറവാണുണ്ടായത്. 2023-24-ല്‍ 2,58,149 കുട്ടികള്‍ പൊതുവിദ്യാലയങ്ങളില്‍ ഒന്നാംക്ലാസില്‍ ചേര്‍ന്നിരുന്നു. ഈ വര്‍ഷം ഇത് 2,50,986 പേരായി കുറഞ്ഞു.
രണ്ടുമുതലുള്ള ക്ലാസുകളില്‍ പുതുതായി ചേരുന്ന കുട്ടികളുടെ എണ്ണവും കുറഞ്ഞതോടെ, പൊതുവിദ്യാലയങ്ങളിലെ കുട്ടികളുടെ എണ്ണം മുന്‍വര്‍ഷത്തെക്കാള്‍ കുറവാണ് രേഖപ്പെടുത്തിയത്. എയ്ഡഡ് സ്‌കൂളുകളിലെ അധ്യാപകരെ മറ്റു സ്‌കൂളുകളിലേക്ക് പുനര്‍വിന്യസിക്കാമെങ്കിലും സര്‍ക്കാര്‍ സ്‌കൂളുകളില്‍ തസ്തിക നഷ്ടപ്പെടുന്നവരെ സംരക്ഷിച്ചുനിര്‍ത്തേണ്ടിവരുമെന്നതാണ് സ്ഥിതി.
സര്‍ക്കാര്‍ സ്‌കൂളില്‍ കഴിഞ്ഞവര്‍ഷം ഒന്നുമുതല്‍ 10 വരെയുള്ള ക്ലാസുകളില്‍ 12.23 ലക്ഷം കുട്ടികളുണ്ടായിരുന്നു. ഈ വര്‍ഷമുള്ളത് 11.60 ലക്ഷമാണ്. എയ്ഡഡ് സ്‌കൂളില്‍ കഴിഞ്ഞവര്‍ഷം 21.81 ലക്ഷമായിരുന്നത് ഈ വര്‍ഷം 21.27 ലക്ഷവുമായി. എയ്ഡഡിനെ അപേക്ഷിച്ച് സര്‍ക്കാര്‍ സ്‌കൂളില്‍ കുട്ടികളുടെ എണ്ണം കുറയുമ്പോള്‍ ആനുപാതികമായി അധ്യാപക തസ്തികകളില്‍ വലിയ നഷ്ടമുണ്ടാവും. ഇതു സര്‍ക്കാരിനു ബാധ്യതയും കൂട്ടും.
ഹയര്‍സെക്കന്‍ഡറിയിലും തസ്തികഭീഷണി
ഹയര്‍സെക്കന്‍ഡറി സ്‌കൂളുകളില്‍ സര്‍ക്കാര്‍ തസ്തികനിര്‍ണയം നടത്തിയപ്പോള്‍ ഭീഷണി നേരിടുന്നത് 350 അധ്യാപകര്‍. 2023-24 അധ്യയനവര്‍ഷത്തെ തസ്തികനിര്‍ണയമാണ് പൂര്‍ത്തീകരിച്ചത്.
പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം ജില്ലകളില്‍ കുട്ടികള്‍ കുറഞ്ഞെന്നാണ് കണക്കുകള്‍. ഇവിടങ്ങളില്‍ 25 കുട്ടികള്‍പോലുമില്ലാത്ത ഒട്ടേറെ ബാച്ചുകളുണ്ടെന്നും കണ്ടെത്തി. ഈ ജില്ലകളിലെ സ്‌കൂളുകളില്‍ 350 അധ്യാപകര്‍ തസ്തികപ്രശ്‌നം നേരിടുന്നുണ്ടെന്നാണ് വിലയിരുത്തല്‍.
Content Highlights: 4000 teacher posts will be eliminated-kerala government schools
Published: 19 Oct 2024, 11:47 am IST
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented