ഏറെ പ്രതീക്ഷയോടെ കാത്തിരുന്ന XEV 9S-നെ മഹീന്ദ്ര വിപണിയിൽ അവതരിപ്പിച്ചു. 19.95 ലക്ഷം രൂപയുടെ (എക്സ്-ഷോറൂം) ആമുഖ വിലയിലാണ് വാഹനം പുറത്തിറക്കിയത്. മഹീന്ദ്രയുടെ ആദ്യത്തെ 7-സീറ്റർ ഇലക്ട്രിക് എസ്‌യുവിയായി സ്ഥാനം പിടിക്കുന്ന XEV 9S, ബ്രാൻഡിന്റെ ബോൺ-ഇവി INGLO പ്ലാറ്റ്‌ഫോമിലാണ് നിർമിച്ചിരിക്കുന്നത്.

To advertise here,

അടിസ്ഥാന ഘടന പങ്കിടുമ്പോഴും XEV 9e-യെക്കാൾ 1.95 ലക്ഷം രൂപ കുറവാണെന്നത് ശ്രദ്ധേയമാണ്. വാഹനത്തിന്റെ ബുക്കിങ് 2026 ജനുവരി 14-നും ഡെലിവറി 2026 ജനുവരി 23-നും തുടങ്ങും.

എക്സ്റ്റീരിയർ ഡിസൈൻ

2022-ൽ പ്രദർശിപ്പിച്ച XEV 9e, XUV.e8 കൺസെപ്റ്റുകളിൽനിന്ന് പ്രചോദനം ഉൾക്കൊണ്ടാണ് XEV 9S-ന്റെ ഡിസൈൻ. ഒറ്റനോട്ടത്തിൽ XUV 700 മോഡലിനോടാണ് ഏറെ സാമ്യം. മുൻവശത്ത്, അടഞ്ഞ ഗ്രില്ലും കണക്റ്റഡ് എൽഇഡി ഡിആർഎല്ലുകളും ത്രികോണാകൃതിയിലുള്ള എൽഇഡി ഹെഡ്‌ലാമ്പുകളും XEV 9S-ന് ഒരു പ്രത്യേക ഇവി പരിവേഷം നൽകുന്നു. നീളമേറിയ ബോണറ്റും മസ്കുലർ ഫെൻഡറുകളും വാഹനത്തിന്റെ ലുക്ക് വർധിപ്പിക്കുന്നു.

2,762 എംഎം വീൽബേസും മുൻഭാഗത്തും പിൻഭാഗത്തുമുള്ള വലിയ ഓവർഹാംഗുകളും അകത്തെ സ്ഥലസൗകര്യം വർധിപ്പിക്കുന്നു. ഇത് ഒരു യഥാർഥ ത്രീ-റോ ഇലക്ട്രിക് എസ്‌യുവിക്ക് അത്യാവശ്യമാണ്. സ്മോക്ക്ഡ് എൽഇഡി ടെയിൽ ലാമ്പുകളാണുള്ളത്. INGLO പ്ലാറ്റ്‌ഫോമിലുള്ള ഇലക്ട്രിക് മോഡലുകൾക്ക് മാത്രമുള്ള മഹീന്ദ്രയുടെ പുതിയ ബട്ടർഫ്ലൈ ചിഹ്നവും ഈ എസ്‌യുവിക്ക് ലഭിക്കുന്നു.

205 എംഎം ഗ്രൗണ്ട് ക്ലിയറൻസ് ഉള്ള XEV 9S, ഒരു മികച്ച എസ്‌യുവിയിൽ നിന്ന് പ്രതീക്ഷിക്കുന്ന അനുപാതങ്ങളും പ്രായോഗികതയും നിലനിർത്തുന്നു. സ്റ്റോറേജ് സൗകര്യവും എടുത്തുപറയേണ്ട ഒന്നാണ്. സെഗ്‌മെന്റിലെ ഏറ്റവും മികച്ച 150 ലിറ്റർ ഫ്രങ്കും(മുൻവശത്തെ സ്റ്റോറേജ്), മൂന്നാം നിര മടക്കിവെച്ചാൽ 527 ലിറ്റർ വരെ ബൂട്ട് സ്പേസും ഇതിനുണ്ട്.

ഇന്റീരിയർ ഡിസൈൻ

അകത്തളത്തിൽ, ശാന്തവും ആകർഷകവുമായ ഒരു ഇടം ഒരുക്കാനാണ് XEV 9S ലക്ഷ്യമിടുന്നത്. ഡാഷ്‌ബോർഡിൽ ഉടനീളം വ്യാപിച്ചുകിടക്കുന്ന കോസ്റ്റ്-ടു-കോസ്റ്റ് ട്രിപ്പിൾ-സ്ക്രീൻ ലേഔട്ട് മനോഹരമാണ്. ഇതിൽ ഒരു ഡിജിറ്റൽ ഡ്രൈവർ ഡിസ്‌പ്ലേ, ഒരു സെൻട്രൽ ഇൻഫോടെയ്ൻമെന്റ് ടച്ച്‌സ്‌ക്രീൻ, യാത്രക്കാർക്കായി ഒരു പ്രത്യേക ഡിസ്‌പ്ലേ എന്നിവ ഉൾപ്പെടുന്നു. പിന്നിലെ യാത്രക്കാർക്കായി രണ്ട് അധിക സ്‌ക്രീനുകളും, BYOD (Bring Your Own Device) മൗണ്ടിങ് സൗകര്യവും ക്യാബിനെ വിനോദത്തിന് അനുയോജ്യമായ ഒരിടമാക്കി മാറ്റുന്നു.

പനോരമിക് സൺറൂഫ്, സോഫ്റ്റ്-ടച്ച് പാനലുകൾ, പുറത്തുനിന്നുള്ള ശബ്ദം ഗണ്യമായി കുറയ്ക്കുന്ന ലാമിനേറ്റഡ് അക്കോസ്റ്റിക് ഗ്ലാസ് എന്നിവ മികച്ച അനുഭവം നൽകുന്നു. അടിസ്ഥാന വേരിയന്റുകളിൽ പോലും മികച്ച സൗകര്യങ്ങൾ ഒരുക്കിയിട്ടുണ്ട്. സ്ലൈഡിങ്, റിക്ലൈനിങ് രണ്ടാം നിര സീറ്റുകൾ, തുറക്കാവുന്ന പനോരമിക് സൺറൂഫ്, വയർലെസ് ഫോൺ ചാർജിങ് എന്നിവയും ഉൾപ്പെടുന്നു.

ഉയർന്ന വേരിയന്റുകളിൽ ഡോൾബി അറ്റ്‌മോസുള്ള 16-സ്പീക്കർ ഹർമൻ കാർഡൺ സിസ്റ്റം, ഡ്യുവൽ-സോൺ ക്ലൈമറ്റ് കൺട്രോൾ, ലെതറെറ്റ് അപ്ഹോൾസ്റ്ററി, മൾട്ടി-കളർ ആംബിയന്റ് ലൈറ്റിങ്, എആർ അടിസ്ഥാനമാക്കിയുള്ള വിഷൻഎക്സ് ഹെഡ്-അപ്പ് ഡിസ്‌പ്ലേ തുടങ്ങിയ പ്രീമിയം ഫീച്ചറുകളുമുണ്ട്.

കോ-ഡ്രൈവർ ബോസ് മോഡ്, മുൻ-പിൻ നിരകളിലെ വെന്റിലേറ്റഡ് സീറ്റുകൾ, രണ്ടാം നിരയിലെ സൺഷെയ്ഡുകൾ തുടങ്ങിയ പ്രായോഗികമായ കൂട്ടിച്ചേർക്കലുകൾ ക്യാബിനിലെ ഉപയോഗക്ഷമതയും സൗകര്യവും വർധിപ്പിക്കുന്നു.

റേഞ്ച്, ബാറ്ററി, ചാർജിങ്

നാല് ട്രിമ്മുകളിലായി 59kWh, 70kWh, 79kWh എന്നിങ്ങനെ മൂന്ന് ബാറ്ററി പാക്കുകളാണുള്ളത്. ഇവയെല്ലാം 175kW വരെയുള്ള ഫാസ്റ്റ് ചാർജിങ് പിന്തുണയ്ക്കുന്നു. എൻട്രി ലെവൽ പാക്ക് വൺ എബൗ വേരിയന്റിന് 59kWh, 79kWh ഓപ്ഷനുകളുണ്ട്. ഇവ രണ്ടും റിയർ-വീൽ ഡ്രൈവാണ്. 79kWh ബാറ്ററിയുള്ള XEV 9S പാക്ക് വൺ എബൗ വേരിയന്റിന് 21.95 ലക്ഷം രൂപയാണ് വില. 59kWh ബാറ്ററിയുള്ള XEV 9S-ന് ARAI പ്രകാരം 521 കിലോമീറ്ററാണ് റേഞ്ച്. അതേസമയം 79kWh-ന്റെ എല്ലാ വേരിയന്റുകൾക്കും 679 കിലോമീറ്റർ ARAI റേഞ്ച് ലഭിക്കും.

മിഡ്-സ്പെക്ക് പാക്ക് ടു എബൗ ട്രിമ്മിന് പുതിയ 70kWh ബാറ്ററി പാക്ക് (600 കിലോമീറ്റർ ARAI റേഞ്ച്) ലഭിക്കുന്നു, ഇതിന് 24.45 ലക്ഷം രൂപയാണ് വില. 79kWh പതിപ്പിന് 25.45 ലക്ഷം രൂപയും. ടോപ്പ്-സ്പെക്ക് XEV 9S പാക്ക് ത്രീ, പാക്ക് ത്രീ എബൗ എന്നിവ 79kWh ബാറ്ററി പാക്കിൽ മാത്രമേ ലഭ്യമാകൂ, ഇവയ്ക്ക് യഥാക്രമം 27.35 ലക്ഷം രൂപയും 29.45 ലക്ഷം രൂപയുമാണ് വില.

7.2kW ചാർജറിന് 50,000 രൂപയും 11.2kW ചാർജറിന് 75,000 രൂപയും അധികമായി നൽകണം. കരുത്തുറ്റ വേരിയന്റുകൾക്ക് 7 സെക്കൻഡിനുള്ളിലും (59kWh വേരിയന്റുകൾക്ക് 7.7 സെക്കൻഡ്) മണിക്കൂറിൽ 0-100 കിലോമീറ്റർ വേഗത കൈവരിക്കാനാകുമെന്ന് മഹീന്ദ്ര അവകാശപ്പെടുന്നു. ഉയർന്ന വേഗത മണിക്കൂറിൽ 202 കിലോമീറ്ററാണ്.

സുരക്ഷ

XEV 9S-ൽ സുരക്ഷയ്ക്ക് വലിയ പ്രാധാന്യമാണ് നൽകിയിരിക്കുന്നത്. ഉയർന്ന വേരിയന്റുകളിൽ ഡ്രൈവർക്ക് കാൽമുട്ടിനുള്ള എയർബാഗ് ഉൾപ്പെടെ ഏഴ് എയർബാഗുകൾ എസ്‌യുവി വാഗ്ദാനം ചെയ്യുന്നു. ഡ്രൈവറുടെ ഉറക്കം കണ്ടെത്താനുള്ള സംവിധാനം, ഇലക്ട്രോണിക് ബ്രേക്ക് ബൂസ്റ്റർ, ഇലക്ട്രോണിക് പാർക്കിങ് ബ്രേക്ക്, ലൈവ് പ്രഷർ ഡിസ്‌പ്ലേയോടുകൂടിയ ടിപിഎംഎസ്, ഓൾ-വീൽ ഡിസ്ക് ബ്രേക്കുകൾ എന്നിവയും ഫീച്ചറുകളിൽ ഉൾപ്പെടുന്നു.

അഡ്വാൻസ്ഡ് ഡ്രൈവർ അസിസ്റ്റൻസ് ഫീച്ചറുകൾ ഓരോ വേരിയന്റിലും വ്യത്യസ്തമാണ്. പാക്ക് ടുവിൽ റഡാറും വിഷൻ ക്യാമറയുമുള്ള ലെവൽ 2 ADAS അവതരിപ്പിക്കുമ്പോൾ, പാക്ക് ത്രീയിൽ അഞ്ച് റഡാറുകളും ലെയ്ൻ സെന്ററിങ്, എമർജൻസി സ്റ്റിയറിങ് അസിസ്റ്റ്, ബ്ലൈൻഡ് സ്പോട്ട് ഡിറ്റക്ഷൻ, ഫ്രണ്ട് ആൻഡ് റിയർ ക്രോസ്-ട്രാഫിക് അലേർട്ടുകൾ പോലുള്ള മെച്ചപ്പെടുത്തിയ ഫങ്ഷനുകളുമുള്ള ലെവൽ 2+ ADAS-ലേക്ക് ഉയർത്തുന്നു. Secure 360 സ്യൂട്ട്, ലൈവ് വ്യൂ, വീഡിയോ റെക്കോർഡിങ്, റിമോട്ട് കമ്മ്യൂണിക്കേഷൻ എന്നിവ നൽകി സുരക്ഷ കൂടുതൽ മെച്ചപ്പെടുത്തുന്നു.