ഒറ്റപ്പാലം: പരിവാഹൻ സംവിധാനം നിലവിൽ വരുംമുമ്പ് രജിസ്റ്റർ ചെയ്ത വാഹനങ്ങളുടെ വിവരങ്ങൾ പോർട്ടലിൽ ഉൾപ്പെടുത്തുന്നത് ഇപ്പോഴും പൂർത്തിയായില്ല. സംസ്ഥാനത്തെ ഒരുകോടിയോളം വാഹനങ്ങളുടെ വിവരങ്ങളാണ് അപൂർണമായി തുടരുന്നത്.

To advertise here,

ചില വിവരങ്ങൾ തെറ്റായും ചിലത് അപൂർണമായുമാണുള്ളത്. ഇതുമൂലം അപേക്ഷകൾ ഓൺലൈനായി സമർപ്പിക്കാനും നടപടി പൂർത്തിയാക്കാനുമാവാത്ത സ്ഥിതിയാണ്. കേന്ദ്രതലത്തിൽ ഈ വിവരങ്ങൾ പൂർണമായി ഉൾപ്പെടുത്താനുള്ള നടപടി തുടരുന്നുണ്ടെങ്കിലും സാങ്കേതിക തടസ്സംമൂലം നടപ്പായിട്ടില്ല.

അപേക്ഷകൾ വരുന്ന സമയത്ത് അപൂർണവിവരങ്ങൾ കണ്ടാൽ രേഖകൾ പരിശോധിച്ച് തിരുത്തൽ വരുത്തി പൂർണമാക്കാനാണ് ഓഫീസുകൾക്ക് മോട്ടോർ വാഹനവകുപ്പ് നിർദേശം നൽകിയത്. 2015 മുതൽ പരിവാഹൻ നടപ്പാക്കാൻ തുടങ്ങിയിരുന്നു.

എന്നാൽ, സംസ്ഥാനത്ത് 2020-ലാണ് കൂടുതൽ ആർ.സി. വിവരങ്ങൾ പരിവാഹനിലേക്ക് മാറ്റിയത്. അക്കാലത്ത് സംസ്ഥാനത്ത് 1.4 കോടി വാഹനങ്ങളുടെ ആർ.സി.യാണ് മാറ്റിയിരുന്നത്. 2020-നുമുൻപ് രജിസ്റ്റർചെയ്ത വാഹനങ്ങളുടെ ആർ.സി. വിവരങ്ങളാണ് ഇപ്പോഴും അപൂർണമായിരിക്കുന്നത്.

വാഹനങ്ങളുടെ കുതിരശക്തി, ഭാരം, വീൽബേസ്, പുറത്തുവിടുന്ന പുകയുമായി ബന്ധപ്പെട്ട വിവരങ്ങൾ തുടങ്ങിയവയാണ് തെറ്റായോ അപൂർണമായോ രേഖപ്പെടുത്തിയിട്ടുള്ളതായി മോട്ടോർവാഹനവകുപ്പ് കണ്ടെത്തിയിട്ടുള്ളത്. ഇതുമൂലമാണ് അപേക്ഷകൾ ഓൺലൈനായി സമർപ്പിക്കാനാവാത്തത്.