ഇന്ത്യയിലെ ഏറ്റവും വലിയ വാഹന നിര്‍മാതാക്കളായ മാരുതി സുസുക്കി ചില വാഹനങ്ങള്‍ തിരിച്ച് വിളിക്കാനൊരുങ്ങുന്നു. പിന്‍ഭാഗത്തെ ബ്രേക്കിങ് സംവിധാനത്തില്‍ പിഴവിന് സാധ്യതയുള്ളതിനാല്‍ സര്‍വീസിനായാണ് വാഹനങ്ങള്‍ തിരിച്ച് വിളിക്കുന്നതെന്നാണ് നിര്‍മാതാക്കള്‍ ഔദ്യോഗികമായി അറിയിച്ചിരിക്കുന്നത്. 

To advertise here,

മാരുതിയുടെ ടോപ്പ് സെല്ലിങ്ങ് മോഡലുകളായ വഗണ്‍ആര്‍, ഇഗ്നീസ്, സെലേറിയോ എന്നീ മൂന്ന് ഹാച്ച്ബാക്കുകളാണ് സര്‍വീസിനായി എത്തിക്കാന്‍ അറിയിച്ചിരിക്കുന്നത്. ഇക്കഴിഞ്ഞ ഓഗസ്റ്റ മൂന്ന് മുതല്‍ സെപ്റ്റംബര്‍ ഒന്നാം തീയതി വരെയുള്ള കാലയളവില്‍ നിര്‍മിച്ചിട്ടുള്ള വാഹനങ്ങളാണ് തിരിച്ച് വിളിച്ചിട്ടുള്ളത്. 

9925 വാഹനങ്ങളിലാണ് നിര്‍മാതാക്കള്‍ ഈ തകരാര്‍ സംശയിക്കുന്നതെന്നാണ് വിവരം. പിന്‍ഭാഗത്തെ 'ബ്രേക്ക് അസംബ്ലി പിന്‍'-ലാണ് പിഴവ് സംശയിക്കുന്നത്. ഇത് പൊട്ടാന്‍ സാധ്യതയുണ്ട്. അത് ഭാവിയില്‍ ബ്രേക്കിന്റെ പ്രവര്‍ത്തനത്തെ ബാധിച്ചേക്കും. ഉപയോക്താക്കളുടെ സുരക്ഷ കണക്കിലെടുത്താണ് ഈ പിഴവ് സംശയിക്കുന്ന വാഹനങ്ങളെല്ലാം തിരിച്ചുവിളിക്കുന്നത്. 

തിരിച്ച് വിളിച്ചിട്ടുള്ള വാഹനങ്ങളിലെ ബ്രേക്ക് അസംബ്ലി പിന്‍ പരിശോധിച്ച്, പിഴവ് കണ്ടെത്തിയാല്‍ ഇത് സൗജന്യമായി മാറ്റി നല്‍കുമെന്നാണ് മാരുതി സുസുക്കി നല്‍കുന്ന ഉറപ്പ്. ഇതിനായി കമ്പനിയുടെ അംഗീകൃത വര്‍ക്ക്ഷോപ്പുകള്‍ ഉടമകളെ ബന്ധപ്പെടുമെന്നും കമ്പനി അറിയിച്ചിട്ടുണ്ട്.