രുചിയില്ലെന്ന് ആര് പറഞ്ഞു! മാസം 1.5 ലക്ഷം വരുമാനവും; രമാഭായിയുടെ പൊന്നുവിളയുന്ന ഡ്രാഗൺ പഴത്തോട്ടം

2022 ജൂൺ-ജൂലായ് മാസങ്ങളിലായി കൃഷിരീതികൾ പഠിച്ചെടുത്ത് ആ വർഷം ഓഗസ്റ്റ് മാസത്തിലാണ് കൃഷി ആരംഭിച്ചത്. തണ്ടുകൾക്ക് പകരം കായ പിടിച്ച ചെടിയുടെ തണ്ടുകൾ കിളിർപ്പിച്ച തൈകളാണ് നട്ടത്. അതുകൊണ്ട് തന്നെ ആറ് മാസംകൊണ്ട് തനിക്ക് ആദ്യത്തെ വിളവെടുക്കാനായെന്ന് രമാഭായി ചൂണ്ടിക്കാണിക്കുന്നു. തൈ നട്ടാൽ ആറ് മാസവും തണ്ട് മുളപ്പിച്ചാൽ എട്ട് മാസം കഴിഞ്ഞും വിളവെടുക്കാം. അഞ്ച് സെന്റിൽ കൃഷി ഇറക്കാൻ ഒരു ലക്ഷം രൂപയോളം ചിലവായി. രണ്ട് സീസണുകളിൽ ഇവിടെനിന്ന് പഴങ്ങൾ വിളവെടുത്തു. ആദ്യത്തെ സീസണിൽ തന്നെ നല്ല വിളവ് ലഭിച്ചു ഏതാണ്ട് 20,000 രൂപ വരുമാനം ലഭിച്ചു. അടുത്ത സീസണിലും നല്ല വിളവ് ലഭിച്ചതോടെ വരുമാനം ഉയർന്നു. ഇപ്പോൾ ഏതാണ്ട് 40,000 രൂപ അഞ്ച് സെന്റിൽനിന്ന് വരുമാനം ലഭിക്കുന്നുണ്ടെന്ന് രമാഭായി പറയുന്നു.

ടെറസിലും പിന്നെ റബർ വെട്ടിയും കൃഷി 

അഞ്ച് സെന്റിലെ കൃഷി വിജയിച്ചതോടെ ആത്മവിശ്വാസമായി. കൃഷി വ്യാപിപ്പിക്കണമെന്ന തോന്നലുണ്ടായി. അതോടെയാണ് ടെറസിൽ കൃഷി ഇറക്കുന്നത്. രണ്ടാമത്തെ നിലയുടെ മുകളിൽ ബാരലുകളിലാണ് ഡ്രാഗൺ കൃഷി ചെയ്തിരിക്കുന്നത്. 'ഒരു തരി മണ്ണ് പോലുമില്ലാതെയാണ് ടെറസിന് മുകളിൽ കൃഷി ചെയ്തത്. അതൊരു പരീക്ഷണമായിരുന്നു. വീണ്ടും കൃഷി ചെയ്യണമെന്ന് തോന്നലുണ്ടപ്പോൾ ടെറസിന് മുകളിൽ കൃഷി ചെയ്യുന്ന കാര്യം മകനുമായി സംസാരിച്ചു. പക്ഷേ വീട് വൃത്തിയാക്കിയിട്ടിരിക്കുകയാണെന്നും ടെറസിന് മുകളിൽ മണ്ണ് കയറ്റുന്നതിൽ മകന് താല്പര്യമുണ്ടായിരുന്നില്ല. ഇതോടെ ബദൽ മാർഗങ്ങളെക്കുറിച്ച് ആലോചിച്ചു. താഴെ നട്ടതിന്റെ ബാക്കിയുണ്ടായിരുന്ന തണ്ടുകളിലൊന്ന് കംമ്പോസ്റ്റ് മിശ്രിതത്തിൽ നട്ടു. അത് വളരെ വേഗത്തിൽ വളരുന്നത് ശ്രദ്ധയിൽപ്പെട്ടു. ഇതോടെ മണ്ണിന് പകരം കംമ്പോസ്റ്റിൽ കൃഷി ഇറക്കാൻ തീരുമാനിച്ചു. ഇതിനായി കരിയിലയും പച്ചിലയും അറക്കപ്പൊടിയും നെല്ല് കുത്തിയ തവിടും ചേർത്ത് കംമ്പോസ്റ്റ് വലിയ രീതിയിൽ ഉണ്ടാക്കി. തുടക്കത്തിൽ വേപ്പും പിണ്ണാക്കും എല്ല് പൊടിയും ഉപയോഗിച്ചു. ഇപ്പോൾ ഇത് രണ്ടും ഉപയോഗിക്കാറില്ല. കൃഷി ചെയ്യാനായി 50 ബാരലുകൾ വാങ്ങി. അതിലാണ് കൃഷി ചെയ്തത്.'

ഒരു ബാരലിൽ രണ്ട് ചെടിയാണ് നട്ടത്. ടെറസിൽ വെയിറ്റ് കുറയ്ക്കാൻ വേണ്ടിയാണ് ചെടികളുടെ എണ്ണം കുറച്ചത്. ജി.ഐ. പൈപ്പുകൾകൊണ്ട് ഉണ്ടാക്കി സ്റ്റാൻഡുകളിലാണ് ഡ്രമ്മുകൾ സ്ഥാപിച്ചത്. പടർന്നുകയറാനും പൈപ്പുകൾ നൽകി. പത്ത് മാസം മുമ്പാണ് ടെറസിൽനിന്ന് ആദ്യത്തെ വിളവെടുക്കുന്നത്. കഴിഞ്ഞ വർഷം മാത്രം ഏഴ് മാസത്തോളം അവിടെനിന്ന് വിളവെടുത്തു. ടെറസിൽനിന്ന് മാത്രം 40,000-ന് മുകളിൽ വരുമാനമുണ്ട്. ഇതിന് പിന്നാലെ 80 സെന്റ് സ്ഥലത്ത് റബർ മുറിച്ച് ഡ്രാഗൺ തൈകൾ നട്ടത്. എട്ട് കൊല്ലം നന്നായി നോക്കി നടത്തിയ റബ്ബർ മുറിച്ചാണ് കൃഷിയിറക്കിയത്. രണ്ട് വർഷം മാത്രമാണ് അത് ടാപ്പ് ചെയ്തത്. അവിടെ 400 മൂടാണ് നട്ടിരിക്കുന്നത്. ഇത്തവണ പക്ഷേ കൃത്യമായ അകലം പാലിച്ചാണ് നട്ടത്. എല്ലാ മൂടുകൾക്കും ജി.ഐ. പൈപ്പാണ് ഉപയോഗിച്ചത്. അതുകൊണ്ട് തന്നെ ഒരു മൂട്ടിൽ മൂന്ന് ചെടിയാണ് നട്ടത്. കഴിഞ്ഞ ഡിസംബറിൽ ആദ്യത്തെ വിളവെടുത്തു. അവിടെനിന്ന് നല്ലതുപോലെ വിളവ് ലഭിച്ചു. ഒരു മൂട്ടിൽനിന്ന് ഒരേ സമയം 30 പഴം വരെ ലഭിക്കുന്നുണ്ട്. ഇപ്പോൾ മാസം 60,000 രൂപയ്ക്ക് അടുത്ത് വരുമാനമുണ്ട്.-രമാഭായി തന്റെ കൃഷിയെക്കുറിച്ച് വാചാലയായി.

ഡ്രാഗൺ ചെടികളുടെ പരിചരണത്തിന്റെ കാര്യത്തിൽ അവർ വിട്ടുവീഴ്ച വരുത്തില്ല. ചെടിക്ക് പൊതുവേ ചൂട് കാലാവസ്ഥയാണ് അനുയോജ്യമെന്നാണ് അവർ പറയുന്നത്. മഴവെള്ളം ചെടിയുടെ ചുവട്ടിൽ കെട്ടിനിൽക്കാൻ ഇടവരരുത്. വെള്ളം ചുവട്ടിൽ കെട്ടിനിന്നാൽ തണ്ട് ചീയാൻ ഇടവരും. പൂർണമായും ജൈവരീതിയിലാണ് രമാഭായിയുടെ കൃഷി. കൃഷിക്ക് ആവശ്യമായ വളം മുഴുവൻ വീട്ടിൽതന്നെ നിർമിക്കുകയായിരുന്നു. ഡ്രാഗൺ ഫ്രൂട്ട് ഒരു ഡസേർട്ട് പ്ലാന്റാണ്. മരുഭൂമിയിൽ ഇതിന് ഫാക്ടംഫോസും അമേണിയയും ആരും കൊണ്ട് കൊടുക്കില്ല. പക്ഷികളുടെ കാഷ്ഠവും പാറപ്പുറത്തെ പായലുമെല്ലാമാണ് പ്രധാനവളം. അതുകൊണ്ട് തന്നെ പൂർണമായും ഓർഗാനിക് കൃഷിയാണ് പിന്തുടർന്നത്. ആദ്യം ചാണകം ഉപയോഗിച്ചിരുന്നു. എന്നാൽ നൈട്രജൻ കണ്ടന്റ് ഇല്ലെന്ന് മനസിലാക്കി അത് ഒഴിവാക്കി. അതേസമയം ആട്ടിൻ കാട്ടം ഉപയോഗിച്ചിരുന്നു. 

വീട്ടിൽവന്ന് വാങ്ങും ആവശ്യക്കാർ 

വിപണിയുടെ കാര്യത്തിൽ ആശങ്കകളില്ല. പഴം വിളവെടുത്താൻ തിരുവനന്തപുരത്തുനിന്നും കൊല്ലത്തുനിന്നും ആളുകൾ എത്തി വാങ്ങിക്കൊണ്ടുപോകുമെന്നാണ് അവർ പറയുന്നത്. വിളവെടുത്ത കാര്യം വാട്‌സ്ആപ്പ് ഗ്രൂപ്പുകളിലിടും. അതോടെ ആളുകൾ വീട്ടിലെത്തി പഴം വാങ്ങും. വാങ്ങാനായി വരുന്നവർ രണ്ടും മൂന്നും കിലോ സുഹൃത്തുക്കൾക്കായും വാങ്ങിക്കും. ഇതിന് പുറമേ, ഓർഗാനിക് പഴങ്ങളും പച്ചക്കറികളും മാത്രം വിൽക്കുന്ന അഗ്രോ എന്ന കച്ചവടസ്ഥാപനത്തിനും പഴം എടുക്കുന്നുണ്ട്. പതിനഞ്ച് കിലോയ്ക്ക് മുകളിൽ അവർ എടുക്കും. പഴം വിളവെടുത്താൻ രണ്ട് ദിവസം വരെയാണ് സൂക്ഷിക്കാറ്. പക്ഷേ അതിനുള്ളിൽ വിറ്റ് പോകും. പഴം കൊടുത്ത് പ്രതിമാസം ഒന്നര ലക്ഷത്തോളം വരുമാനമുണ്ട്. ഇതിന് പുറമേ നടീൽ വസ്തുവും വിൽപ്പന നടത്തുന്നുണ്ട്. തുടക്കത്തിൽ 200 രൂപയ്ക്കാണ് പഴം വിറ്റിരുന്നത്. എന്നാൽ പിന്നീട് വില കുറച്ചു. നിറയെ പഴംപിടിക്കാൻ തുടങ്ങിയ ശേഷമാണ് 25 രൂപ കുറച്ച് 175-ന് നൽകാൻ തുടങ്ങിയത്. ചെലവായ കണക്കുകൾ കൃത്യമായി എഴിതി സൂക്ഷിച്ചിരുന്നു. കൃഷിക്ക് മുതൽ മുടക്കിയ തുക ആദ്യത്തെ വർഷം തന്നെ തിരിച്ചുകിട്ടി. മുടക്കുമുതൽ തിരിച്ചുകിട്ടിയതോടെ വില കുറച്ചു. 25 വർഷമാണ് ചെടിക്ക് ആയുസ് കണക്കാക്കുന്നത്. അതിനാൽ തന്നെ വില കുറച്ചത്. വീട്ടിൽ വന്ന് വാങ്ങുന്നവർ 175-ന് വാങ്ങട്ടെ എന്നാണ് ചിന്തിച്ചത്.- അവർ പറഞ്ഞു.  

ഡ്രാഗൺ ഫ്രൂട്ട്‌ ഒരു സീസണൽ പ്ലാന്റാണ്. സാധാരണയായി ഏപ്രിൽ-മേയ് മാസങ്ങളിൽ പൂവിട്ട് നവംബർ വരെ വിളവെടുക്കാം. പക്ഷേ, ഈ വർഷം മാർച്ചിൽ ആദ്യത്തെ പഴം പാകമായെന്ന് അവർ പറഞ്ഞു.  'വിയറ്റ്‌നാം പോലുള്ള ചില രാജ്യങ്ങളിൽ 12 മാസവും ഡ്രാഗൺ പഴങ്ങൾ വിളവെടുക്കുന്നുണ്ട്. ഇവിടെയും അത് സാധിക്കുമോ എന്ന പരീക്ഷണത്തിലാണ്. നിലവിൽ ഒരു മാസം ഒരു മൂട്ടിൽനിന്ന് 15 കിലോ വരെ പഴം ലഭിക്കും. നവംബറിന് ശേഷം തണ്ട് മുറിച്ച് വിൽക്കുകയോ തൈകൾ ഉത്പാദിപ്പിക്കുകയോ ചെയ്യാം. നാലായിരം തണ്ടുകൾ വരെ കച്ചവടം നടത്തിയിട്ടുണ്ട്. നൂറ് രൂപയാണ് ഈടാക്കുന്നത്. ആയിരവും രണ്ടായിരവും തണ്ടുകൾക്ക് ഓഡർ ലഭിക്കാറുണ്ട്. തമിഴ്‌നാട്ടിലും കർണാടകയിലേക്കും തണ്ടുകൾ അയക്കാറുണ്ട്. തണ്ടും ഒരു പ്രധാന വരുമാനമാർഗമാണ്. ഇതുവഴി വർഷമുഴുവൻ ആദായം ഉറപ്പാക്കാൻ സാധിക്കും'- അവർ പറഞ്ഞു. 

പുതിയ കർഷകർ നടീൽ വസ്തു തിരഞ്ഞെടുക്കുമ്പോൾ ശ്രദ്ധിക്കണമെന്നാണ് അവരുടെ ഉപദേശം. തണ്ടിനാണ് വിലക്കുറവ്, തൈകൾക്ക് വില കൂടും. പക്ഷേ, തൈകൾ നട്ടാൽ പെട്ടന്ന് കായ പിടിക്കും. നന്നായി പഠിച്ച് വേണം കൃഷിയിറക്കാൻ. യൂട്യൂബ് വിഡിയോകളിൽ ഒരുപാട് തെറ്റിദ്ധാരണ പ്രചരിപ്പിക്കുന്നു. ഒരു തണ്ടിൽ ഒന്നിലധികം മുട്ടുകൾവന്നാൽ പറിച്ച് കളയണമെന്ന് പലതിലും പ്രചരിപ്പിക്കുന്നു. പക്ഷേ അതിന്റെ ആവശ്യമില്ല. ഒരു ഞെട്ടിൽ മൂന്നും നാലുമെണ്ണം ടെറസിൽ ഉണ്ടാകുന്നു. വലുപ്പം കുറവ് ഉണ്ടാകില്ല. 500 ഗ്രാമിന് മുകളിൽ എല്ലാത്തിനും തൂക്കമുണ്ടാകും. അതിപോലെ നല്ല നടീൽ വസ്തു തിരഞ്ഞെടുക്കാൻ ശ്രദ്ധിക്കണം. കായ ഉണ്ടായ ചെടിയിൽനിന്ന് ശേഖരിക്കുന്ന തണ്ടുകളോ അത് മുളപ്പിച്ച് എടുക്കുന്ന തൈകളോ തന്നെ വേണം ഉപയോഗിക്കാൻ അല്ലെങ്കിൽ വലിയ മുതൽ മുടക്കി കൃഷി ചെയ്തിട്ട് കായ പിടിക്കാതെയാകുന്നതോടെ വെട്ടിക്കളയുന്നവരുണ്ടെന്നും പറയുന്നു രമാഭായി. 

രമാഭായി- 93499 37641