ഇപ്പോഴും കണ്ടെത്തുന്ന പുതിയ ഇനങ്ങൾ, വൈവിധ്യം അദ്ഭുതകരം; വാഴലോകത്തെ വിസ്മയങ്ങൾ

കൃഷിയിലെ ആദ്യപാഠങ്ങൾ, പ്രത്യേകിച്ച് വാഴകൃഷിയിലെ ആദ്യപാഠങ്ങൾ അദ്ദേഹത്തിന് പകർന്നു നൽകിയത് സ്വന്തം അമ്മൂമ്മ ആണെന്നുള്ള കാര്യം അദ്ദേഹം സ്നേഹത്തോടെ ഓർമ്മിക്കുന്നു. അധ്യാപകനായ പിതാവ് ബാലകൃഷ്ണനും മാതാവ് ദേവകിയും പറമ്പിലെ കൃഷിപ്പണികളിൽ കൂടെക്കൂട്ടി പ്രചോദനം നൽകുകയും കൃഷിപ്പണിയുടെ മഹത്വം ചെറുപ്പത്തിലെ പഠിപ്പിക്കുകയും ചെയ്തു. പ്രകൃതിസ്നേഹിയായ അച്ഛന്റെ മാർഗനിർദ്ദേശങ്ങൾ നിശാന്തിന് ഭാവിയിൽ ഒരുപാട് ഗുണം ചെയ്തു. ഇന്ന് വാഴയുടെ ഈ ജനിതകശേഖരത്തിന്റെ സംരക്ഷണം അദ്ദേഹത്തിന് 30 വർഷത്തിലേറെ ആയിട്ടുള്ള ഒരു തപസ്യയായി മാറുകയാണ് ഉണ്ടായത്. തലമുറകൾക്ക് നഷ്ടപ്പെട്ടുപോകുന്ന വലിയൊരു പൈതൃകം തന്നെയാണ് അദ്ദേഹം കാത്തുസൂക്ഷിക്കുന്നത്.

അവധി ദിവസങ്ങൾ വാഴകൾക്ക് വേണ്ടി പൂർണ്ണമായും മാറ്റിവെച്ചിരിക്കുകയാണ്  നിശാന്ത് കേളോത്ത്. ജൈവ രീതിയിലുള്ള പരിപാലനമാണ് തന്റെ തോട്ടത്തിന്റെ പ്രത്യേകതയായി അദ്ദേഹം പറയുന്നത്. സമയബന്ധിതമായി തോട്ടം പരിശോധിച്ചു കൃത്യമായ കീടരോഗ നിയന്ത്രണ മാർഗങ്ങൾ അദ്ദേഹം അവലംബിക്കുകയും തോട്ടത്തിലെ ജൈവവസ്തുക്കൾ കൊണ്ട് തന്നെ വാഴയുടെ വളപ്രയോഗം നടത്തുന്നതു വഴി പ്രകൃതിക്ക് അനുയോജ്യമായ നല്ലൊരു കൃഷിത്തോട്ടം അദ്ദേഹത്തിന് നിലനിർത്താൻ സാധിക്കുന്നു. ഈ വാഴസമ്പത്ത് സംരക്ഷിക്കുന്നതിന് അദ്ദേഹത്തെ സഹായിക്കാൻ രണ്ട് തൊഴിലാളി സുഹൃത്തുക്കളും കൂടെയുണ്ട്.

ഒരു കൗതുകത്തിന്റെ പേരിൽ തുടങ്ങിയ ഈ വാഴയുടെ ശേഖരം ഇന്ന് 300-ലധികം ഇനങ്ങളാൽ സമ്പന്നമാണ്. ശാസ്ത്രീയമായ രീതിയിൽ വാഴയുടെ ജനിതക ശേഖരം മുന്നോട്ടു കൊണ്ടു പോകണമെന്ന ആഗ്രഹത്താൽ അദ്ദേഹം ഇതിനെക്കുറിച്ച് വിശദമായി പഠിക്കുകയും  ഓരോ വാഴയിനങ്ങളും ഏത് പേരിൽ ആണെന്നുള്ളതും അതിന്റെ വിവരങ്ങളും ശേഖരിച്ചുള്ള ഫീൽഡ് മാപ്പുകൾ സസൂക്ഷ്മം തയ്യാറാക്കി സൂക്ഷിക്കുകയും അതോടൊപ്പം ഓരോ വാഴയ്ക്കും അത്യാവശ്യമായിട്ടുള്ള ടാഗുകൾ തയ്യാറാക്കി പറമ്പിൽ വയ്ക്കുകയുംചെയ്തു. ഇന്ന് അദ്ദേഹത്തിന്റെ കൈയിലുള്ള 300-ൽ പരം വാഴയിനങ്ങളിൽ 90% അദ്ദേഹത്തിന് കാണാപാഠമാണ്. ഓരോ വാഴകളുടെ പ്രത്യേകതയും അവയുടെ പൂക്കുന്ന- കായ്ക്കുന്ന സമയങ്ങൾ കൃത്യമായി ഈ കാവലാളിന് അറിയാം. തമിഴ്നാട്, ആന്ധ്രപ്രദേശ്, തെലുങ്കാന, കർണാടക, മഹാരാഷ്ട്ര, ബംഗാൾ തുടങ്ങിയ സംസ്ഥാനങ്ങളിൽ നിന്നും അദ്ദേഹം നടത്തിയ യാത്രകളുടെ പരിശ്രമത്തിന്റെ ഫലമായിട്ടാണ് ഇന്ന് ഈ കാണുന്ന അതിമനോഹരമായ വാഴകളുടെ ജനിതക സമ്പത്ത് കൈമുതലായി കിട്ടിയത്. ഭാവിയിൽ സാധിക്കുമെങ്കിൽ വഴക്ക് കിഴക്കൻ സംസ്ഥാനങ്ങളിലെ വാഴ വൈവിധ്യം കൂടി തന്റെ തോട്ടത്തിൽ മുതൽക്കൂട്ടായി ചേർക്കണമെന്ന് അദ്ദേഹത്തിന് ആഗ്രഹമുണ്ട്. 
 
ഗന്ധപ്പച്ച, ആനക്കൊമ്പൻ, പെരും പടലി, പച്ചബോന്ത, ബത്തിസ(ബംഗാൾ), തെല്ലെചക്കര കേലി (ആന്ധ്ര ),  നരേദ്ലുബോന്ത (ആന്ധ്ര ),  ഹറ്റി ദത്ത് (ആസാം), പിസാങ് രാക്ഷസ, പിസാങ് മുല്ലിക്ക്, മൂസാ സബ്രിനോറോ ജോ, ഫിയാ 1 (ഗോൾഡ് ഫിങ്കർ ), ഫിയ 11,  ഫിയ 21, ബൺടാല, കെന്താളി, കാഞ്ചി കേല, ബ്ലൂകെചിപ്പ്,  ബ്ലൂ ജാവ (3 ഇനം ), തായ് പെരോട്ട് (തായ്‌ലാൻഡ്) 2 ഇനം,  മലൈ കാളി, മനോരഞ്ജിതം, വനതാ പുരി, കലി ബോ, മൊട്ട പൂവൻ, പാഗർ ബനാന, പച്ച നാടൻ, ശിരുമലൈ,  T N B X, സത്‌ലിയ, ഫെരോങ്ങ്തായ്‌ എന്നിവ അദ്ദേഹത്തിന്റെ ശേഖരത്തിലുള്ള ചില ഇനങ്ങൾ മാത്രമാണ്. 

ഇന്ത്യയിൽ കാണുന്ന ഏറ്റവും മധുരമുള്ള എന്നാൽ അപൂർവമായിക്കൊണ്ടിരിക്കുന്ന സൂര്യകദളി എന്ന ഇനവും കരിങ്കദളി, പച്ച ചിങ്ങൻ ഇനങ്ങളും, തിരുവനന്തപുരം ജില്ലയിലെ കാണി വിഭാഗക്കാർ തിരുവിതാംകൂർ മഹാരാജാവിന് കാണിക്കയായി നൽകിയിരുന്ന ‘ഒറ്റ  മൂങ്കിൽ’ എന്ന ഇനവും അതോടൊപ്പം ‘പടല  മൂങ്കിൽ’ എന്ന ഇനവും ഇദ്ദേഹത്തിന്റെ കയ്യിലുണ്ട്. വിദേശ ഇനങ്ങളായ പ്രയ് ഹാൻസ്, ഡബിൾ മഹോയ്, കിമ്പർ ബെർലിൻ, ഏറ്റവും ചെറിയ വാഴയിനങ്ങളിൽ ഒന്നായ തായ് മൂസ എന്നിവയും ശ്രദ്ധേയമായവയാണ്. മാതൃവാഴയുടെ ചുവട്ടിൽനിന്നു 5 അടി വരെ മാറി കന്നുണ്ടാകുന്ന “വാക്കിങ് ബനാന” എന്ന അലങ്കാരയിനം ഇദ്ദേഹത്തിന്റെ ശേഖരത്തിലെ വേറിട്ട വാഴയിനമാണ്. തായ്‌ലാൻഡിൽനിന്നുള്ള പിസാങ് ബർലിൻ, പിസാങ് സെറിബു (Pisang Seribu) , പിസാങ് ജെറിബോയ ( Pisang Jari Buaya), പിസാങ് സിലോൺ,  പിസാങ് ലിലിൻ (Pisang Lilin)  എന്നീ കൗതുക ഇനങ്ങളും ഇദ്ദേഹത്തിന്റെ ശേഖരത്തിൽ ഉണ്ട്.  

ആത്മാർത്ഥമായി വാഴയിനങ്ങളെ സംരക്ഷിക്കാൻ താല്പര്യമുള്ള പൊതുജനങ്ങൾക്കും കർഷക സുഹൃത്തുക്കൾക്കും അദ്ദേഹം എന്നും ഒരു കൂട്ടുകാരനാണ്. വാഴയുടെ കന്നുകൾ വിറ്റ് കിട്ടുന്ന വരുമാനവും അദ്ദേഹത്തിന്റെ ശമ്പളത്തിൽ നിന്നുള്ള ഒരു പങ്കും ഉപയോഗിച്ചാണ് സംരക്ഷണം. ചെത്തി മിനുക്കിയ കന്നുകൾ ടാഗ് ചെയ്ത് കൊറിയർ അയച്ചുകൊടുക്കുകയോ അല്ലെങ്കിൽ നേരിട്ട് വരുന്നവർക്ക് നൽകുകയാണ് ചെയ്യുന്നത്. വാഴയുടെ ജനിതകശേഖരം തുടങ്ങാൻ ആഗ്രഹിക്കുന്ന കർഷകർ ആദ്യം വാഴകൃഷിയെ കുറിച്ച് നന്നായി പഠിക്കുകയും ചെറുതായി വാഴ കൃഷി ചെയ്ത് പ്രായോഗിക വശങ്ങളും ബുദ്ധിമുട്ടുകളും മനസ്സിലാക്കിയെടുക്കുകയാണ് ആദ്യം ചെയ്യേണ്ടതെന്ന് അദ്ദേ​ഹം പറയും. അതിനുശേഷം നല്ല വാഴയിനങ്ങളെ ശാസ്ത്രീയമായ രീതിയിൽ നിർദിഷ്ട അകലത്തിലും രീതിയിലും പരിപാലിച്ച് വളർത്തിയെടുത്ത് പ്രായോഗിക പരിജ്ഞാനവും ആത്മവിശ്വാസവും സ്വയം ആർജിക്കേണ്ടതാണ്. 

തുടക്കക്കാർ നിർബന്ധമായും 20-30 വാഴ ഇനങ്ങൾ മാത്രം വളർത്തുന്നതായിരിക്കും നല്ലതെന്നാണ് അദ്ദേഹത്തിന്റെ അഭിപ്രായം. വാഴ എന്ന അമൂല്യ ഫലവർഗ്ഗത്തെ സംരക്ഷിക്കേണ്ടതിന്റെ ആവശ്യകത പ്രത്യേകം പറയേണ്ടതില്ല. നിശാന്തിന്റെ ശാസ്ത്രീയ അവബോധത്തിനും വാഴയുടെ ജനിതക ശേഖരം വ്യക്തിഗത അടിസ്ഥാനത്തിൽ തയ്യാറാക്കുന്നതിൽ കാണിച്ച ആത്മാർത്ഥ ശ്രമങ്ങളെയും നിസ്തുല സേവനങ്ങളെയും പ്രോത്സാഹിപ്പിക്കുന്നതിന് വേണ്ടി കണ്ണാറ വാഴ ഗവേഷണ കേന്ദ്രത്തിന്റെ വജ്ര ജൂബിലി ആഘോഷങ്ങളുടെ ഭാഗമായി അദ്ദേഹത്തെ കർഷക ശ്രേഷ്ഠ പുരസ്കാരം നൽകി 2023- ൽ ആദരിച്ചു. വാഴയിനങ്ങളെക്കുറിച്ച് അറിയാനും അദ്ദേഹത്തിന്റെ തോട്ടം സന്ദർശിക്കുന്നതിന് വേണ്ടിയും സ്വന്തമായി ഒരു വാഴ ജനിതക തോട്ടം ഉണ്ടാക്കുന്നതിന് വേണ്ടിയും നിശാന്ത് കേളോത്തിനെ 9447444015 എന്ന നമ്പറിൽ ബന്ധപ്പെടാവുന്നതാണ്.