കാട്ടാനകളെ പിന്തുടർന്ന് കല്ലെറിഞ്ഞ് യുവാക്കൾ; ക്രൂരതയുടെ വീഡിയോ പുറത്ത്

വന്യജീവികൾ സ്വസ്ഥമായി വിഹരിക്കുന്ന ഇടങ്ങളിലേക്ക് അതിക്രമിച്ച് കയറി അവയെ ശല്യം ചെയ്യുന്നതിന്റെ വീഡിയോകൾ നിരവധി പുറത്തുവന്നിട്ടുണ്ട്. ഇപ്പോഴിതാ തിരുപ്പൂരിൽ നിന്നും അത്തരമൊരു സംഭവത്തിന്റെ വീഡിയോ പുറത്തുവന്നിരിക്കുകയാണ്. തിരുമൂർത്തി ഡാമിനു സമീപത്തെ സംരക്ഷിത വനത്തിൽ ആനകളെ കല്ലെറിഞ്ഞും മറ്റും ശല്യം ചെയ്യുന്ന ​ഗോത്രവർ​ഗക്കാരായ യുവാക്കളാണ് വീ‍ഡിയോയിലുള്ളത്. 

നായ്ക്കളേയും കൊണ്ടാണ് മൂന്നു യുവാക്കൾ വനമേഖലയിൽ പ്രവേശിച്ചത്. വലിയ കല്ലുകൾ ഉപയോ​ഗിച്ച് ആനകളെ എറിയുന്നത് വീ‍ഡിയോയിൽ കാണാം. മരച്ചില്ലകൾ കൊണ്ട് മർദിക്കുകയും കൂട്ടത്തോടെ ശബ്ദങ്ങൾ ഉണ്ടാക്കി ആനയെ ശല്യം ചെയ്യുന്നുമുണ്ട്.  സഹികെട്ട് ആന തിരിച്ച് ആക്രമിക്കാനെത്തുന്നതും വീ‍ഡിയോയിൽ കാണാം. യുവാക്കൾ തന്നെയാണ് വീഡിയോ പകർത്തി സമൂഹമാധ്യമത്തിൽ പങ്കുവച്ചത്. സംഭവത്തിൽ മൂന്ന് ​പേർക്കെതിരെ വനാവകാശ സംരക്ഷണ നിയമപ്രകാരം കേസെടുത്തിട്ടുണ്ടെന്ന് പോലീസ് അറിയിച്ചു.  പി സെൽവം, ടി. കാലിമുത്തു, അരുൺ കുമാർ എന്നിവർക്കെതിരേയാണ് കേസെടുത്തിരിക്കുന്നത്.