ബെംഗളൂരു: ബെംഗളൂരു അന്താരാഷ്ട്ര വിമാനത്താവളത്തിന് വീണ്ടും മികച്ച ആഗമനസൗകര്യത്തിനുള്ള ആഗോള അംഗീകാരം. എയർപോർട്ട് കൗൺസിൽ ഇന്റർനാഷണൽ നൽകുന്ന 2025-ലെ എയർപോർട്ട് സർവീസ് ക്വാളിറ്റി (എ.എസ്.ക്യൂ.) പുരസ്കാരത്തിലാണ് ‘ബെസ്റ്റ് എയർപോർട്ട് അറ്റ് അറൈവൽ’ പദവി ബെംഗളൂരു നിലനിർത്തിയത്. തുടർച്ചയായി നാലാംവർഷമാണ് ബെംഗളൂരു ഈ പുരസ്കാരം സ്വന്തമാക്കുന്നത്.

To advertise here,

സുഗമവും കാര്യക്ഷമവും യാത്രക്കാർക്ക് അനുയോജ്യവുമായ ആഗമന അനുഭവം പ്രദാനം ചെയ്യുന്നതിന്റെ മികവ് കണക്കിലെടുത്താണ് പുരസ്കാരം. യാത്രക്കാരുടെ തത്സമയ പ്രതികരണത്തിന്റെ അടിസ്ഥാനത്തിലാണ് പുരസ്കാരം നിശ്ചയിച്ചത്. റാങ്കിങ്ങിൽ മുൻ വർഷത്തേതിനേക്കാൾ മുൻപിലെത്തുകയും ചെയ്തു. 2024-ൽ 4.98 ആയിരുന്നു റാങ്കിങ് എങ്കിൽ 2025-ൽ ഇത് 5.00 ആയി മാറി.

ഇമിഗ്രേഷൻ സംവിധാനം വേഗത്തിലാക്കിയത്, യാത്രക്കാരുടെ ലഗേജുകൾ വീണ്ടെടുക്കലിന്റെ കാര്യക്ഷമത മെച്ചപ്പെടുത്തിയത്, യാത്രക്കാർക്ക് വഴി കണ്ടെത്തുന്നത് എളുപ്പമാക്കി ടെർമിനലിൽ അടയാളബോർഡുകൾ സ്ഥാപിച്ചത്, ടെർമിനലിൽ കൂടുതൽ സൗകര്യങ്ങൾ ഏർപ്പെടുത്തിയത്, യാത്രക്കാർക്കായുള്ള ഡിജിറ്റൽ സേവനങ്ങൾ വിപുലീകരിച്ചത് എന്നിവ അംഗീകാരനേട്ടത്തിന് വഴിതെളിച്ചു.