ഭൂമിയിലെ ജീവജാലങ്ങളുടെ ചരിത്രം മാറ്റി എഴുതിയ സംഭവമാണ് 6.6 കോടി വര്ഷം മുമ്പുണ്ടായ ഛിന്നഗ്രഹ പതനം. മെക്സിക്കോയിലെ യൂകാറ്റാന് പെനിസുലയിലെ ചിക്സലബ് എന്ന സ്ഥലത്ത് പതിച്ച ഉല്ക്ക ദിനോസറുകള് ഉള്പ്പടെ അക്കാലത്തെ 75 ശതമാനം ജീവജാലങ്ങളെ തുടച്ചുനീക്കി. ഭൂമിയിലെ അഞ്ചാമത്തെ കൂട്ടവംശനാശമാണ് ഇതെന്നാണ് പറയപ്പെടുന്നത്. എന്നാല് ആ കൂട്ടവംശനാശത്തിന് ഇടയാക്കിയത് ചിക്സലബില് പതിച്ച ഛിന്നഗ്രഹം മാത്രമല്ലെന്നാണ് 'നേച്ചര്' ജേണലില് പ്രസിദ്ധീകരിച്ച പുതിയൊരു പഠനം പറയുന്നത്. ഭൂമിയിലെ ജീവജാലങ്ങളെ ആകമാനം ബാധിച്ച അഞ്ചാം കൂട്ടവംശനാശത്തിനിടയാക്കിയതില് അക്കാലത്ത് തന്നെ ഭൂമിയില് പതിച്ച മറ്റൊരു ഛിന്നഗ്രഹത്തിനും പങ്കുണ്ടെന്ന് പഠനത്തില് പറയുന്നു.
ആഫ്രിക്കന് രാജ്യമായ ഗിനിയുടെ തീരത്ത് കടലിനടിയില് സ്ഥിതി ചെയ്യുന്ന നാദിര് ഗര്ത്തത്തെ വിശദമായി സ്കാന് ചെയ്തതിന്റെ അടിസ്ഥാനത്തിലാണ് ഈ പഠനം. 8 കിലോമീറ്റര് വ്യാസമുള്ള ഗര്ത്തമാണിത്. ഛിന്നഗ്രഹം പതിച്ചാണ് ഇത് സൃഷ്ടിക്കപ്പെട്ടതെന്നാണ് അനുമാനം. 6.5 കോടി വര്ഷങ്ങള്ക്ക് മുമ്പ് എപ്പോഴോ ഭൂമിയില് പതിച്ച ഈ ഛിന്നഗ്രഹം ഏകദേശം മണിക്കൂറില് 72,000 കിമീ വേഗത്തിലാണ് ഭൂമിയില് പതിച്ചതെന്നും കണക്കാക്കപ്പെടുന്നു.
ചിക്സലബില് പതിച്ച ദിനോസറുകളെ തുടച്ചുനീക്കിയ ഛിന്നഗ്രഹത്തേക്കാള് വലിപ്പം കുറവാണെങ്കിലും ഭൂമിയില് കടുത്ത ആഘാതം സൃഷ്ടിക്കാന് കെല്പ്പുള്ള ഛിന്നഗ്രഹമായിരുന്നു ഇതെന്നും പഠനത്തില് പറയുന്നു.
എഡിന്ബര്ഗിലെ ഹെരിയറ്റ്-വാട്ട് സര്വകലാശാലയിലെ മറൈന് ജിയോളജിസ്റ്റായ ഡോ ഉയിസ്ഡിയന് നിക്കോള്സണാണ് 2022 ല് നാദിര് ഗര്ത്തം കണ്ടെത്തിയത്. എന്നാല് ഈ ഗര്ത്തം സൃഷ്ടിക്കപ്പെട്ടതുമായി ബന്ധപ്പെട്ട വിശദാംശങ്ങള് വ്യക്തമായിരുന്നില്ല.
അത്യാധുനികമായ ത്രിഡി സീസ്മിക് ഇമേജിങ് സാങ്കേതിക വിദ്യ ഉപയോഗിച്ച് സമുദ്രനിരപ്പില് നിന്ന് 300 അടി താഴെ കിടക്കുന്ന ഗര്ത്തത്തിന്റെ അതിര്വരമ്പുകളും ആഴവും അളക്കാന് ഗവേഷകര്ക്ക് സാധിച്ചു.
ലോകത്ത് സമുദ്രത്തിനടിയില് സ്ഥിതി ചെയ്യുന്ന 20 സ്ഥിരീകരിക്കപ്പെട്ട ഗര്ത്തങ്ങളുണ്ടെന്നും. അവയൊന്നും തന്നെ ഇത്രയും വിശദമായി പകര്ത്താന് സാധിച്ചിട്ടില്ലെന്നും ഡോ. നിക്കോള്സണ് പറഞ്ഞു.
ഈ ഛിന്നഗ്രഹ പതനത്തെ തുടര്ന്ന് അതിതീവ്രമായ ഭൂചലനമുണ്ടായിട്ടുണ്ട്. അതിന്റെ ആഘാതത്തിന്റെ അടയാളങ്ങള് ആയിരക്കണക്കിന് ചതുരശ്ര മൈല് വരെ വ്യാപിച്ചുകിടക്കുന്നുണ്ട്. അന്നുണ്ടായ സുനാമിയുടെ ഭാഗമായി സമുദ്രം 800 മീറ്റര് വരെ ഉയര്ന്നുവെന്നും കണക്കാക്കപ്പെടുന്നു.
ഈ ഛിന്നഗ്രഹ പതനത്തിന് 6.5 കോടി വര്ഷം മുതല് 6.7 കോടി വര്ഷം വരെ പഴക്കമുണ്ടാകാം എന്നാണ് കണക്കാക്കപ്പെടുന്നത്. കൃത്യമായ സമയം തിരിച്ചറിഞ്ഞിട്ടില്ല. 14.6 കോടി മുതല് 6.6 കോടി വര്ഷങ്ങള്ക്ക് മുമ്പുണ്ടായിരുന്ന ക്രറ്റേഷ്യസ് കാലഘട്ടത്തിന്റെ അവസാനത്തിലാണ് ഈ ഉല്ക്കാപതനം ഉണ്ടായതെന്നാണ് കരുതപ്പെടുന്നത്. 6.6 കോടി വര്ഷങ്ങള്ക്ക് മുമ്പ് ദിനോസറുകളെ തുടച്ചുനീക്കിയ ഉൽക്കാ പതനത്തില് സൃഷ്ടിക്കപ്പെട്ടത് 160 കിമീ വീതിയുള്ള ഗര്ത്തമാണ്. മനുഷ്യര് കണ്ടതില് ഏറ്റവും പുതിയ ഛിന്നഗ്രഹ പതനം നടന്നത് 1908 ലാണ്. അന്ന് സൈബീരിയയില് പതിച്ച ഛിന്നഗ്രഹത്തിന് 50 മീറ്റര് ആയിരുന്നു വീതി.
Content Highlights: A new study suggests a second asteroid impacted Earth around the same time as the Chicxulub impact
Published: 04 Oct 2024, 05:27 pm IST
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented