ആൻഡ്രോയിഡ് 17 അടിസ്ഥാനമാക്കിയുള്ള സാംസങിന്റെ വൺ UI 9.0 സ്റ്റേബിൾ അപ്‌ഡേറ്റ് ഗാലക്സി S25 എഡ്ജ് , ഗാലക്സി S25 FE മോഡലുകളിലേക്ക് ലഭ്യമാക്കിത്തുടങ്ങി. മുൻപ് ഗാലക്സി S25, S25+, S25 അൾട്രാ ഫോണുകൾക്ക് നൽകിയ ശേഷമാണ് ഈ രണ്ട് മോഡലുകളിലേക്കും കമ്പനി അപ്‌ഡേറ്റ് വ്യാപിപ്പിച്ചത്.

To advertise here,

നിലവിൽ ദക്ഷിണ കൊറിയയിലാണ് അപ്‌ഡേറ്റ് പുറത്തിറക്കിയത്. വരും ദിവസങ്ങളിൽ മറ്റ് രാജ്യങ്ങളിലേക്കും ഇത് ലഭ്യമാകുമെന്നാണ് പ്രതീക്ഷിക്കുന്നത്. ഗാലക്സി S25 എഡ്ജ്: 3,398.98 MB വലുപ്പമുള്ള അപ്‌ഡേറ്റാണ് ലഭിക്കുന്നത്. മുൻപ് ബീറ്റാ പ്രോഗ്രാമിൽ പങ്കെടുത്ത ഉപയോക്താക്കൾക്ക് 326.59 MB വലുപ്പമുള്ള അപ്‌ഡേറ്റാണ് ലഭിക്കുന്നത്.

ഫോണിലെ Settings > Software update > Check for updates എന്നത് തിരഞ്ഞെടുത്ത് ഉപയോക്താക്കൾക്ക് അപ്‌ഡേറ്റ് ലഭ്യമാണോ എന്ന് പരിശോധിക്കാവുന്നതാണ്.

വൺ UI 9.0 അപ്‌ഡേറ്റിൽ യൂസർ ഇന്റർഫേസ് കസ്റ്റമൈസേഷൻ, ചാറ്റുകൾക്കിടയിൽ നിർദ്ദേശങ്ങൾ നൽകുന്ന നഡ്ജ് (Nudge), ചിത്രങ്ങൾക്കായുള്ള ആശയങ്ങൾ നൽകുന്ന ക്രിയേറ്റീവ് സ്റ്റുഡിയോ എന്നീ ഫീച്ചറുകൾ ഉൾപ്പെടുത്തിയിട്ടുണ്ട്. കൂടാതെ മെച്ചപ്പെടുത്തിയ തർജ്ജമ, ഡോക്യുമെന്റ് സ്കാനിംഗ്, സ്മാർട്ട് വോയ്സ് റെക്കോർഡർ, ഓൺ-ഡിവൈസ് നിർമിത ബുദ്ധി പ്രൈവസി അലേർട്ടുകൾ, സ്കാം ഡിറ്റക്ഷൻ എന്നിവയും ഇതിലുണ്ട്.

സെക്യൂരിറ്റി ബ്രീഫ്, പ്രൈവസി അലേർട്ടുകൾ എന്നിവയിലൂടെ സുരക്ഷാ ഭീഷണികളെക്കുറിച്ച് ഉപയോക്താക്കൾക്ക് കൂടുതൽ വിവരങ്ങൾ ലഭിക്കും. പ്രൈവസി ലംഘന സാധ്യതകളെ ഓൺ-ഡിവൈസ് നിർമിത ബുദ്ധി വഴി തിരിച്ചറിയാൻ പ്രൈവസി അലേർട്ടുകൾ സഹായിക്കുന്നു. കൂടാതെ സാംസങ്ങിന്റെ വ്യാജ കോൾ തടയൽ സംവിധാനമായ സ്കാം ഡിറ്റക്ഷൻ കൂടുതൽ രാജ്യങ്ങളിലേക്കും ഭാഷകളിലേക്കും വ്യാപിപ്പിച്ചിട്ടുണ്ട്.