ആർട്ടിഫിഷ്യൽ ഇന്റലിജൻസ് മേഖലയിൽ വൻതോതിൽ നിക്ഷേപങ്ങൾ നടത്തുന്നതിനിടെ ജീവനക്കാരെ പുനഃസംഘടിപ്പിക്കുന്നതിന്റെ ഭാഗമായി മൈക്രോസോഫ്റ്റ് തങ്ങളുടെ ജീവനക്കാർക്കായി സ്വയം വിരമിക്കൽ പാക്കേജ് പ്രഖ്യാപിച്ചു. ഇന്ത്യ, അമേരിക്ക, യുകെ, കാനഡ എന്നിവിടങ്ങളിലെ അർഹരായ ഏകദേശം 60,000 ജീവനക്കാർക്ക് ഈ പദ്ധതിയുടെ ആനുകൂല്യം ലഭിക്കും.

To advertise here,

മൈക്രോസോഫ്റ്റിലെ ലെവൽ 70-നും അതിനു താഴെയുമുള്ള അർഹരായ ജീവനക്കാർക്കാണ് സ്വയം വിരമിക്കൽ പദ്ധതി ലഭ്യമാക്കിയത്. ജനറൽ മാനേജർമാർ, പാർട്ണർമാർ, സീനിയർ ഡയറക്ടർമാർ, വൈസ് പ്രസിഡന്റുമാർ തുടങ്ങിയ ഉയർന്ന തസ്തികകളിൽ ഉള്ളവർവരെ ഇതിന്റെ പരിധിയിൽ വരുന്നു. ഈ പദ്ധതി തിരഞ്ഞെടുക്കാൻ താല്പര്യമുള്ള ജീവനക്കാർ ഡിസംബർ ആദ്യം തീരുമാനം അറിയിക്കണം. ഇതിന്റെ ഭാഗമാകുന്നവർ ഡിസംബർ 31-ന് കമ്പനിയിൽനിന്ന് വിരമിക്കും.

AI ഡാറ്റാ സെന്ററുകൾക്കും അനുബന്ധ ഇൻഫ്രാസ്ട്രക്ചറുകൾക്കുമായി കോടിക്കണക്കിന് ഡോളർ ചെലവഴിക്കുന്ന മൈക്രോസോഫ്റ്റ്, സാമ്പത്തിക അച്ചടക്കവും ചെലവുകളും ക്രമീകരിക്കുന്നതിന്റെ ഭാഗമായാണ് ഈ നടപടി സ്വീകരിക്കുന്നത്. പെട്ടെന്നുള്ള കൂട്ടപ്പിരിച്ചുവിടലുകൾ ഒഴിവാക്കി, പകരം സാമ്പത്തിക ആനൂകൂല്യങ്ങളോടെ കമ്പനി വിടാൻ താത്പര്യമുള്ളവർക്ക് അവസരം നൽകുകയാണ് കമ്പനി. മാർക്കറ്റിംഗ്, സെയിൽസ്, എഞ്ചിനീയറിംഗ് വിഭാഗങ്ങളിലെ ചില ടീമുകൾ ഈ പദ്ധതിയിൽനിന്ന് വിട്ടുനിൽക്കാൻ തീരുമാനിച്ചിട്ടുണ്ട്.