ഗൂഗിളിന്റെ ഏറ്റവുംപുതിയ സ്മാർട്ഫോണുകളായ ഗൂഗിൾ പിക്സൽ 11 സീരീസ് ഔദ്യോഗികമായി പുറത്തിറക്കി. 'മേഡ് ബൈ ഗൂഗിൾ' എന്ന കമ്പനിയുടെ വാർഷിക ഹാർഡ്‌വെയർ ഇവന്റിലാണ് ഈ സ്മാർട്ട്ഫോണുകൾ അവതരിപ്പിച്ചത്. ഗൂഗിൾ പിക്സൽ 11, ഗൂഗിൾ പിക്സൽ 11 പ്രോ, ഗൂഗിൾ പിക്സൽ 11 പ്രോ എക്സ്എൽ എന്നീ മൂന്ന് ഫോണുകളാണ് ഈ പരമ്പരയിലുള്ളത്. പുതിയ ഇൻ-ഹൗസ് ചിപ്പ്, കൂടുതൽ ശക്തമായ സുരക്ഷാ ക്രമീകരണങ്ങൾ, ജെമിനി അധിഷ്ഠിതമായ പുതിയ എഐ ഫീച്ചറുകൾ എന്നിവയാണ് ഈ ഫോണുകളുടെ പ്രധാന ആകർഷണങ്ങൾ.

To advertise here,

ഇവയ്ക്ക് പുറമെ ഗൂഗിൾ പിക്സൽ 11 പ്രോ ഫോൾഡ്, ഗൂഗിൾ വാച്ച് 5, പുതിയ നിറങ്ങളിലുള്ള പിക്സൽ ബഡ്സ് പ്രോ 2 എന്നിവയും മറ്റ് ചില ആക്സസറികളും ചടങ്ങിൽ ഗൂഗിൾ അവതരിപ്പിച്ചിട്ടുണ്ട്.

ഇന്ത്യയിലെ വിലയും വിൽപനയും

മുൻ മോഡലുകളെ അപേക്ഷിച്ച് പിക്സൽ 11 സീരീസിന് ഇന്ത്യയിൽ 10,000 രൂപയുടെ വിലവർധനവാണ് ഉണ്ടായിരിക്കുന്നത്.

  • ഗൂഗിൾ പിക്സൽ 11: 12GB റാം, 256GB സ്റ്റോറേജ് ഉള്ള ബേസ് മോഡലിന് 89,999 രൂപയാണ് വില.
  • ഗൂഗിൾ പിക്സൽ 11 പ്രോ: വില ആരംഭിക്കുന്നത് 1,19,999 രൂപ മുതലാണ്.
  • ഗൂഗിൾ പിക്സൽ 11 പ്രോ എക്സ് എൽ: വില ആരംഭിക്കുന്നത് 1,34,999 രൂപ മുതലാണ്.

ഗൂഗിൾ സ്റ്റോറിലൂടെയും പങ്കാളികളായ മറ്റ് റീട്ടെയിലർമാരിലൂടെയും ഫോണുകളുടെ പ്രീ-ഓർഡർ ആരംഭിച്ചു കഴിഞ്ഞു. ഇന്ത്യയിലെ ലഭ്യതയുമായി ബന്ധപ്പെട്ട കൂടുതൽ വിവരങ്ങൾ ഓഗസ്റ്റ് 13-ന് നടക്കുന്ന പ്രത്യേക ഇന്ത്യൻ ലോഞ്ച് ചടങ്ങിൽ പ്രഖ്യാപിക്കും.

നിറങ്ങൾ: പ്രോ മോഡലുകൾ കാന്യോൺ (Canyon), ഒലിവ്, ഫോഗ്, മാറ്റ് ഫിനിഷുള്ള ഒബ്സിഡിയൻ എന്നീ നിറങ്ങളിൽ ലഭ്യമാകും, സ്റ്റാൻഡേർഡ് പിക്സൽ 11 മോഡൽ ഫ്രോസ്റ്റ്, പിസ്റ്റാഷിയോ, ഹിബിസ്കസ്, ഒബ്സിഡിയൻ എന്നീ നിറങ്ങളിൽ ലഭ്യമാകും.

പ്രധാന സവിശേഷതകൾ

ഡിസ്‌പ്ലേയും പുതിയ ഡിസൈനും:

പ്രോ മോഡലുകൾക്ക് കൂടുതൽ തെളിച്ചമുള്ള സ്ക്രീനുകളാണ് ഉള്ളത്. പിക്സൽ 11 പ്രോയ്ക്ക് 6.3 ഇഞ്ച് സൂപ്പർ ആക്റ്റുവ (Super Actua) ഡിസ്‌പ്ലേയും (495 PPI), പ്രോ എക്സ് എൽ മോഡലിന് 6.8 ഇഞ്ച് സൂപ്പർ ആക്റ്റുവ ഡിസ്‌പ്ലേയും (486 PPI) ഉണ്ട്. ഇവ രണ്ടും 1Hz മുതൽ 120Hz വരെയുള്ള അഡാപ്റ്റീവ് റീഫ്രഷ് റേറ്റ് നൽകുന്നു. എന്നാൽ, സ്റ്റാൻഡേർഡ് പിക്സൽ 11-ന് 6.3 ഇഞ്ച് ആക്റ്റുവ ഡിസ്‌പ്ലേയാണുള്ളത് (60-120Hz റീഫ്രഷ് റേറ്റ്). പ്രോ മോഡലുകൾക്ക് പരമാവധി 3,600 നിറ്റ്സ് ബ്രൈറ്റ്‌നസ് ലഭിക്കുമ്പോൾ, സ്റ്റാൻഡേർഡ് മോഡലിന് 3,000 നിറ്റ്സ് വരെയാണുള്ളത്. മൂന്ന് മോഡലുകൾക്കും കോർണിങ് ഗൊറില്ല ഗ്ലാസ് വിക്ടസ് 2 സംരക്ഷണം നൽകിയിരിക്കുന്നു.

ക്യാമറ ഫ്ലാഷിന് ചുറ്റുമായി നൽകിയിരിക്കുന്ന ഹൈലൈറ്റ് (HiLight) എന്ന എൽഇഡി സംവിധാനമാണ് മറ്റൊരു വലിയ മാറ്റം. നോട്ടിഫിക്കേഷനുകൾക്കൊപ്പം പ്രകാശിക്കുന്ന ഈ സംവിധാനം ഫോണിന്റെ മുഖ്യ ആകർഷണങ്ങളിലൊന്നാണ്.

പ്രൊസസറും സുരക്ഷയും

ഗൂഗിളിന്റെ ഏറ്റവും പുതിയ ടെൻസർ ജി6 ചിപ്പാണ് ഈ മൂന്ന് ഫോണുകൾക്കും കരുത്ത് പകരുന്നത്. സുരക്ഷയ്ക്കായി ടൈറ്റൻ എം3 സെക്യൂരിറ്റി കോപ്രൊസസറും ഇതിലുണ്ട്. ഹാർഡ്‌വെയറിൽ തന്നെ ഉൾപ്പെടുത്തിയിട്ടുള്ള ക്വാണ്ടം സേഫ് സെക്യൂർ ബൂട്ട് ഉൾപ്പെടെയുള്ള മൾട്ടി-ലേയേർഡ് സെക്യൂരിറ്റി ഇതിന്റെ പ്രത്യേകതയാണ്.

ക്യാമറകൾ: പിക്സൽ ഫോണുകളിൽ ഇത്തവണയും മികച്ച ക്യാമറ സംവിധാനമാണുള്ളത്.

  • പിക്സൽ 11 പ്രോ & പ്രോ എക്സ് എൽ: 50MP വൈഡ് ലെൻസ്, 48MP അൾട്രാ വൈഡ് ലെൻസ്, 48MP ടെലിഫോട്ടോ ലെൻസ് (5x ഒപ്റ്റിക്കൽ സൂം, 120x പ്രോ സൂം) എന്നിവയടങ്ങുന്ന ട്രിപ്പിൾ ക്യാമറ സെറ്റപ്പാണ് ഇതിലുള്ളത്. മുൻവശത്ത് 42MP സെൽഫി ക്യാമറയുമുണ്ട്.
  • പിക്സൽ 11 (സ്റ്റാൻഡേർഡ്): 48MP വൈഡ് ക്യാമറ, 13MP അൾട്രാ വൈഡ് ലെൻസ്, 10.8MP ടെലിഫോട്ടോ ലെൻസ് (30x സൂപ്പർ സൂം) എന്നിവ നൽകിയിരിക്കുന്നു. മുൻവശത്ത് 10.5MP സെൽഫി ക്യാമറയാണുള്ളത്.
  • രാത്രികാല ചിത്രീകരണത്തിനായുള്ള നൈറ്റ് സൈറ്റ്, അസ്ട്രോഫോട്ടോഗ്രാഫി, മാജിക് ഇറേസർ എന്നിവയ്‌ക്കൊപ്പം, സാധാരണ സംഭാഷണങ്ങളിലൂടെ എഡിറ്റിംഗ് സാധ്യമാക്കുന്ന Edit with Ask Photos ഫീച്ചറും ഇതിലുണ്ട്.

ബാറ്ററിയും ചാർജിങും

എല്ലാ ഫോണുകൾക്കും 30 മണിക്കൂറിലധികം ബാറ്ററി ലൈഫ് ഗൂഗിൾ വാഗ്ദാനം ചെയ്യുന്നുണ്ട്. പിക്സൽ 11 പ്രോയ്ക്ക് 4,850 mAh ബാറ്ററിയും, പ്രോ എക്സ്എൽ മോഡലിന് വലിയ 5,115 mAh ബാറ്ററിയുമാണ് നൽകിയിരിക്കുന്നത്. കൂടാതെ 25W വരെയുള്ള പിക്സൽസ്നാപ്പ് വയർലെസ് ചാർജിങ്ങും പൊടി, വെള്ളം എന്നിവയെ പ്രതിരോധിക്കാനുള്ള IP68 റേറ്റിങ്ങും ഫോണുകൾക്കുണ്ട്.

ജെമിനി എഐ ഫീച്ചറുകളും സോഫ്റ്റ്‌വെയറും

ഗൂഗിളിന്റെ ഓൺ-ഡിവൈസ് ജെമിനി നാനോ മോഡൽ അടിസ്ഥാനമാക്കിയുള്ള ജെമിനി ഇന്റലിജൻസ് ഇതിലുണ്ട്. തത്സമയ സംഭാഷണങ്ങൾക്കായുള്ള ജെമിനി ലൈവ്, സ്ക്രീനിലുള്ള കാര്യങ്ങളെ അടിസ്ഥാനമാക്കി വിവരങ്ങൾ മുൻകൂട്ടി നൽകുന്ന മാജിക് ക്യൂ എന്നിവ ഇതിന്റെ പ്രത്യേകതയാണ്. ഈ സ്മാർട്ട്ഫോണുകൾ ആൻഡ്രോയിഡ് 17 ഒഎസിലാണ് പ്രവർത്തിക്കുന്നത്. പുതിയ ഒഎസ് അപ്‌ഡേറ്റുകളും സുരക്ഷാ പാച്ചുകളും അടക്കം 7 വർഷത്തെ സോഫ്റ്റ്‌വെയർ അപ്‌ഡേറ്റുകൾ ഗൂഗിൾ ഈ ഫോണുകൾക്കായി വാഗ്ദാനം ചെയ്യുന്നുണ്ട്.