കീവ്: യുക്രൈൻ യുദ്ധഭൂമിയിലെ ചരക്കുനീക്കങ്ങൾക്കും സൈനികരുടെ സുരക്ഷയ്ക്കുമായി വിപ്ലവാത്മകമായ മാറ്റത്തിനൊരുങ്ങി യുക്രൈൻ പ്രതിരോധ മന്ത്രാലയം. ഇതിന്റെ ഭാഗമായി 25,000 ആളില്ലാ ഗ്രൗണ്ട് വാഹനങ്ങൾ (Unmanned Ground Vehicles - UGVs) ഈ വർഷം പകുതിയോടെ വിന്യസിക്കുമെന്നാണ് റിപ്പോർട്ടുകൾ.

To advertise here,

2025-ൽ വിന്യസിച്ചതിനേക്കാൾ ഇരട്ടിയിലധികം റോബോട്ടുകളെയാണ് 2026-ന്റെ ആദ്യ പകുതിയോടെ യുക്രൈൻ യുദ്ധമുഖത്തെത്തിക്കുന്നത്. മുൻനിരയിലെ ചരക്കുനീക്കങ്ങൾ നൂറു ശതമാനവും റോബോട്ടിക് സംവിധാനങ്ങളിലേക്ക് മാറ്റുകയാണ് ലക്ഷ്യമെന്ന് പ്രതിരോധ മന്ത്രി മൈഖൈലോ ഫെഡോറോവ് അറിയിച്ചു.

അപകടകരമായ സാഹചര്യങ്ങളിൽ സൈനികർക്ക് പകരം റോബോട്ടുകളെ ഉപയോഗിക്കുന്നത് വഴി നിരവധി ജീവനുകൾ രക്ഷിക്കാൻ സാധിക്കുമെന്ന് പ്രസിഡന്റ് വൊളോദിമിർ സെലൻസ്‌കി പറഞ്ഞു. കഴിഞ്ഞ മൂന്ന് മാസത്തിനിടെ ഇത്തരം സംവിധാനങ്ങൾ ഉപയോഗിച്ച് 22,000 ദൗത്യങ്ങളാണ് പൂർത്തിയാക്കിയത്.

ഖാർകീവ് മേഖലയിൽ ഡ്രോണുകളും റോബോട്ടുകളും മാത്രം ഉപയോഗിച്ച് റഷ്യൻ സൈനിക പോസ്റ്റ് പിടിച്ചെടുത്ത സംഭവം യുദ്ധചരിത്രത്തിലെ തന്നെ ആദ്യത്തേതാണെന്ന് സെലൻസ്‌കി ചൂണ്ടിക്കാട്ടി. പുതുതായി വികസിപ്പിച്ച 'ബിസോൺ-എൽ' (Bizon-L) എന്ന റോബോട്ടിന് 300 കിലോഗ്രാം ഭാരം വഹിക്കാനും 50 കിലോമീറ്റർ ദൂരം സഞ്ചരിക്കാനും ശേഷിയുണ്ട്.

 

ഇതിന് നാറ്റോയുടെ അംഗീകാരവും ലഭിച്ചിട്ടുണ്ട്. 2022-ൽ ഇത്തരം റോബോട്ടുകൾ നിർമ്മിക്കുന്ന ഒരു കമ്പനി പോലും യുക്രൈനിൽ ഇല്ലാതിരുന്ന സ്ഥാനത്ത്, ഇന്ന് മുന്നൂറോളം കമ്പനികളാണ് ഈ മേഖലയിൽ പ്രവർത്തിക്കുന്നത്. ഇതിനായി ജനുവരി മുതൽ ഏകദേശം 330 ദശലക്ഷം ഡോളർ യുക്രൈൻ ചെലവഴിച്ചു കഴിഞ്ഞു. യുദ്ധഭൂമിയിലെ അപകടസാധ്യതകൾ കുറയ്ക്കുന്നതിനും സാങ്കേതിക വിദ്യ ഉപയോഗിച്ച് പ്രതിരോധം ശക്തമാക്കുന്നതിനുമുള്ള യുക്രൈന്റെ നിർണ്ണായക നീക്കമായാണ് ഈ റോബോട്ട് വിന്യാസം വിലയിരുത്തപ്പെടുന്നത്.