റാഞ്ചി: വെസ്റ്റിൻഡീസിനെതിരായ രണ്ടാം ട്വന്റി 20യിൽ ഫോമിൽ തിരിച്ചെത്തി സഞ്ജു സാംസൺ. തുടർച്ചയായി നാല് മത്സരങ്ങളിൽ പരാജയപ്പെട്ടശേഷം 21 പന്തിൽ അർധ സെഞ്ചുറിയുമായാണ് സഞ്ജു തിളങ്ങിയത്. ട്വന്റി 20യിൽ സഞ്ജുവിന്റെ ഒമ്പതാം അർധശതകമാണിത്.

To advertise here,

ഇഷാൻ കിഷനുമായി ചേർന്ന് 43 പന്തിൽ 97 റൺസിന്റെ മികച്ച കൂട്ടുകെട്ട് പടുത്തുയർത്തുകയും ചെയ്തു.

മത്സരത്തിലാകെ 82 റൺസും നേടി. ഇതോടൊപ്പം ഒരു റെക്കോർഡും സഞ്ജു സ്വന്തം പേരിൽ കുറിച്ചു. ട്വന്റി 20യിൽ വെസ്റ്റിൻഡീസിനെതിരെ ഏറ്റവും വേഗത്തിൽ അർധശതകം നേടുന്ന ഇന്ത്യൻ താരമെന്ന റെക്കോർഡിൽ സഞ്ജു വിരാട് കോലിക്കൊപ്പമെത്തി. 2019 ഡിസംബർ 11ന് മുംബൈയിലാണ് കോലി 21 പന്തിൽ അർധശതകം നേടിയത്.

ചില പിഴവുകളോടെയാണ് സഞ്ജു കളി തുടങ്ങിയത്. ഹൊസൈന്റെ പന്തിൽ കവറിൽ പൂരൻ എളുപ്പമുള്ള ക്യാച്ച് കൈവിട്ടത് സഞ്ജുവിന് തുണയായി. ലഭിച്ച ജീവൻ സഞ്ജു പൂർണമായും മുതലെടുത്തു. ഹൊസൈനെതിരെ മൂന്ന് സിക്‌സറും രണ്ട് ഫോറും നേടിയ സഞ്ജു ഇന്ത്യയെ അഞ്ച് ഓവറിൽ 64/1 എന്ന നിലയിലെത്തിച്ചു.

റൺസ് നാൽപതിലെത്തിയപ്പോൾ വീണ്ടും ഭാഗ്യം തുണച്ചു. ഡ്രൈവ് ചെയ്യാനുള്ള ശ്രമത്തിൽ മിഡ്-ഓഫിൽ മോട്ടി മറ്റൊരു ക്യാച്ചും കൈവിട്ടു. പിന്നാലെ റൊമാരിയോ ഷെപ്പേർഡിനെതിരെ രണ്ട് ഫോറുകൾ അടിച്ച് സഞ്ജു തന്റെ ഫോമിലേക്കുയർന്നു. രണ്ടാമത്തെ ഫോറിലൂടെ അദ്ദേഹം വെറും 21 പന്തിൽ അർധശതകം തികച്ചു.