ന്യൂഡൽഹി: വിവാഹനിശ്ചയം റദ്ദാക്കി ഒരു മാസത്തിനുശേഷം വീണ്ടും ഒന്നിച്ച് ക്രിക്കറ്റ് താരം പൃഥ്വി ഷായും നടിയും ഇൻഫ്‌ളുവൻസറുമായ ആകൃതി അഗർവാളും. തിങ്കളാഴ്ച ഇൻസ്റ്റഗ്രാമിൽ പങ്കുവെച്ച പ്രസ്താവനയിലൂടെയാണ് ആകൃതി അഗർവാൾ തങ്ങൾ വീണ്ടും ഒന്നിച്ച കാര്യം സ്ഥിരീകരിച്ചത്. പൃഥ്വി ഷായും ഇതു പങ്കുവച്ചു.

To advertise here,

തങ്ങളുടെ ബന്ധത്തെക്കുറിച്ച് അടുത്ത ആളുകൾ പറഞ്ഞ തെറ്റായ അഭിപ്രായങ്ങൾ കേട്ടാണ് വിവാഹനിശ്ചയം റദ്ദാക്കാൻ തീരുമാനിച്ചതെന്ന് 'വ്യക്തിപരമായ വിശദീകരണം' എന്ന് പേരിട്ട കുറിപ്പിൽ ആകൃതി വ്യക്തമാക്കി. മറ്റുള്ളവരുടെ വാക്കുകേട്ട് എടുത്ത ഈ തീരുമാനത്തിന്റെയും അതുണ്ടാക്കിയ വിഷമങ്ങളുടെയും പൂർണ ഉത്തരവാദിത്തം താൻ ഏറ്റെടുക്കുന്നതായും അവർ കുറിച്ചു. ഇരുവരും തമ്മിൽ തുറന്നു സംസാരിക്കുകയും പരസ്പരം മനസ്സിലാക്കുകയും ചെയ്ത ശേഷമാണ് വീണ്ടും ഒന്നിക്കാൻ തീരുമാനിച്ചതെന്നും പൃഥ്വി ഷാ പിന്നീട് തന്റെ ഇൻസ്റ്റഗ്രാം സ്റ്റോറിയിലൂടെ പങ്കുവെച്ച ഈ കുറിപ്പിൽ പറയുന്നു.

2026 മാർച്ചിലായിരുന്നു പൃഥ്വി ഷായും ആകൃതിയും തമ്മിലുള്ള വിവാഹനിശ്ചയം. എന്നാൽ, വ്യത്യസ്ത ലക്ഷ്യങ്ങളും സാഹചര്യങ്ങളും ചൂണ്ടിക്കാട്ടി സെപ്റ്റംബറിൽ ഇരുവരും പിരിയുന്നതായി അറിയിച്ചിരുന്നു. ഭാവിയെ കുറിച്ചുള്ള വ്യത്യസ്തമായ ലക്ഷ്യങ്ങളും സാഹചര്യങ്ങളും കാരണം വേർപിരിയുന്നുവെന്നാണ് ആകൃതി അന്ന് ഇൻസ്റ്റഗ്രാമിൽ കുറിച്ചത്.

2018-ൽ ഇന്ത്യയ്ക്ക് അണ്ടർ-19 ലോകകപ്പ് കിരീടം നേടിത്തന്ന ക്യാപ്റ്റനായ 26-കാരനായ പൃഥ്വി ഷാ, വെസ്റ്റ് ഇൻഡീസിനെതിരായ അരങ്ങേറ്റ ടെസ്റ്റിൽ തന്നെ സെഞ്ചുറി നേടി ശ്രദ്ധേയനായ താരമാണ്. കരിയർ വീണ്ടെടുക്കുന്നതിനായി മുംബൈയിൽ നിന്ന് മഹാരാഷ്ട്രയിലേക്ക് മാറിയ താരം, നിലവിൽ രഞ്ജി ട്രോഫിയിൽ മികച്ച പ്രകടനമാണ് നടത്തുന്നത്. ഋതുരാജ് ഗെയ്ക്​വാദിന്റെ അഭാവത്തിൽ മഹാരാഷ്ട്ര ടീമിനെ നയിക്കുന്ന പൃഥ്വി ഷാ, സർവീസസിനെതിരായ മത്സരത്തിൽ 73 പന്തിൽ നിന്ന് 70 റൺസ് നേടിയിരുന്നു.