വികാരാബാദ് (തെലങ്കാന): ബിസിസിഐ അണ്ടർ 19 ടീമിലേക്ക് തിരഞ്ഞെടുക്കപ്പെട്ട 17-കാരിയായ ക്രിക്കറ്റ് താരത്തെ മരിച്ച നിലയിൽ കണ്ടെത്തി. തെലങ്കാനയിലെ യലാൽ മണ്ഡലത്തിലെ സംഗയപള്ളി സ്വദേശിനിയായ നന്ദിനിയെയാണ് വികാരാബാദ് ടൗണിലുള്ള മധു കോളനിയിലെ മുത്തശ്ശിയുടെ വീട്ടിൽ മരിച്ച നിലയിൽ കണ്ടെത്തിയത്. പഠനത്തിനും ക്രിക്കറ്റ് പരിശീലനത്തിനുമായാണ് നന്ദിനി മുത്തശ്ശിയുടെ വീട്ടിൽ താമസിച്ചിരുന്നത്.

To advertise here,

അതേസമയം രണ്ട് യുവാക്കളുടെ ശല്യവും മാനസിക പീഡനവുമാണ് നന്ദിനിയുടെ മരണത്തിലേക്ക് നയിച്ചതെന്നാണ് ബന്ധുക്കളുടെ ആരോപണം.അനിൽ, കൃഷ്ണ എന്നീ രണ്ട് യുവാക്കൾ നന്ദിനിയെ നിരന്തരം ശല്യം ചെയ്തിരുന്നതായി കുടുംബാംഗങ്ങൾ ആരോപിച്ചു. പ്രണയം നടിച്ച് അനിൽ നന്ദിനിയെ പിന്തുടർന്നിരുന്നുവെന്നും കൃഷ്ണ ഇതിന് പിന്തുണ നൽകിയിരുന്നുവെന്നുമാണ് കുടുംബം പറയുന്നത്.

ശനിയാഴ്ച രാവിലെ ഒമ്പതു മണിയോടെയാണ് വിവരം ലഭിച്ചതെന്നും ഉടൻതന്നെ പോലീസ് സംഘം സ്ഥലത്തെത്തിയെന്നും വികാരാബാദ് സർക്കിൾ ഇൻസ്‌പെക്ടർ രഘു അറിയിച്ചു. പ്രാഥമിക പരിശോധനയിൽ ആത്മഹത്യയാണെന്നാണ് നിഗമനം. പെൺകുട്ടിയുടെ പിതാവ് നൽകിയ പരാതിയുടെ അടിസ്ഥാനത്തിൽ ദുരൂഹ മരണത്തിന് പോലീസ് കേസെടുത്തിട്ടുണ്ട്. വെള്ളിയാഴ്ച രാവിലെ പോസ്റ്റുമോർട്ടം നടപടികൾ പൂർത്തിയാക്കി മൃതദേഹം കുടുംബത്തിന് വിട്ടുനൽകി.

പോലീസ് നന്ദിനിയുടെ മൊബൈൽ ഫോൺ കസ്റ്റഡിയിലെടുത്തിട്ടുണ്ട്. ഇൻസ്റ്റാഗ്രാം, ഫേസ്ബുക്ക്, വാട്ട്‌സ്ആപ്പ് തുടങ്ങിയ സോഷ്യൽ മീഡിയ അക്കൗണ്ടുകളും മറ്റും പരിശോധിച്ചു വരികയാണെന്ന് സി.ഐ രഘു വ്യക്തമാക്കി. മരണത്തിലേക്ക് നയിച്ച സാഹചര്യങ്ങൾ സംബന്ധിച്ച് സ്ഥിരീകരണം നൽകാൻ പോലീസിന് ഇതുവരെ സാധിച്ചിട്ടില്ല. ആരോപണവിധേയരായ രണ്ട് യുവാക്കളെയും പോലീസ് കസ്റ്റഡിയിലെടുത്ത് അന്വേഷണം നടത്തിവരികയാണ്.

സംഭവത്തെത്തുടർന്ന് കുടുംബാംഗങ്ങളും ബന്ധുക്കളും വികാരാബാദിൽ റോഡ് ഉപരോധിച്ച് പ്രതിഷേധിക്കുകയും ആരോപണവിധേയരായ യുവാക്കളെ ഉടൻ അറസ്റ്റ് ചെയ്ത് കർശന നിയമനടപടി സ്വീകരിക്കണമെന്ന് ആവശ്യപ്പെടുകയും ചെയ്തു. തുടർന്ന് പോലീസ് സ്ഥലത്തെത്തി പ്രതിഷേധക്കാരുമായി സംസാരിക്കുകയും, തെളിവുകൾ പരിശോധിച്ച് ശക്തമായ നടപടി ഉറപ്പുനൽകുകയും ചെയ്തു.