സിഡ്‌നി: 2022 ട്വന്റി 20 ലോകകപ്പില്‍ ഇന്ത്യ കിരീടം നേടുമെന്ന് പ്രവചിച്ച് ദക്ഷിണാഫ്രിക്കയുടെ ക്രിക്കറ്റ് ഇതിഹാസം എ.ബി.ഡിവില്ലിയേഴ്‌സ്. എ.എന്‍.ഐയ്ക്ക് നല്‍കിയ അഭിമുഖത്തിനിടെയാണ് ഡിവില്ലിയേഴ്‌സ് ഇക്കാര്യമറിയിച്ചത്. 

To advertise here,

ഇംഗ്ലണ്ടിനെ കീഴടക്കി ഇന്ത്യ  ഫൈനലിലെത്തുമെന്നും കലാശപ്പോരില്‍ ന്യൂസീലന്‍ഡ് എതിരാളിയായി വരുമെന്നും ഡിവില്ലിയേഴ്‌സ് പറഞ്ഞു. ഫൈനലില്‍ ഇന്ത്യ ന്യൂസീലന്‍ഡിനെ കീഴടക്കുമെന്നും മിസ്റ്റര്‍ 360 കൂട്ടിച്ചേര്‍ത്തു. 

ഇന്ത്യ മികച്ച ടീമാണെന്ന് ഡിവില്ലിയേഴ്‌സ് പറഞ്ഞു ' ഇന്ത്യന്‍ ടീമിലെ എല്ലാവരും മികച്ച പ്രകടനം പുറത്തെടുക്കുന്നുണ്ട്. സൂര്യകുമാര്‍ യാദവ് മികച്ച ഫോമിലാണ് കളിക്കുന്നത്. വിരാട് കോലിയും തകര്‍പ്പന്‍ ബാറ്റിങ് കാഴ്ചവെയ്ക്കുന്നു. രോഹിത് ഇതുവരെ ഫോം കണ്ടെത്തിയില്ലെങ്കിലും അദ്ദേഹത്തിന്റെ പ്രതിഭയുടെ മാറ്റ് കുറഞ്ഞിട്ടില്ല. ഇംഗ്ലണ്ടിനെതിരായ മത്സരം കാണാനായി ഞാന്‍ കാത്തിരിക്കുകയാണ്. ഇന്ത്യ ഫൈനലിലെത്തിയാല്‍ കിരീടം ഉറപ്പാണ്'- ഡിവില്ലിയേഴ്‌സ് പറഞ്ഞു.

നിലവില്‍ ഇന്ത്യയുടെ ബാറ്റര്‍മാരും ബൗളര്‍മാരും മികച്ച രീതിയിലാണ് കളിക്കുന്നത്. രോഹിത് ശര്‍മ മാത്രമാണ് ടോപ് ഓര്‍ഡറില്‍ ഫോം കണ്ടെത്താനുള്ളത്. താരത്തിന് ഇതുവരെ 89 റണ്‍സ് മാത്രമാണ് നേടാനായത്. രാഹുല്‍ 123 റണ്‍സെടുത്തിട്ടുണ്ട്. വിരാട് കോലിയാണ് ഇന്ത്യയ്ക്ക് വേണ്ടി ഏറ്റവുമധികം റണ്‍സടിച്ചത്. അഞ്ച് മത്സരങ്ങളില്‍ നിന്ന് 123 റണ്‍സ് ശരാശരിയില്‍ 246 റണ്‍സാണ് താരം അടിച്ചെടുത്തത്. മൂന്ന് അര്‍ധസെഞ്ചുറിയും ഇതില്‍ ഉള്‍പ്പെടും. നിലവില്‍ ടൂര്‍ണമെന്റിലെ ടോപ് സ്‌കോററും കോലിയാണ്. രണ്ടാം സ്ഥാനത്തുള്ള സൂര്യകുമാര്‍ 75 ശരാശരിയില്‍ 225 റണ്‍സെടുത്തിട്ടുണ്ട്. 

ബൗളര്‍മാരില്‍ അര്‍ഷ്ദീപ് സിങ് പത്തുവിക്കറ്റ് വീഴ്ത്തി മുന്നിലുണ്ട്. ഹാര്‍ദിക് പാണ്ഡ്യ (8), മുഹമ്മദ് ഷമി (6), അശ്വിന്‍ (6), ഭുവനേശ്വര്‍ കുമാര്‍ (4) എന്നിവരും മോശമല്ലാത്ത പ്രകടനം പുറത്തെടുത്തിട്ടുണ്ട്.