ദുബൈ: സൗദി അറേബ്യയിലെ റിയാദ് കിംഗ് ഖാലിദ് അന്താരാഷ്ട്ര വിമാനത്താവളത്തിനു നേരെ ശനിയാഴ്ച നടന്ന ആക്രമണത്തിൽ കൊല്ലപ്പെട്ടവരിലും പരിക്കേറ്റവരിലും ഉംറ തീർഥാടകരും മക്ക മദീന പുണ്യപള്ളികൾ സന്ദർശിക്കാനെത്തിയവരും ഉൾപ്പെട്ടതായി റിപ്പോർട്ട്. ആക്രമണത്തിൽ 13 പേർ കൊല്ലപ്പെടുകയും 309 പേർക്ക് പരിക്കേൽക്കുകയും ചെയ്തു.

To advertise here,

മക്കയിലെ മസ്ജിദുൽ ഹറാമിലെയും മദീനയിലെ മസ്ജിദുന്നബവിയിലെയും സംഭവവികാസങ്ങൾ റിപ്പോർട്ട് ചെയ്യുന്ന ‘ഇൻസൈഡ് ദ ഹറമൈൻ’ എന്ന എക്സ് അക്കൗണ്ടാണ് ഇക്കാര്യം അറിയിച്ചത്. യമനിലെ ഹൂതികൾ നടത്തിയതായി ആരോപിക്കപ്പെടുന്ന ആക്രമണത്തിൽ ഇരു പുണ്യപള്ളികളിലേക്കുമെത്തിയ തീർഥാടകരും സന്ദർശകരും ദുരന്തത്തിനിരയായതായും വ്യക്തമാക്കുന്നു.

മരിച്ചവർക്ക് വേണ്ടി പ്രാർഥിക്കുകയും പരിക്കേറ്റവർ വേഗത്തിൽ സുഖം പ്രാപിക്കട്ടെയെന്ന് ആശംസിക്കുകയും ചെയ്തു. എന്നാൽ, മരിച്ചവരിലും പരിക്കേറ്റവരിലും എത്ര തീർഥാടകരുണ്ടെന്ന കൃത്യമായ കണക്ക് പുറത്തുവിട്ടിട്ടില്ല. ഒക്ടോബർ 10 ശനിയാഴ്ച നടന്ന ആക്രമണത്തിൽ 12 പേർ കൊല്ലപ്പെടുകയും 309 പേർക്ക് പരിക്കേൽക്കുകയും ചെയ്തതായി സൗദി ജനറൽ അതോറിറ്റി ഓഫ് സിവിൽ ഏവിയേഷൻ നേരത്തെ സ്ഥിരീകരിച്ചിരുന്നു. പരിക്കേറ്റവരിൽ ചിലരുടെ നില ഗുരുതരമാണ്.

കൊല്ലപ്പെട്ടവരിൽ നാല് സൗദി പൗരന്മാരും രണ്ട് ബംഗ്ലാദേശ് സ്വദേശികളും ഉൾപ്പെടുന്നു. അമേരിക്ക, ജോർദാൻ, ഫലസ്തീൻ, സിറിയ, സുഡാൻ, ഈജിപ്ത് എന്നീ രാജ്യങ്ങളിൽ നിന്നുള്ള ഓരോ പൗരന്മാരും കൊല്ലപ്പെട്ടവരിലുണ്ട്. മക്കയിലേക്ക് യാത്ര ചെയ്യുകയായിരുന്ന നിരവധി തീർഥാടകർ വിമാനത്താവളത്തിൽ വിമാനം കയറുന്നതിനായി കാത്തുനിൽക്കുന്നതിനിടെ ആക്രമണത്തിൽ പരിക്കേറ്റതായി രണ്ട് ഡോക്ടർമാർ മാധ്യമങ്ങളോട് പറഞ്ഞു.

ആക്രമണത്തെ തുടർന്ന് കിംഗ് ഖാലിദ് അന്താരാഷ്ട്ര വിമാനത്താവളത്തിലെ പ്രവർത്തനങ്ങൾ സൗദി അധികൃതർ താൽക്കാലികമായി നിർത്തിവെച്ചു. വിമാനങ്ങൾ മറ്റു വിമാനത്താവളങ്ങളിലേക്ക് തിരിച്ചുവിടുകയും പരിക്കേറ്റവർക്ക് അടിയന്തര ചികിത്സ ലഭ്യമാക്കാൻ മെഡിക്കൽ സംഘങ്ങളെ വിന്യസിക്കുകയും ചെയ്തു.

ഇറാൻ അനുകൂല ഹൂതികൾക്കെതിരെ പോരാടുന്ന സൗദി നേതൃത്വത്തിലുള്ള സഖ്യസേന ആക്രമണത്തിന് ഹൂതികളെയാണ് ഉത്തരവാദികളാക്കിയത്. സംഭവത്തിൽ ശക്തമായ തിരിച്ചടി നൽകുമെന്നും സഖ്യസേന മുന്നറിയിപ്പ് നൽകി.

കഴിഞ്ഞ ദിവസങ്ങളിലായി റിയാദ് അന്താരാഷ്ട്ര വിമാനത്താവളം ഉൾപ്പെടെയുള്ള സൗദി വ്യോമയാന കേന്ദ്രങ്ങൾക്കു നേരെ നടന്നുവരുന്ന ആക്രമണപരമ്പരയിലെ ഏറ്റവും പുതിയ സംഭവമാണിത്. നേരത്തെയുണ്ടായ വിമാനത്താവളത്തിന് നേരെയുള്ള മിസൈൽ ആക്രമണങ്ങളുടെ ഉത്തരവാദിത്വം ഹൂതികൾ ഏറ്റെടുത്തിരുന്നു. സൗദി വ്യോമാതിർത്തിയിലൂടെ സർവീസ് നടത്തുന്നതിനെതിരെ അന്താരാഷ്ട്ര വിമാനക്കമ്പനികൾക്ക് മുന്നറിയിപ്പും നൽകിയിരുന്നു. ശനിയാഴ്ചത്തെ ആക്രമണം വ്യോമഗതാഗതത്തെ വ്യാപകമായി ബാധിച്ചു. സൗദി തലസ്ഥാനമായ റിയാദിലേക്കുള്ള സർവീസുകൾ നിരവധി അന്താരാഷ്ട്ര വിമാനക്കമ്പനികൾ താൽക്കാലികമായി നിർത്തിവെക്കുകയോ റദ്ദാക്കുകയോ ചെയ്തു.