ദുബായ്: സൗദി അറേബ്യയിലെ വിവിധ കേന്ദ്രങ്ങൾ ലക്ഷ്യമിട്ട് ഡ്രോൺ, മിസൈൽ ആക്രമണങ്ങൾ നടത്തിയതായി യെമനിലെ ഇറാൻ പിന്തുണയുള്ള ഹൂതികൾ. റിയാദിലെ കിങ് ഖാലിദ് അന്താരാഷ്ട്ര വിമാനത്താവളം, അബഹ വിമാനത്താവളം, റാബിഗിലെ അരാംകോ എണ്ണ റിഫൈനറി എന്നിവ ഉൾപ്പെടെയുള്ള കേന്ദ്രങ്ങളിലാണ് ആക്രമണം നടത്തിയതെന്ന് ഹൂതി വക്താവ് യഹ്യ സരീ പറഞ്ഞു. ഡ്രോണുകൾക്കൊപ്പം ബാലിസ്റ്റിക്, ക്രൂയിസ് മിസൈലുകളും ആക്രമണത്തിന് ഉപയോഗിച്ചു. തെക്കൻ സൗദി അറേബ്യയിലെ സൈനിക കേന്ദ്രങ്ങളും ചെറിയ വിമാനത്താവളങ്ങളും ആക്രമണത്തിന്റെ ലക്ഷ്യങ്ങളിൽ ഉൾപ്പെട്ടിരുന്നുവെന്നും അദ്ദേഹം വ്യക്തമാക്കി.

To advertise here,

തിങ്കളാഴ്ച രാത്രി റിയാദിൽനിന്ന് ശക്തമായ സ്‌ഫോടനശബ്ദങ്ങൾ കേട്ടതായി വാർത്താ ഏജൻസിയായ എഎഫ്പി റിപ്പോർട്ട് ചെയ്തിരുന്നു. അതേസമയം ഹൂതികളുടെ അവകാശവാദത്തോട് സൗദി അധികൃതർ പ്രതികരിച്ചിട്ടില്ല. ആക്രമണത്തിൽ നാശനഷ്ടമുണ്ടായോ എന്ന കാര്യത്തിലും ഔദ്യോഗിക സ്ഥിരീകരണം ഇതുവരെയില്ല.

ഇതിനിടെ യെമനിലെ ഹൂതികൾക്കെതിരായ സൗദിയുടെ നേതൃത്വത്തിലുള്ള സഖ്യത്തിന്റെ സൈനിക നടപടി ശക്തമായി. യെമനിലെ ഹൂതി നിയന്ത്രണത്തിലുള്ള ചെങ്കടൽ തീരത്തെ തുറമുഖ നഗരമായ ഹൊദൈദയിൽ സൈനിക ലക്ഷ്യങ്ങൾക്കുനേരെ സൗദി നാവികസേന ആക്രമണം നടത്തിയതായി സഖ്യസേനാ വക്താവ് തുർക്കി അൽ മാൽക്കി പറഞ്ഞു.

ആയുധ സംഭരണ കേന്ദ്രങ്ങൾ, ബൂബിട്രാപ്പ് ചെയ്ത ബോട്ടുകൾ സൂക്ഷിച്ചിരുന്ന കേന്ദ്രങ്ങൾ, കടൽ മൈനുകൾ മൈനുകൾ എന്നിവ ആക്രമണത്തിൽ തകർത്തതായും അൽ മാൽക്കി പറഞ്ഞു. തെക്കൻ ചെങ്കടലിലെ കപ്പൽ പാതകളിൽ നടത്താനിരുന്ന ആക്രമണവും സൈനിക നടപടിയിലൂടെ തടഞ്ഞതായി അദ്ദേഹം വ്യക്തമാക്കി.

സൗദി പിന്തുണയുള്ള യെമനിലെ അംഗീകൃത ഭരണകൂടം ഹൂതികൾക്കെതിരെ വലിയ ആക്രമണം ആരംഭിച്ചതിന് പിന്നാലെയാണ് സംഘർഷം കൂടുതൽ രൂക്ഷമായത്. ഇതുവരെ ആയിരത്തിലധികം ആക്രമണങ്ങൾ നടത്തിയതായി യെമൻ സേന അവകാശപ്പെട്ടു. ഹൂതി നിയന്ത്രണത്തിലുള്ള തലസ്ഥാനമായ സന പിടിക്കാനുള്ള നീക്കം ആരംഭിച്ചതായും സേന അറിയിച്ചു.

കഴിഞ്ഞ മാസം യെമന്റെ ചെങ്കടൽ തീരത്തെ വലിയഭാഗം പ്രദേശങ്ങളും ബാബ് അൽ മന്ദേബ് സമീപത്തെ പ്രദേശങ്ങളും ഹൂതികൾ പിടിച്ചെടുത്തിരുന്നു. ഇതിന് പിന്നാലെയാണ് സൗദി അറേബ്യയുടെ സൈനിക നടപടികളും ശക്തമായത്.

അതേസമയം, മക്ക സംയുക്ത പ്രതിരോധ ഉടമ്പടിയുടെ അടിസ്ഥാനത്തിൽ സൗദി അറേബ്യയ്ക്ക് പാകിസ്താന്റെയും തുർക്കിയുടെയും സൈനിക പിന്തുണ ലഭിച്ചതായി റിപ്പോർട്ടുണ്ട്. സൗദിയുടെ സംരക്ഷണത്തിനായി ഉടമ്പടി പ്രകാരം ഇരുരാജ്യങ്ങളും വലിയതോതിൽ സൈനികരെ വിന്യസിക്കാൻ തീരുമാനിച്ചതായാണ് വിവരം. റിയാദിൽ നടന്ന അടിയന്തിര യോഗത്തിലാണ് മക്കാ സഖ്യത്തിന്റെ നിർണ്ണായക തീരുമാനം. ഹൂതികളെ തുരത്താൻ യെമൻ സർക്കാരിന് എല്ലാ പിന്തുണയും നൽകുമെന്നും മക്കാ സഖ്യം ഉറപ്പുനൽകി.